വെളിയങ്കോട്ടിന്‌ സ്വപ്‌ന പാലം

പൊന്നാനി

കടത്ത് തോണിയും താല്‍ക്കാലിക നടപ്പാലവും ആശ്രയിച്ച് പുഴ കടന്ന കാലം വെളിയങ്കോട്ടെ ജനങ്ങൾക്ക് പഴങ്കഥയാവുകയാണ്‌. നാട് സ്വപ്നം കണ്ടതിനേക്കാൾ മികച്ച രീതിയിൽ വെളിയങ്കോട് ലോക്ക് കം ബ്രിഡ്ജിന്റെ നിർമാണം പുരോഗമിക്കുന്നു. മൂന്ന് ഘട്ടമായി നടപ്പാക്കുന്ന പദ്ധതിയുടെ ആദ്യംഘട്ടം പൂർത്തിയാക്കി. രണ്ടാം ഘട്ടത്തിന്റെ പ്രവൃത്തി ആരംഭിച്ചു. ലോക്ക് കം ബ്രിഡ്ജും അപ്രോച്ച് റോഡും ഉൾപ്പെടെ രണ്ട് ഘട്ടങ്ങളിലായി 43.97 കോടിയുടെ പദ്ധതിയാണ് പുരോഗമിക്കുന്നത്. ഉപ്പുവെള്ളം കയറുന്നത് തടയാൻ ബ്രിട്ടീഷ് ഭരണകാലത്ത് നിർമിച്ച ലോക്ക് പൂർണമായി തകർന്നതോടെയാണ് പുതിയ പദ്ധതി വേണമെന്ന ആവശ്യമുയർന്നത്‌. കനോലി കനാൽ ദേശീയ ജലപാതയായതോടെ ചുവപ്പ് നാടയിൽ കുരുങ്ങിയ പദ്ധതിക്ക് എൽഡിഎഫ് സർക്കാർ വന്നതോടെ ജീവൻവച്ചു. മുൻ സ്പീക്കർ പി ശ്രീരാമകൃഷ്ണനും പി നന്ദകുമാർ എംഎൽഎയും നടത്തിയ നിരന്തര ഇടപെടലാണ് പദ്ധതിക്ക് ആക്കംകൂട്ടിയത്. വെളിയങ്കോടിനെയും മാറഞ്ചേരിയെയും ബന്ധിപ്പിക്കുന്നതോടൊപ്പം താലൂക്കിന്റെ വിവിധ ഭാഗങ്ങളിലേക്ക് എളുപ്പത്തിൽ എത്താൻ ഇതുവഴി സാധിക്കും. കാർഷിക മേഖലക്കും കുടിവെള്ളത്തിനും പദ്ധതി ഗുണകരമാവും. ബ്രിഡ്ജും ലോക്കും ഇലക്‌ട്രിക്കൽ വർക്കുമായി 29.87 കോടിയുടെ നിർമാണമാണ് ആദ്യഘട്ടത്തിൽ പൂർത്തീകരിച്ചത്. രണ്ടാം ഘട്ടമായ അപ്രോച്ച് റോഡും അനുബന്ധ പ്രവൃത്തിക്കുമായി 14.1 കോടിയാണ് ചെലവ് പ്രതീക്ഷിക്കുന്നത്‌. കാസർകോട്‌ എംഎസ് ബിൽഡേഴ്സിനാണ് നിർമാണ ചുമതല. നബാർഡിന്റെ സഹായത്തോടെയാണ് നിർമാണം. നാലര മീറ്റർ വീതിയിൽ ഒറ്റവരി പാലമാണ് നിർമിക്കുന്നത്. 25 മീറ്ററാണ് നീളം. 70 മീറ്ററോളം അടിയിൽനിന്നാണ് ഫൗണ്ടേഷൻ നിർമിച്ചത്. പാലത്തിന്റെ ഇരുഭാഗത്തും 100 മീറ്റർ അപ്രോച്ച് റോഡും വശങ്ങളിൽ സുരക്ഷയും ഒരുക്കും. ഡൈവേർട്ടിങ് 
കനാൽ 
മൂന്നാംഘട്ടത്തിൽ ​ലോക്ക് കം ബ്രിഡ്ജ്‌ നിർമാണത്തിന്റെ ഭാഗമായി ചെറിയ വള്ളങ്ങൾക്ക് പോവാൻ ഡൈവേർട്ടിങ് കനാൽ നിർമിക്കും. ഇത് മൂന്നാംഘട്ടമായാണ് നടപ്പാക്കുക. ഇതിനാവശ്യമായ ഭൂമി ഏറ്റെടുക്കും. കനോലി കനാലിലൂടെ ഏതുസമയവും ചെറിയ വള്ളങ്ങൾ കടന്നുപോവുന്നതിനാൽ ലോക്ക് തുറക്കേണ്ട സാമ്പത്തികവും സാങ്കേതികവുമായ ബുദ്ധിമുട്ട് മുന്നിൽകണ്ടാണ് ലോക്ക് കം ബ്രിഡ്ജിനോട് സമാന്തരമായി 100 മീറ്ററിലധികം നീളത്തിൽ ഡൈവേർട്ടിങ് കനാൽ നിർമിക്കുന്നത്. ചെറിയ വള്ളങ്ങൾ ഇതിലൂടെയായിരിക്കും കടത്തിവിടുക. പാലത്തിന്റെ അപ്രോച്ച്‌ റോഡിന്റെ അടിയിലൂടെയായിരിക്കും ഇത് കടന്നുപോവുക. അപ്രോച്ച് റോഡിനടിയിൽ അഞ്ച് മീറ്റർ വീതിയിൽ ലോക്കോടുകൂടിയ ബോക്സ് കൽവെർട്ട് നിർമിക്കും.

ഒരുപാട് വർഷത്തെ കാത്തിരിപ്പാണ്. നിർമാണ പ്രവൃത്തി നടക്കുന്നത് കാണുമ്പോൾ സന്തോഷമുണ്ട്. ബ്രിട്ടീഷുകാരുടെ കാലത്ത് നിർമിച്ചതാണ് ലോക്ക്. എഴുപതുകളിൽ വഞ്ചികളെ കടത്തിവിടുന്നതിനായി ലോക്ക് ലേലംചെയ്തെടുത്തിട്ടുണ്ട്. പാലം പൂർത്തിയാകുമ്പോൾ നാടിന്റെ മുഖഛായ മാറും.
വളപ്പിൽ യൂസഫ്