കേന്ദ്രത്തിന്റെ കര്‍ഷക ദ്രോഹത്തിനെതിരെ നാട്‌

ഇടുക്കി

സബ്സിഡി വെട്ടിക്കുറച്ച്, രാസവളങ്ങളുടെ വില വർധിപ്പിച്ച ബിജെപി സർക്കാർ രാജ്യത്തെ കർഷകരെയൊന്നാകെ പ്രതിസന്ധിയിലാക്കി. ഫാക്ടംഫോസ്, അമോണിയം ഫോസ്‌ഫേറ്റ്, പൊട്ടാഷ്, മിശ്രിത മിക്‌സ്‌ചർ വളങ്ങൾ എന്നിവയ്ക്ക് ബാഗിന് 125 രൂപ മുതൽ 250 രൂപ വരെയാണ് കൂട്ടിയത്. നെല്ലുൽപ്പാദനച്ചെലവ് ഒരേക്കറിന് 28,000ൽനിന്ന് 40,000 രൂപയായി വർധിച്ചു. തുടർച്ചയായി കർഷകദ്രോഹ നടപടികളാണ് കേന്ദ്രസർക്കാർ കൈക്കൊള്ളുന്നത്‌. 2023–--24ൽ സബ്സിഡിക്ക് 2.51 ലക്ഷം കോടി രൂപയാണ്‌ ചെലവഴിച്ചതെങ്കിൽ 2025–-26ൽ 1.67 ലക്ഷം കോടിയായി വെട്ടിച്ചുരുക്കി. രണ്ടുവർഷത്തിനിടെ 84,000 കോടി രൂപയാണ് കുറച്ചത്. 2022–--23ൽ 39,819 മെട്രിക് ടൺ ഫോസ്ഫേറ്റ് വളം കേരളത്തിൽ ഉപയോഗിച്ചിരുന്നെങ്കിൽ വില വർധനയെ തുടർന്ന് 2024-–-25ൽ 33,210 മെട്രിക് ടൺ ആയി കുറഞ്ഞു. പൊട്ടാഷ് വളങ്ങളുടെ ഉപയോഗവും 64,751ൽനിന്ന് 59,989 മെട്രിക് ടണ്ണായി കുറഞ്ഞു. ഇത് വിളവിനെയും കർഷകരുടെ വരുമാനത്തെയും പ്രതികൂലമായി ബാധിച്ചു. ഇതേത്തുടർന്ന് മോദി സർക്കാരിനെതിരെ നാടെങ്ങും പ്രതിഷേധം അലയടിച്ചിരുന്നു.