26 May Tuesday

കൊറോണയെ പടിക്കുപുറത്തു നിര്‍ത്തി ഉത്തരകൊറിയ

വെബ് ഡെസ്‌ക്‌Updated: Friday Apr 3, 2020

പ്യോങ്‌യാങ്‌ > ലോകം കോവിഡ് ഭീതിയില്‍ വീര്‍പ്പുമുട്ടുമ്പോള്‍ കൊറോണ വൈറസിനെ പൂര്‍ണമായി പടിക്കുപുറത്ത് നിര്‍ത്തി ഉത്തര കൊറിയ. തൊട്ടടുത്തുള്ള ചൈനയില്‍ ജനുവരിയില്‍ രോഗം റിപ്പോര്‍ട്ട് ചെയ്തപ്പോള്‍ത്തന്നെ ശക്തമായ നിയന്ത്രണങ്ങള്‍ ഏര്‍പ്പെടുത്തി അതിര്‍ത്തി അടച്ചതാണ് രാജ്യത്തെ കോവിഡ് മുക്തമാക്കിയത്.

രാജ്യത്തെ അണുവിമുക്തമാക്കാനുള്ള നടപടികള്‍ പൂര്‍ണവിജയം വരിച്ചെന്നും ഒറ്റ പൗരനുപോലും രോഗബാധ ഉണ്ടായില്ലെന്നും ഉത്തര കൈാറിയയുടെ പകര്‍ച്ചവ്യാധിവിരുദ്ധ ഏജന്‍സി തലവന്‍ പാക് മ്യോങ് സു എഎഫ്പിയോട് പ്രതികരിച്ചു. ശാസ്ത്രീയവും കര്‍ശനവുമായിരുന്നു പകര്‍ച്ചവ്യാധിനിയന്ത്രണ പ്രവര്‍ത്തനം. രാജ്യത്തെത്തിയ വിദേശികളടക്കം ആയിരക്കണക്കിനാളുകളെ ഏകാന്തനിരീക്ഷണത്തിലാക്കി. അതിര്‍ത്തി കടന്നെത്തിയ എല്ലാ ചരക്കുകളും കൃത്യമായി അണുവിമുക്തമാക്കി. ആകാശ-–-സമുദ്ര–--കര സഞ്ചാരമര്‍ഗങ്ങളെല്ലാം അടച്ചിട്ടു.

തൊട്ടുചേര്‍ന്നുള്ള ദക്ഷിണ കൊറിയയില്‍ പതിനായിരത്തോളംപേര്‍ രോഗികളാകുകയും ഇരുനൂറോളം ജീവന്‍ അപഹരിക്കപ്പെടുകയും ചെയ്തപ്പോഴും ഉത്തര കൊറിയയ്ക്ക് മുന്നില്‍ വൈറസ് മുട്ടുമടക്കി. എന്നാല്‍, ഉത്തര കൊറിയയുടെ അവകാശവാദത്തെ  പാശ്‌ചാത്യരാജ്യങ്ങള്‍ തയ്യാറായിട്ടില്ല.

ആഫ്രിക്കയിൽ  കോവിഡ്‌ ഇല്ലാത്ത 5 രാജ്യങ്ങൾ

ആഫ്രിക്ക > ആഫ്രിക്കൻ ഭൂഖണ്ഡത്തിൽ കോവിഡ്‌ ബാധിതരുടെ എണ്ണം 6400 പിന്നിട്ടു. അതിൽ 500ൽ അധികം പേർക്ക്‌ രോഗം ഭേദമായി. 229പേർ മരിച്ചു. ദക്ഷിണാഫ്രിക്കയിലാണ്‌ രോഗികൾ കൂടുതൽ–-1380 പേർ. ഇതുവരെ 49 ആഫ്രിക്കൻ രാജ്യങ്ങളിലാണ്‌ രോഗം സ്ഥിരീകരിച്ചത്‌. അഞ്ച്‌ രാജ്യങ്ങളിൽ കോവിഡ്‌ റിപ്പോർട്ട്‌ ചെയ്തിട്ടില്ല. മധ്യ ആഫ്രിക്കയിലെ സാവോ ടോം ആൻഡ്‌ പ്രിൻസിപ്പി, ദക്ഷിണ ആഫ്രിക്കയിലെ മലാവി, കോമോറോസ്‌, ലൊസേതോ, കിഴക്കൻ ആഫ്രിക്കയിലെ ദക്ഷിണ സുഡാൻ എന്നീ രാജ്യങ്ങളിലാണ്‌ ഇതുവരെ കോവിഡ്‌ സ്ഥിരീകരിക്കാത്തത്‌.

മറ്റു വാർത്തകൾ

പ്രധാന വാർത്തകൾ
 Top