നാടുണർത്തി പരിഷത്ത്‌ കലാജാഥ - ‘ഇന്ത്യാ സ്റ്റോറി’ പര്യടനം തുടരുന്നു

മലപ്പുറം : "വിണ്ടുകീറിയ കാലടികളിലിന്ത്യ വീണ്ടുമുയർത്തെണീക്കും....

കേരളം പുതുവഴി തെ‍ളിക്കും, പുതിയൊരോണം പൂവിളിക്കും ....”

വർത്തമാനകാല ഇന്ത്യൻ അവസ്ഥകളിലെ പൊള്ളുന്ന ചോദ്യങ്ങളും ഓർമപ്പെടുത്തലുകളുമായി കേരള ശാസ്ത്രസാഹിത്യ പരിഷത്ത് കലാജാഥ- ഇന്ത്യാ സ്റ്റോറി നാടകയാത്ര മലപ്പുറത്ത് പര്യടനം തുടരുന്നു. അവഗണനയുടെ കെട്ടകാലത്തും നന്മയുടെ കെടാവിളക്കാണ് കേരളം എന്ന് ആശ്വസിക്കുന്നതോടൊപ്പം കേരളം നേരിടുന്ന അവഗണനകൾ ഭരണഘടനാമൂല്യമായ ഫെഡറലിസത്തിന്റെ തകർച്ചക്ക് കാരണമാകുന്നുവെന്ന് കൂടി പറഞ്ഞുവെച്ചാണ് നാടകം തെരുവുകളിൽ അരങ്ങേറുന്നത്.

ഒരു മണിക്കൂർ ദൈർഘ്യമുള്ള നാടകം മെഗാ കാസ്‌റ്റിങ്‌ ഷോയുടെ രൂപത്തിലാണ് ചിട്ടപ്പെടുത്തിയിട്ടുള്ളത്. ശാസ്ത്രസാഹിത്യ പരിഷത്താണ് ഇന്ത്യാ സ്റ്റോറി നാടകയാത്ര അവതരിപ്പിക്കുന്നത്. തൃശൂർ സ്‌കൂൾ ഓഫ് ഡ്രാമയിലെ എം എസ് അരവിന്ദ് രചനയും സംവിധാനവും നിർവഹിച്ച ഇന്ത്യാ സ്റ്റോറി നാടകത്തിൽ ബിന്ദു പീറ്റർ, റിനേഷ് അരിമ്പ്ര, ബാബുരാജ് മലപ്പട്ടം, അഖിൽ ഒളവണ്ണ, യു കെ വിശ്രുത്, അവന്തിക സന്തോഷ്, സനൽ കോട്ടയം, ജോസ് പൂക്കൾ, ആദിത്യ സന്തോഷ്, നിർമല കെ രാമൻ, ഹരീഷ് ഹർഷ എന്നിവരാണ് അഭിനേതാക്കൾ. എം എം സചീന്ദ്രൻ, ജി രാജശേഖരൻ എന്നിവർ ഗാനരചനയും സന്ദീപ് കുമാർ, സുരേഷ് ബാബു ചെണ്ടയാട് എന്നിവർ സംഗീതവും ബി എസ് ശ്രീകണ്ഠൻ പശ്ചാത്തല സംഗീതവും വിഷ്ണുശാരി രംഗപടവും നിർവഹിച്ചിരിക്കുന്നു.

എ എം ബാലകൃഷ്ണൻ മാനേജറും ബിന്ദു പീറ്റർ ക്യാപ്റ്റനുമാണ്. ശനിയാഴ്ച കൊണ്ടോട്ടി, തിരൂരങ്ങാടി, താനൂർ, തിരൂർ മേഖലകളിൽ പര്യടനം നടത്തിയ‍ കലാജാഥക്ക് കാരാട്, ആനയാറങ്ങാടി, പുത്തൻ തെരു, ബി പി അങ്ങാടി എന്നിവിടങ്ങളിൽ സ്വീകരണം നൽകി. വിവിധ കേന്ദ്രങ്ങളിൽ പരിഷത്ത് ജില്ലാ സെക്രട്ടറി വി വി മണികണ്ഠൻ, ജില്ലാ പ്രസിഡൻ്റ് സി പി സുരേഷ് ബാബു, സജിൻ നിലമ്പൂർ എന്നിവർ ജാഥാ വിശദീകരണം നടത്തി.

പി കെ വിനോദ് കുമാർ, പ്രദീപൻ അമ്പാളിൽ, സി പി നരസിംഹൻ, എ ചിത്രാംഗദൻ, പി എം രാധാകൃഷ്ണൻ, ടി ടി ജയ, പി എം ശശികുമാർ, കെ ഹജേഷ്, സതീശൻ എന്നിവർ സംസാരിച്ചു. ഞായറാഴ്ച പൊന്നാനി കണ്ടനകം, കുറ്റിപ്പുറം പിലാത്തറ, പെരിന്തൽമണ്ണ തിരൂർക്കാട്, മലപ്പുറം പൊന്മള മുട്ടിപ്പാലം എന്നിവിടങ്ങളിൽ സ്വീകരണം നൽകും. തിങ്കളാഴ്ച മഞ്ചേരി, വണ്ടൂർ, നിലമ്പൂർ മേഖലകളിൽ പര്യടനം നടത്തി വഴിക്കടവ് മാമാങ്കരയിൽ സമാപിക്കും.