അടുത്തുകാണാം 
മുളംചങ്ങാടത്തിലൂടെ..

. കുമളി

തേക്കടി വനയാത്രയും തടാകത്തിൽ മുളം ചങ്ങാടത്തിലൂടെയുള്ള യാത്രയും വിനോദസഞ്ചാരികൾക്ക് ഏറെ പ്രിയപ്പെട്ടതാണ്. ബാംബൂ റാഫ്റ്റിങ് എന്ന പേരിലുള്ള വനംവകുപ്പിന്റെ പരിപാടിയിൽ മുളഞ്ചങ്ങാടത്തിലിരുന്ന് ആന, കാട്ടുപോത്ത്, മ്ലാവ്, കടുവ എന്നിവയെ അടുത്ത് കാണാം. തേക്കടി തടാകത്തിലൂടെ അക്കരെയിക്കരെ സഞ്ചരിക്കാൻ ആദിവാസികൾ കണ്ടുപിടിച്ചൊരു മാ‍​‍ർ​​ഗമാണ് മുളം ചങ്ങാടം. ഇന്ന് പെരിയാ‍‍ർ കടുവാ സങ്കേതത്തിലെ ഏറ്റവും തിരക്കേറിയ ടൂറിസം പരിപാടിയാണിത്. തേക്കടി വനത്തിലൂടെയും തടാകത്തും യാത്ര ചെയ്ത് പെരിയാറിന്റെ വനസൗന്ദര്യം ഒപ്പം വന്യമൃഗങ്ങളെയും അടുത്ത് കാണാനും ആസ്വദിക്കാനും കഴിയും. ഗൈഡിന്റെ സഹായത്തോടെ വനത്തിലൂടെയുള്ള യാത്രയാണ് ആദ്യം. ഇതിനു ശേഷം പെരിയാർ തടാകത്തിൽ പരമ്പരാഗത മുള ചങ്ങാടത്തിൽ യാത്ര. അതിരാവിലെയുള്ള യാത്രയിൽ ആന, കാട്ടുപോത്ത്, വിവിധ ഇനം പക്ഷികൾ തുടങ്ങിയവയെ കാണാനുള്ള സാധ്യത കൂടുതലാണ്. പരിപാടിയിൽ പങ്കെടുക്കാൻ മുൻകൂട്ടി ബുക്കിങ് ആവശ്യമാണ്.

തേക്കടിയിലെ വനംവകുപ്പ് ഓഫീസ് വഴിയോ വെബ്‌സൈറ്റ് വഴിയോ ഇത് ചെയ്യാം. പകുതിദിവസം പ്രോഗ്രാമിന് ഒരാൾക്ക് ഏകദേശം 2,200 രൂപ ചിലവാകും. പ്രോഗ്രാമുകൾ ഹാഫ്-ഡേ, ഫുൾ-ഡേ ഓപ്ഷനുകളിൽ ലഭ്യമാണ്. ഹാഫ്-ഡേ പ്രോഗ്രാമിൽ സാധാരണയായി ഏകദേശം നാലുമണിക്കൂർ ട്രക്കിങും ഒരു മണിക്കൂർ റാഫ്റ്റിങ്ങും ഉൾപ്പെടുന്നു.