ഗസറ്റഡ് ജീവനക്കാരുടെ മാർച്ചും 
ധർണയും ഇന്ന്

തൊടുപുഴ

ഗസറ്റഡ് ജീവനക്കാർ വിവിധ മുദ്രാവാക്യങ്ങൾ ഉയർത്തി മാർച്ചും ധർണയും നടത്തും. ജില്ലയിൽ രണ്ടു മേഖലകളിലായാണ് പരിപാടി. പീരുമേട്, മുട്ടം, തൊടുപുഴ ഏരിയാകളിലെ ജീവനക്കാർ തൊടുപുഴയിലും ദേവികുളം, ഉടുമ്പൻചോല, ഇടുക്കി ഏരിയകളിലുള്ളവർ ചെറുതോണിയിലും പങ്കെടുക്കും. തൊടുപുഴ മിനി സിവിൽ സ്റ്റേഷൻ പരിസരത്തുനിന്നും മാർച്ച്‌ ആരംഭിക്കും. കുട്ടികളുടെ പാർക്കിനു സമീപം നടത്തുന്ന ധർണ കെജിഒഎ സംസ്ഥാന വനിതാ കൺവീനർ ജെ ജോസഫൈൻ ഉദ്ഘാടനം ചെയ്യും. ചെറുതോണി വഞ്ചിക്കവലയിൽനിന്നും മാർച്ച്‌ ആരംഭിക്കും. പൊലീസ് സ്റ്റേഷൻ പരിസരത്ത്‌ നടത്തുന്ന ധർണ അസോസിയേഷൻ സംസ്ഥാന കമ്മറ്റിയംഗം മുഹമ്മദ് ഷെരീഫ് ഉദ്ഘാടനം ചെയ്യും. കേന്ദ്രസർക്കാരിന്റെ തൊഴിലാളിവിരുദ്ധ ജനവിരുദ്ധ നയങ്ങൾക്കെതിരെ പോരാടുക, തൊഴിലാളി വിരുദ്ധ ലേബർ കോഡുകൾ പിൻവലിക്കുക, പിഎഫ്‌ആർഡിഎ നിയമം പിൻവലിക്കുക, മുഴുവൻ ജവീനക്കാർക്കും ഒപിഎസ്‌ പുനസ്ഥാപിക്കുക, സംസ്ഥാനസർക്കാരിന്റെ ജനപക്ഷബദലുകളുടെ അനിവാര്യമായ തുടർച്ച ഉറപ്പാക്കുക, വർഗീയതയെയും ഭീകരവാദത്തെയും യുദ്ധഭീകരതയെയും ചെറുക്കുക, ശമ്പള പരിഷ്കരണ- ക്ഷാമബത്ത കുടിശ്ശികകൾ അനുഭവവേദ്യമാക്കുക, ശമ്പള പരിഷ്കരണ നടപടികൾ ആരംഭിക്കുക, വിലക്കയറ്റം തടയുക എന്നീ മുദ്രാവാക്യങ്ങൾ ഉന്നയിച്ചാണ്‌ പ്രക്ഷോഭം.