തൊടുപുഴ ന​ഗരത്തില്‍ നിയമംലംഘിച്ച്‌ ബിജെപിയുടെ പ്രചാരണം

തൊടുപുഴ

കോടതി ഉത്തരവ്‌ മാനിക്കാതെ ബിജെപിയുടെ പ്രചാരണം. പൊതുയിടങ്ങളിൽ പ്രചാരണത്തിന്റെ ഭാഗമായി കൊടി തോരണങ്ങൾ കെട്ടുന്നതും ബോർഡുകൾ സ്ഥാപിക്കുന്നതും ഹൈക്കോടതി തടഞ്ഞിരുന്നു. എന്നാൽ കഴിഞ്ഞ 27ന്‌ തൊടുപുഴയിൽ ബിജെപി നോർത്ത്‌ ജില്ലാ കമ്മിറ്റി സംഘടിപ്പിച്ച യുവസംഗമത്തിന്റെ പ്രചാരണാർഥം ടൗണിലെ വൈദ്യുത തൂണുകളിലും ബസ്‌ കാത്തിരിപ്പ്‌ കേന്ദ്രങ്ങളിലും നിറയെ ബിജെപി കൊടികൾ സ്ഥാപിച്ചിരിക്കുകയാണ്. സംസ്ഥാന ജനറൽ സെക്രട്ടറി അനൂപ്‌ ആന്റണിയാണ്‌ പാപ്പൂട്ടി ഹാളിൽ നടന്ന യുവസംഗമം ഉദ്‌ഘാടനംചെയ്‌തത്‌. പരിപാടി കഴിഞ്ഞ്‌ ദിവസങ്ങളായിട്ടും പ്രചാരണ സാമഗ്രികൾ നീക്കിയിട്ടില്ല. പൊതുസ്ഥലങ്ങൾ പ്രചാരണകേന്ദ്രങ്ങൾ ആക്കുന്നവരോട്‌ തൊടുപുഴ നഗരസഭ ഭരണാധികാരികൾക്ക് വിവേചനമുണ്ട്. തൊടുപുഴയിൽ നടന്ന സിപിഐ എം ജില്ലാ സമ്മേളനത്തോടനുബന്ധിച്ച്‌ റോഡരികിൽ കൊടി തോരണങ്ങളും പ്രചാരണ ബോർഡുകളും സ്ഥാപിക്കാൻ നഗരസഭ അധികൃതർ അനുവദിച്ചിരുന്നില്ല. എന്നാൽ, ബിജെപിയുടെ ചെറുപരിപാടികൾ നടന്നാലും ഇത്തരം പ്രവർത്തികൾ കണ്ടില്ലെന്ന് നടിക്കുകയാണ്. കൊടിക്കമ്പുകൾ റോഡിലേക്ക്‌ തള്ളി നിൽക്കുന്നത്‌ ബുദ്ധിമുട്ടാണെന്ന് യാത്രക്കാർ പറഞ്ഞു. വിഷയത്തിൽ പൊലീസിന് പരാതി നൽകിയിട്ടുണ്ടെന്നും നീക്കംചെയ്യാൻ ജീവനക്കാരോട് നിർദേശിച്ചിട്ടുണ്ടെന്നും ന​ഗരസഭാ അധികൃതർ പറഞ്ഞു.