വനിതാ ബീറ്റ് ഫോറസ്റ്റ് ഓഫീസർമാരുടെ യാതനകളറിഞ്ഞ്‌

ഇടുക്കി

വനിതാ ബീറ്റ് ഫോറസ്റ്റ് ഓഫീസർമാർക്ക്‌ അർഹമായ പരിഗണനവേണമെന്ന്‌ വനിതാ കമീഷൻ അധ്യക്ഷ അഡ്വ. പി സതീദേവി പറഞ്ഞു. സംസ്ഥാനത്ത് ആദ്യമായി വനം വകുപ്പിലെ വനിതാ ബീറ്റ് ഓഫീസർമാർക്കും വാച്ചർമാർക്കുമായി പബ്ലിക് ഹിയറിങ് മൂന്നാറിൽ ഉദ്ഘാടനം ചെയ്യുകയായിരുന്നു കമീഷൻ അധ്യക്ഷ. തൊഴിലിടങ്ങളിലെ സാഹചര്യം സംബന്ധിച്ച് വനിതാ ഓഫീസർമാർ നടത്തിയ തുറന്നുപറച്ചിൽ പരിശോധിക്കും. പബ്ലിക് ഹിയറങ്ങിൽ ഉയർന്ന വിഷയങ്ങൾ പരിശോധിച്ചാണ്‌ സർക്കാരിന് ശുപാർശ നൽകുന്നത്‌. സംസ്ഥാനത്ത് ആകെയുള്ള 3126 ബീറ്റ് ഫോറസ്റ്റ് ഓഫീസർമാരിൽ 700 പേർ വനിതകളാണ്. വനവും വനങ്ങളുടെ ആവാസവ്യവസ്ഥയും സംരക്ഷിക്കുന്ന ശ്രമകരമായ ജോലിയാണ് ബീറ്റ് ഫോറസ്റ്റ് ഓഫീസർമാരുടേത്. ജില്ലയിലെ വിവിധ റേഞ്ചുകളിൽനിന്നുള്ള വനിതാ ബീറ്റ് ഓഫീസർമാരും വാച്ചർമാരുമാണ് പബ്ലിക് ഹിയറിങ്ങിൽ പങ്കെടുത്തത്‌. ​വനിതാ കമീഷനംഗം അഡ്വ. എലിസബത്ത് മാമ്മൻ മത്തായി അധ്യക്ഷയായി. വനിത കമീഷൻ അംഗങ്ങളായ അഡ്വ. ഇന്ദിര രവീന്ദ്രൻ, വി ആർ മഹിളാമണി, വനിത കമീഷൻ ഡയറക്ടർ ഷാജി സുഗുണൻ, മൂന്നാർ ഡിഎഫ്ഒ സാജു വർഗീസ്, വനിത കമീഷൻ റിസർച്ച് ഓഫീസർ എ ആർ അർച്ചന എന്നിവർ പങ്കെടുത്തു.