വെളിയങ്കോടിന്റെ സ്വന്തം കൊളാടി

പൊന്നാനി

എംഎൽഎയായശേഷം പഞ്ചായത്ത് പ്രസിഡന്റായ ചരിത്രമാണ് കൊളാടി ഗോവിന്ദൻകുട്ടി എന്ന കമ്യൂണിസ്റ്റ് നേതാവിന്റേത്. രണ്ടുവർഷം എംഎൽഎയായ അദ്ദേഹം 16 വർഷം വെളിയങ്കോട് പഞ്ചായത്ത് പ്രസിഡന്റായി. കേരളത്തിന്റെ രാഷ്ട്രീയ ചരിത്രത്തിലെ അപൂർവതകളിലൊന്നായിരുന്നു അത്. 1957–ൽ ആദ്യ തെരഞ്ഞെടുപ്പിലാണ് കൊളാടി ഗോവിന്ദൻകുട്ടി എംഎൽഎയായത്. അണ്ടത്തോട് മണ്ഡലത്തിൽനിന്ന്‌ കമ്യൂണിസ്റ്റ് പാർടി സ്ഥാനാർഥിയായി ജയിച്ച് സർക്കാരിന്റെ ഭാഗമായി. പ്രായം 26. കോൺഗ്രസിന്റെ പ്രമുഖ നേതാവായിരുന്ന കെ ജി കരുണാകര മേനോനെയാണ് തോൽപ്പിച്ചത്. ഗോവിന്ദൻകുട്ടിയുടെ ജ്യേഷ്ഠൻ കൊളാടി ബാലകൃഷ്ണൻ (ഉണ്ണി)ആയിരുന്നു വെളിയങ്കോട് പഞ്ചായത്തിന്റെ പ്രഥമ പ്രസിഡന്റ്‌. മലബാറിലെ ഏറ്റവും കൂടുതൽ ഭൂസ്വത്തുക്കൾ ഉള്ള വെളിയങ്കോട്ടെ കൊളാടി തറവാട്ടിലായിരുന്നു ബാലകൃഷ്ണന്റെ ജനനം. തന്റെ മുൻ തലമുറ തീണ്ടാപ്പാടകലെ നിർത്തിയ മനുഷ്യരെ അദ്ദേഹം ചേർത്തുപിടിച്ചു. ഈ ഭൂമി നിങ്ങളുടേത് കൂടിയാണെന്ന് അവരെ ബോധ്യപ്പെടുത്തി. താനൊരു കമ്യൂണിസ്റ്റാണെന്ന് യാഥാസ്ഥിതികരായ ബന്ധുക്കളോട് വിളിച്ചുപറഞ്ഞു. വഴിനടക്കാനും പൊതുകുളത്തിൽ കുളിക്കാനും ബാർബർ ഷോപ്പിൽ മുടിവെട്ടാനും അന്തസ്സോടെ ജീവിക്കാനുമുള്ള സമരങ്ങളിൽ മുന്നിൽനിന്ന അദ്ദേഹത്തെ നാട്ടുകാർ വെളിയങ്കോട് പഞ്ചായത്തിന്റെ ആദ്യ പ്രസിഡന്റാക്കി. പക്ഷെ, 36–-ാം വയസ്സിൽ 1955ൽ അദ്ദേഹം അന്തരിച്ചു. 59ൽ ആദ്യ കമ്യൂണിസ്റ്റ് സർക്കാരിനെ ജവഹർലാൽ നെഹ്റു പിരിച്ചുവിട്ടു. അതിനുശേഷം നടന്ന പഞ്ചായത്ത് തെരഞ്ഞെടുപ്പിൽ ഗോവിന്ദൻകുട്ടി വെളിയങ്കോട് പഞ്ചായത്തിലേക്ക് മത്സരിച്ച് ജയിച്ചു. പ്രസിഡന്റ്‌ സ്ഥാനത്ത് നീണ്ട 16 വർഷം തുടർന്നു. ദീർഘകാലം പഞ്ചായത്ത് തെരഞ്ഞെടുപ്പ്‌ നിർത്തിവച്ച കാലമായിരുന്നു അത്. കൊളാടി എന്ന പേര് വെളിയങ്കോട്ടുകാർക്ക് ഇന്നും ആവേശമാണ്. ലോക്‌സഭയിലേക്ക് പൊന്നാനി മണ്ഡലത്തിൽനിന്ന് രണ്ട് തവണ മത്സരിച്ചെങ്കിലും ബനാത്ത് വാലയോട് പരാജയപ്പെട്ടു. പിന്നീട് മത്സരരംഗത്തുനിന്ന് പിൻമാറി പാർടി ക്ലാസുകളിൽ ശ്രദ്ധ കേന്ദ്രീകരിച്ചു. സാഹിത്യ അക്കാദമി അംഗം, കാർഷിക സർവകലാശാലാ എക്സിക്യൂട്ടീവ് കമ്മിറ്റി അംഗം, കലാമണ്ഡലം വൈസ് ചെയർമാൻ, സിപിഐ സംസ്ഥാന എക്സിക്യൂട്ടീവ് അംഗം തുടങ്ങിയ സ്ഥാനങ്ങൾ വഹിച്ചു. എട്ട് പുസ്തകം എഴുതി സാഹിത്യ സാംസ്കാരിക കലാരംഗത്ത് നിറസാന്നിധ്യമായി തുടർന്നു. മകൻ അജിത് കൊളാടി സിപിഐ സംസ്ഥാന കൗൺസിൽ അംഗമാണ്.