കട്ട ഫ്രണ്ടിനെ വെട്ടാതെ വെട്ടി കട്ടപ്പനക്കൂട്ട്

ആൾക്കാരൊക്കെ ശ്രദ്ധിക്കണതല്ലേ, അങ്ങൂന്ന് ജസ്റ്റൊന്ന് ഇറങ്ങണം. കട്ടപ്പനയിലെ ഫ്രണ്ടുക്കളുടെ രക്ഷാധികാരി ഔട്ട്. ഫ്രണ്ട്സ് ഓഫ് കട്ടപ്പനയിൽനിന്നാണ് ബിജെപി നേതാവുകൂടിയായ രക്ഷാധികാരിയെ മനസ്സോ ശരീരമോ നോവാണ്ട് ​ഗെറ്റ്ഔട്ടടിച്ചത്. ‘എന്ത് പ്രഹസനമാണ് സജീ’, എന്നും കരിക്കട്ട എത്ര കഴുകിയാലും വെളുക്കില്ലെന്നുമൊക്കെ അടക്കംപറച്ചിലുണ്ട്. ആരേലും കണ്ണുരുട്ടിയകൊണ്ടാണോ, സ്വയം രാജിയാണോ, ഭീഷണിയാണോ..എന്തായാലും ഒടുവിലത് സംഭവിച്ചു. വേണ്ടതും വേണ്ടാത്തതും വാർത്തയിറക്കുന്ന ഫ്രണ്ട്സ് ഇക്കാര്യം സൗകര്യപൂർവം ഒളിച്ചു. മാധ്യമ ഫ്രണ്ട്‍‍സും ഒളിപ്പിച്ചു. കണ്ഠക്ഷോഭങ്ങൾ 
അകത്തും പുറത്തും നാടിന്റെ പ്രിയങ്കരനായ കമ്യൂണിസ്റ്റ് നേതാവ് അന്തരിച്ചപ്പോൾ അവഹേളന പോസ്റ്റിട്ടതാണ് ഒടുവിലത്തേത്. മുമ്പ് പൊതുപ്രവർത്തകയ്‍ക്കെതിരെ അശ്ലീല പോസ്റ്റിട്ടതിന് നെയ്യാറ്റിൻകര ചെന്ന് ‌‘എന്റെ പിഴ, എന്റെ പിഴ, എന്റെ വലിയ പിഴ’യെന്ന് ഇംപോസിഷൻ എഴുതി രക്ഷാധികാരി നഗ്നനായി നിന്നപ്പോൾ ഫ്രണ്ട്സിൽ ചിലർ കുടചൂടി. ഇതാവും അടുത്തതിന് പ്രചോദനം. വെറുതേ ചുമന്ന് നാറണ്ടല്ലോ എന്ന് തോന്നിയപ്പോഴാകും നടപടി. കുളിക്കാതെന്തിന് ഈറൻ ചുമക്കണമെന്ന് ചില ഫ്രണ്ട്‍സ്. ഈ ആശാനില്ലാതെ കട്ടപ്പനയിൽ ഒരു കളരിയുമില്ലത്രെ. നാട്ടിലെ അന്തപ്പുര, അരമന രഹസ്യങ്ങളെല്ലാം അറിയുന്നയാൾ, പാരവയ്‍പ്പുകാരുടെ ഉപദേശകൻ, സർവോപരി കമ്യൂണിസ്റ്റ് വിരോധി. എന്നിങ്ങനെ കീർത്തിയേറെയുള്ളകൊണ്ട് ഫ്രണ്ട്സിലെ ചിലർ ആവശ്യംപോലെ കൈയടിച്ച് ഉപയോ​ഗിക്കുന്നു. ഉത്തമനും പോക്കിരിക്കും ഉടമ്പടി വേണ്ട പോലും. ചില അവസര കൊയ്ത്തുകാരും സൃഷ്ടിസ്ഥിതിക്കാരും ഭാഗ്യാന്വേഷികളും കരപ്രമാണിമാരും പേരുംപെരുമയും വാർത്തെടുക്കാമെന്ന തൽപരരുമെല്ലാം ചേരുന്ന സംഘമെന്നാണ് അടിത്തട്ടിലെ സംസാരം. ആളും അർഥവുമുള്ളപ്പോൾ ‘ഉണ്ണാനും വെട്ടാനും’ പടയുണ്ടാവും. സംഘം ഉദേശശുദ്ധിയും ചാരിറ്റിയുമൊക്കെ നന്ന്. കട്ടപ്പനയിൽനിന്ന് കേരളത്തോളവും അവിടെനിന്ന് കശ്‍മീരോളവും വളർന്നെന്നാണ് അവകാശം. മെട്രോ സിറ്റികളിലില്ലാത്ത വിധം ലയണുകളും ജെയ്‍സികളും പെറ്റുപെരുകുമ്പോൾ ഒരുനൂറ് ഫ്രണ്ടുകളും വിരിയട്ടെ, വളരെട്ടെ. കട്ടനടിക്കാൻ വകയില്ലാത്ത നാട്ടിലെ പാവം കലാ സംഘങ്ങളിലേക്ക് ആരുപോകാൻ. കഞ്ഞിക്ക് പകരം ബിരിയാണി കഴിച്ച് കിടന്നാലും മീശ തടവാനും ആളുവേണ്ടെ. കടമ്മനിട്ടയുടെ ‘ശാന്ത’യിലെ വരികൾ പോലെ ‘വിസ്‍മയം പോലെ ലഭിക്കും നിമിഷത്തിനർഥം കൊടുത്ത് പൊലിപ്പിച്ചെടുക്ക നാം’. പൊലിയോ പൊലി.