ഗവ. വര്‍ക്കിങ് വിമൻസ് ഹോസ്റ്റൽ തുറന്നു

കെട്ടിടനിർമാണത്തിൽ സിവിൽ, ഇലക്ട്രിഫിക്കേഷൻ ടെൻഡറുകളെ ഒരുമിപ്പിച്ച് കോമ്പോസിറ്റ് ടെൻഡർ സംവിധാനം നടപ്പാക്കി നിർമാണപ്രവൃത്തികൾ സമയബന്ധിതമായി പൂർത്തിയാക്കുമെന്ന് പൊതുമരാമത്ത്- മന്ത്രി പി എ മുഹമ്മദ് റിയാസ്. കെട്ടിടം നിർമിച്ചശേഷം വൈദ്യുതീകരണത്തിനായി കുത്തിപ്പൊളിക്കുന്ന പ്രവണത സംയുക്ത കരാർ സംവിധാനം നടപ്പാക്കുന്നതിലൂടെ അവസാനിക്കും. പൊതുമരാമത്ത് വകുപ്പിന്റെ നേതൃത്വത്തിൽ നിർമിച്ച വർക്കിങ്‌ വിമൻസ് ഹോസ്റ്റൽ കെട്ടിടം ഉദ്ഘാടനംചെയ്യുകയായിരുന്നു മന്ത്രി.  ഹോസ്റ്റൽ മുറികളുടെ താക്കോൽദാനവും മന്ത്രി നിർവഹിച്ചു. എം മുകേഷ് എംഎൽഎ അധ്യക്ഷനായി. മേയർ പ്രസന്ന ഏണസ്റ്റ്, ഡെപ്യൂട്ടി മേയർ കൊല്ലം മധു, ഡിവിഷൻ കൗൺസിലർ എസ് സജിത ആനന്ദ്, പൊതുമരാമത്ത് കെട്ടിടവിഭാഗം ചീഫ് എൻജിനിയർ എൽ ബീന, സിപിഐ എം കൊല്ലം ഏരിയ സെക്രട്ടറി എ എം ഇക്‌ബാൽ തുടങ്ങിയവർ പങ്കെടുത്തു.