8253 പേർക്ക്‌ 
തൊഴിൽ

മലപ്പുറം

വിജ്ഞാന കേരളം മിഷൻ കുടുംബശ്രീയുമായി സഹകരിച്ച് നടത്തിയ പ്രാദേശിക തൊഴിൽ മേളകൾവഴി ജില്ലയിൽ തൊഴിൽ ലഭിച്ചത്‌ 8253 പേർക്ക്‌. തൊഴിൽമേളകൾവഴി 7,591 പേർക്കും കുടുംബശ്രീ നേരിട്ട്‌ 662 പേർക്കും തൊഴിൽ നൽകി. 101 തൊഴിൽ മേളകൾ സംഘടിപ്പിച്ച്‌ ജില്ല സംസ്ഥാനതലത്തിൽ ഒന്നാമതായി. 25,569 പേർ മേളകളിൽ പങ്കെടുത്തു. 5602 പേർ ചുരുക്കപ്പട്ടികയിൽ ഇടംപിടിച്ചു. 1729 തൊഴിൽദാതാക്കളും പങ്കെടുത്തു. അഭ്യസ്തവിദ്യരായ 20 ലക്ഷം യുവജനങ്ങൾക്ക് സ്വകാര്യ മേഖലയിൽ തൊഴിൽ ലഭ്യമാക്കാൻ ലക്ഷ്യമിട്ട്‌ രൂപീകരിച്ച കേരള നോളജ് ഇക്കോണമി മിഷൻ പുതുചരിത്രം രചിക്കുകയാണ്‌. വിജ്ഞാനകേരളം പദ്ധതിവഴി നാല് മേഖലകളിലായാണ് പ്രവർത്തനം. പഠനം കഴിഞ്ഞവർക്ക് നൈപുണി പരിശീലനം നൽകി തൊഴിൽ ലഭ്യമാക്കുക, ഉന്നത വിദ്യാഭ്യാസ സ്ഥാപനങ്ങളിലെ അവസാന വർഷ വിദ്യാർഥികൾക്ക് നൈപുണി പരിശീലനം നൽകി തൊഴിൽ നൽകുക, കുടുംബശ്രീയുമായി സഹകരിച്ച് പ്രാദേശിക തൊഴിൽ മേളകൾവഴി സ്‌ത്രീകൾക്ക്‌ തൊഴിൽ നൽകുക, ഗൾഫ് മേഖലയിൽ തൊഴിൽ മേളകൾ നടത്തി പ്രവാസികൾക്ക്‌ അവസരമൊരുക്കുക എന്നിവയാണ്‌ ലക്ഷ്യം. ബ്ലോക്കുകളിലും നഗരസഭകളിലും സജ്ജമാക്കിയ ജോബ് സ്റ്റേഷനുകളും പഞ്ചായത്ത് കുടുംബശ്രീ സിഡിഎസുകളിലെ തൊഴിൽ കേന്ദ്രങ്ങളും മുഖേനയാണ് പ്രവർത്തനം. ജോയിന്റ് ബിഡിഒമാരുടെയും നഗരസഭാ സെക്രട്ടറിമാരുടെയും നേതൃത്വത്തിലാണ് ജോബ് സ്റ്റേഷനുകൾ പ്രവർത്തിക്കുന്നത്. കുടുംബശ്രീ ബ്ലോക്ക് കോ–ഓർഡിനേറ്റർമാർ, കില തീമാറ്റിക് എക്സ്പെർട്ടുമാർ, ആർജിഎസ്‌എ കോ–ഓർഡിനേറ്റർമാർ, കില റിസോഴ്സ് പേഴ്സന്മാർ എന്നിവർ ജോബ് സ്റ്റേഷൻ അംഗങ്ങളാണ്. മുഴുവൻസമയ ഇന്റേണിനെയും ജോബ് സ്റ്റേഷനിൽ നിയമിച്ചിട്ടുണ്ട്. നിലവിൽ 20 ജോബ് സ്റ്റേഷനുകളിലായി 23 ഇന്റേൺമാർ പ്രവർത്തിക്കുന്നുണ്ട്. ​യുവജനങ്ങൾക്ക്‌ പ്രതീക്ഷ തൊഴിൽ മേളകളെ യുവതീ യുവാക്കൾ പ്രതീക്ഷയോടെയാണ്‌ കാണുന്നത്‌. ഐടിഐ, പോളിടെക്നിക്‌ തുടങ്ങിയ സാങ്കേതിക വിദ്യാഭ്യാസ സ്ഥാപനങ്ങളിൽ സംഘടിപ്പിക്കുന്ന ‘ബാക്ക്‌ ടു ക്യാമ്പസ്‌’ പദ്ധതിയിൽ ഐടിഐയിൽ 1580 ഉം പോളിടെക്നിക്കുകളിൽ 537 ഉം ഉൾപ്പെടെ 2,117 പൂർവവിദ്യാർഥികൾ ജില്ലയിൽ രജിസ്റ്റർചെയ്തിട്ടുണ്ട്. ഇവർക്കായി ഓറിയന്റേഷൻ പരിശീലനം നടക്കും. ജനുവരിയിൽ തൊഴിൽ മേളകളും സംഘടിപ്പിക്കും. ആർട്സ് ആൻഡ്‌ സയൻസ് കോളേജുകൾ കേന്ദ്രീകരിച്ച് നൈപുണി പരിശീലനത്തിനായുള്ള അവസാന വർഷ വിദ്യാർഥികളുടെ രജിസ്ട്രേഷനും നടക്കുന്നു.