ഹിന്ദുത്വ അജൻഡ നടപ്പാക്കാന്‍ രാജ്യത്ത് ന്യൂനപക്ഷ വേട്ട: സി വി വര്‍ഗീസ്

കട്ടപ്പന

ചത്തീഡ്ഗഡിലെ കന്യാസ്ത്രീകളുടെ അറസ്റ്റ് ആർഎസ്എസിന്റെ ഹിന്ദുത്വ അജൻഡ നടപ്പാക്കുന്നതിന്റെ ഭാഗമായാണെന്നും ബിജെപി ഭരിക്കുന്ന സംസ്ഥാനങ്ങളിൽ ന്യൂനപക്ഷ വേട്ടയാണെന്നും സിപിഐ എം ജില്ലാ സെക്രട്ടറി സി വി വർഗീസ്. സിപിഐ എം കട്ടപ്പന ഏരിയ കമ്മിറ്റി കട്ടപ്പനയിൽ സംഘടിപ്പിച്ച പ്രതിഷേധയോഗം ഉദ്ഘാടനം ചെയ്യുകയായിരുന്നു അദ്ദേഹം. കന്യാസ്ത്രീകളെ ആൾക്കൂട്ട വിചാരണനടത്തിയ വർഗീയവാദികൾക്ക് ബിജെപി സർക്കാർ ഒത്താശ നൽകി. ഇതിനെതിരെ പ്രതികരിക്കാൻ അവിടുത്തെ കോൺഗ്രസ് നേതാക്കൾ തയ്യാറായില്ല. മുമ്പ് കോൺഗ്രസിന്റെ കാലയളവിലും സമാനമായ സ്ഥിതിയായിരുന്നു. കന്യാസ്ത്രീകൾക്ക് പരിരക്ഷ ഉറപ്പാക്കണമെന്ന് ആവശ്യപ്പെട്ട് പ്രധാനമന്ത്രിക്ക് കത്ത് നൽകിയ ഏക മുഖ്യമന്ത്രി പിണറായി വിജയനാണ്. കഴിഞ്ഞ ലോക്‌സഭ തെരഞ്ഞെടുപ്പ് കാലത്ത് ബിജെപി അധികാരത്തിലെത്തി റബറിന് വില വർധിപ്പിച്ചുനൽകിയാൽ കേരളത്തിൽ അക്കൗണ്ട് തുറക്കാൻ സഹായിക്കുമെന്ന് ചില മതമേലധ്യക്ഷൻമാർ നിലപാട് സ്വീകരിച്ചിരുന്നു. അന്നുതന്നെ ഇടതുപക്ഷ നേതാക്കൾ മുന്നറിയിപ്പ് നൽകിയിരുന്നതാണ്.ന്യുനപക്ഷങ്ങൾക്കിടയിലേക്ക് ക്രിസ്മസ് കേക്കുമായി കടന്നുവരുന്ന ബിജെപിക്കും ആർഎസ്എസിനും ഗൂഢലക്ഷ്യങ്ങളാണുള്ളത്. വർഗീയതയ്‌ക്കെതിരെ എക്കാലവും ശബ്ദമുയർത്തുന്ന സിപിഐ എമ്മാണ് സംഘപരിവാറിന്റെ മുഖ്യശത്രു. ആർഎസ്എസിന് ഏറ്റവും കൂടുതൽ ശാഖകളുള്ള കേരളത്തിൽ, അവരുടെ ആധിപത്യം അരക്കിട്ടുറപ്പിക്കാത്തത് ഇടതുപക്ഷത്തിന്റെ ശക്തമായ പ്രതിരോധമുള്ളതിനാലാണെന്നും സി വി വർഗീസ് പറഞ്ഞു. ജില്ലാ കമ്മിറ്റിയംഗം വി ആർ സജി അധ്യക്ഷനായി. ജില്ലാ സെക്രട്ടറിയറ്റംഗം കെ എസ് മോഹനൻ, കട്ടപ്പന ഏരിയ സെക്രട്ടറി മാത്യു ജോർജ്, ഏരിയ കമ്മിറ്റിയംഗങ്ങൾ എന്നിവർ സംസാരിച്ചു. സമ്മേളനത്തിന് മുന്നോടിയായി നഗരത്തിൽ നടന്ന പ്രകടനത്തിൽ നഗരസഭ കൗൺസിലർമാർ, തൊഴിലാളികൾ, കർഷകർ എന്നിവർ അണിനിരന്നു.