'എന്റെയും ചേട്ടന്റെയും ശബ്‍ദം ഒരുപോലിരിക്കുന്നു'

‘എന്റേയും ചേട്ടന്റേയും ശബ്‍ദം ഒരുപോലിരിക്കുന്നു', പട്ടണപ്രവേശത്തില്‍ ചിരി പടര്‍ത്തിയ കൊലമാസ് വില്ലൻ അനന്തൻ നമ്പ്യാരുടെയും സിഐഡി ദാസന്റെയും വിശ്വവിഖ്യാത സംഭാഷണം. ഇരുവരുടെയും യഥാര്‍ഥ വേഷം ഒളിപ്പിക്കാനുള്ള ശ്രമമാണ് വൻ കോമഡിയായത്. എന്താണെന്നറിയില്ല, ദേശീയപാതാ വികസന മുടക്കികളായ ബിജെപി നേതാവിന്റേയും എംപിയുടെയും പ്രവൃത്തിയും ശബ്ദവും നയവുമെല്ലാം ഒരുപോലെ തന്നെയെന്ന് തെളിയുന്നു. ചക്കരയ്‍ക്ക് അകവും പുറവും ഇല്ലാത്തതു പോലുള്ള സദൃശം. ബിജെപി നേതാവ് ഹർജി നൽകി ദേശീയപാത വികസനം തടസ്സപ്പെടുത്തുന്നു. പ്രശ്നം ഹൈക്കോടതിയിലെത്തിച്ച് എംപിയും വിട്ടുകൊടുത്തില്ല. 'എന്റെ പേരിൽ എന്തെങ്കിലും കേസുണ്ടോ'യെന്ന് അതിരാവിലെ സ്‌റ്റേഷനിൽ പോയി ചോദിച്ച് തെളിയാത്തവയെല്ലാം തലയിൽ കയറ്റിവച്ചതു പോലെത്തെ ഒരേര്‍പ്പാട്. തുടർ പ്രവർത്തനമാണ് പാതവികസനം. കേസ് കോടതിയിൽ വന്നപ്പോൾ തന്നെ പോർട്ടലിലൂടെ അപേക്ഷ നൽകുകയായിരുന്നു. ചില ക്ഷുദ്ര ജീവികളെ ആവശ്യമില്ലാത്തിടത്ത് തിരുകിവച്ച പോലെ. ഭൂമി ‘സ്റ്റാറ്റസ്, ചോദിക്കുമ്പോൾ സംസ്ഥാന സർക്കാർ വെട്ടിലാകുമല്ലോ എന്ന സംതൃപ്തി. അപ്പോൾ ഇടതു സർക്കാരിനെതിരെ ഒരടി ഇരിക്കട്ടെ എന്ന്. ‘കുടിക്കാനറിയാത്ത പൂച്ചയ്‍ക്ക് പാൽ കമഴ്‍ത്താനുമറിയാം'. പൊതുശല്യമെന്ന പോലെ ഹർജി നൽകിയ ബിജെപി നേതാവിനിപ്പോൾ പാർടിയിൽ വലിയ പിടുത്തമൊന്നുമില്ല. 'പല്ലക്കു കയറാൻ വലിയ മോഹമുണ്ടെങ്കിലും ചുമച്ചും ഊന്നിയും കയറാനുള്ള ശക്തിയുമില്ല, എന്നാൽ ഇങ്ങനെയെങ്കിലും നാലാൾ അറിയട്ടെ, ചുമ്മായിരിക്കുമ്പോൾ ചുണ്ണാമ്പിട്ട് പൊള്ളിക്കുക. രണ്ടു കൂട്ടരും ചേർന്ന് ഇങ്ങനെയൊക്കെ ആക്കി തെറ്റിദ്ധാരണ വ്യവസായത്തിനാണ് തിരി കൊളുത്തിയത്. അവസാനം എംപിയുടെ പഞ്ച് ഡയലോഗും. വീണ്ടും കോടതിയിൽ കക്ഷിചേരും. അങ്ങനെ പല പാപം നീങ്ങാൻ ഒരു പുണ്യം ചെയ്യുന്ന പോലെയൊരിത്.