22 October Thursday

പരാതിപ്രവാഹം ; കെപിസിസി നേതൃത്വത്തിനെതിരെ അഞ്ച്‌ കോൺഗ്രസ്‌ എംപിമാർ കൂടി; ലീഗിനും ആശങ്ക

പ്രത്യേക ലേഖകൻUpdated: Tuesday Sep 29, 2020



തിരുവനന്തപുരം
ബെന്നി ബഹനാന്റെയും കെ മുരളീധരന്റെയും നാടകീയ രാജിക്ക്‌‌ പിന്നാലെ കെപിസിസി നേതൃത്വത്തിനെതിരെ അഞ്ച്‌ കോൺഗ്രസ്‌ എംപിമാർ കൂടി. ‌പുനഃസംഘടനയ്‌ക്ക്‌ എതിരെ എംപിമാരായ കൊടിക്കുന്നിൽ സുരേഷ്‌, കെ സുധാകരൻ, ആന്റോ ആന്റണി, എം കെ രാഘവൻ, ടി എൻ പ്രതാപൻ എന്നിവർ‌ ഹൈക്കമാൻഡിന്‌ പരാതി നൽകി‌. 

കോൺഗ്രസ്‌ തർക്കത്തിൽ ആശങ്ക പ്രകടമാക്കി മുസ്ലിംലീഗും രംഗത്തുണ്ട്‌‌. ബെന്നി ബഹനാനെ യുഡിഎഫ്‌ കൺവീനർ സ്ഥാനത്തു‌നിന്ന്‌ മാറ്റിയത്‌ ലീഗുമായി‌ ആലോചിച്ചല്ല. ഇക്കാര്യത്തിൽ അതൃപ്‌തി കെപിസിസി നേതൃത്വത്തെ ‌ലീഗ്‌ അറിയിക്കും.

ഗ്രൂപ്പുകൾ തമ്മിലുള്ള വടംവലിക്കൊപ്പം  ഗ്രൂപ്പുകൾക്കുള്ളിലും അമർഷം നീറിപ്പുകയുന്നു‌. കെപിസിസി അധ്യക്ഷൻ മുല്ലപ്പള്ളി രാമചന്ദ്രനെ ലക്ഷ്യമിട്ട്‌ കെ മുരളീധരൻ തുടക്കമിട്ട പടയൊരുക്കം, അഞ്ച്‌ എംപിമാർ കൂടി ചേർന്നതോടെ കൂടുതൽ ശക്തമായി. ഉമ്മൻചാണ്ടിയുടെ പിന്തുണയോടെയാണ്‌ മുരളീധരന്റെ നീക്കമെന്ന്‌‌‌ മുല്ലപ്പള്ളിയുടെ ഒപ്പമുള്ളവർ പറയുന്നു.
രമേശ്‌ ചെന്നിത്തലയുമായി അടുപ്പം പുലർത്തിയതാണ്‌ ബെന്നിക്ക്‌ വിനയായത്‌. ചെന്നിത്തലയുമായി അകന്ന വി ഡി സതീശൻ, കെ മുരളീധരൻ എന്നിവരെ ഉമ്മൻചാണ്ടി വലിച്ചടുപ്പിച്ചത്‌ ഐ ഗ്രൂപ്പിന് ആഘാതമായി‌.

പട്ടിക സംബന്ധിച്ച്‌ തങ്ങളുമായി ചർച്ച നടത്തിയില്ലെന്നാണ്‌‌ കൊടിക്കുന്നിൽ സുരേഷ്‌, കെ സുധാകരൻ എന്നിവരുടെ പരാതി.  മുല്ലപ്പള്ളിയും ചെന്നിത്തലയും ഉമ്മൻചാണ്ടിയും ചേർന്ന്‌ ഭാരവാഹികളെ പങ്കിട്ടെന്ന്‌ ഇവർ ഹൈക്കമാൻഡിന്‌ നൽകിയ കത്തിൽ വ്യക്തമാക്കി. പുനഃസംഘടന ഏകപക്ഷീയമെന്ന്‌ ടി എൻ പ്രതാപനും എം കെ രാഘവനും ആന്റോ ആന്റണിയും പരാതി നൽകി. 

അതിനിടെ യുഡിഎഫ്‌ നേതൃപദവിക്കായുള്ള ചെന്നിത്തല–-ഉമ്മൻചാണ്ടി വടംവലിക്കും‌ തീവ്രതയേറി. ഉമ്മൻചാണ്ടിയെ മുന്നിൽ നിർത്തി പരമാവധി ശക്തി സംഭരിക്കാനുള്ള ശ്രമത്തിലാണ്‌ എ ഗ്രൂപ്പ്‌. ചെന്നിത്തലയെ തക്കം കിട്ടുമ്പോഴൊക്കെ ദുർബലനാക്കുന്ന ചുവടു‌വയ്‌പും ഇവർ നടത്തുന്നു.

അഭിപ്രായവ്യത്യാസമുണ്ട്‌: കെ മുരളീധരൻ
കോഴിക്കോട്‌
മാധ്യമങ്ങൾ ഉള്ളതിനാലാണ്‌ പാർടി കാര്യങ്ങൾ അറിയുന്നതെന്ന്‌ കെ മുരളീധരൻ എംപി. പാർടിയിൽ കൂടിയാലോചനയില്ല.  പ്രവർത്തനത്തിൽ തൃപ്തിയില്ല. പുനഃസംഘടനയിൽ അഭിപ്രായ വ്യത്യാസമുണ്ടെന്നും മുരളീധരൻ പറഞ്ഞു.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..


----
പ്രധാന വാർത്തകൾ
-----
-----
 Top