22 October Thursday

കോൺഗ്രസിൽ കലാപക്കാലം ; നേതൃപദവിയെ ചൊല്ലിയുള്ള കലഹം മൂർച്ഛിക്കുന്നു

കെ ശ്രീകണ‌്ഠൻUpdated: Monday Sep 28, 2020



സോളാർ കേസിൽ സരിതയെ നിയന്ത്രിക്കാൻ നേരിട്ടിറങ്ങി ഉമ്മൻചാണ്ടിയോട്‌ കൂറുതെളിയിച്ചയാളാണ്‌ ബെന്നി ബഹനാൻ. എ ഗ്രൂപ്പും ഉമ്മൻചാണ്ടിയും നിരാകരിച്ചാൽ സ്വമേധയാ പുറത്തുപോകാതെ ബെന്നിക്ക്‌ വേറെ വഴിയില്ല. കെപിസിസി നേതൃത്വത്തിന്‌ മുമ്പിൽ അനുസരണയുള്ള കുട്ടിയായി നിന്നിട്ടും അവഗണനയുടെ നെല്ലിപ്പടി കണ്ടതോടെയാണ്‌ പ്രചാരണ സമിതി അധ്യക്ഷ സ്ഥാനം ഒഴിയാനുള്ള കെ മുരളീധരന്റെ  തീരുമാനം.

യുഡിഎഫ്‌ കൺവീനർ സ്ഥാനം ഒഴിയാനുള്ള തീരുമാനം ഞായറാഴ്‌ച രാവിലെയാണ്‌ ബെന്നി ബഹനാൻ അറിയിച്ചത്‌. എന്നാൽ, കെപിസിസി പ്രചാരണ സമിതി അധ്യക്ഷസ്ഥാനത്തുനിന്നുള്ള രാജിക്കത്ത്‌ ആരെയും അറിയിക്കാതെ കെ മുരളീധരൻ സോണിയ ഗാന്ധിക്ക്‌ നേരിട്ടാണ്‌‌ അയച്ചത്‌. ഇതൊന്നുമറിയാതെ കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ വെറും നോക്കുകുത്തിയായി.

നേതൃപദവിയെ ചൊല്ലിയുള്ള കോൺഗ്രസിലെ കലഹം മൂർച്ഛിക്കുന്നതിനിടെയാണ്‌ രണ്ട്‌ എംപിമാർ തന്നെ നാടകീയ നീക്കങ്ങളുമായി രംഗത്തിറങ്ങിയത്‌. എക്കാലവും ഒപ്പം നിന്ന തന്നെ ഉമ്മൻചാണ്ടി തള്ളിയത്‌ ബെന്നി ബഹനാന് സഹിക്കാവുന്നതിനപ്പുറമാണ്‌. ഇതിന്റെ അലയൊലി എ ഗ്രൂപ്പിനുള്ളിൽ ശക്തമാകും. എതിർ നീക്കങ്ങൾക്ക്‌ ബെന്നി ബഹനാൻ അശക്തനാണെങ്കിലും കെ മുരളീധരൻ അടങ്ങിയിരിക്കില്ല.

കെപിസിസി പ്രചാരണ സമിതി അധ്യക്ഷസ്ഥാനത്ത്‌ അവരോധിച്ചെങ്കിലും കെ മുരളീധരന്‌ കാര്യമായി റോളുണ്ടായിരുന്നില്ല. ഇടയ്‌ക്ക്‌ കെപിസിസി ഓഫീസിൽ വാർത്താസമ്മേളനം നടത്തി പോകാമെന്നല്ലാതെ കൂടിക്കാഴ്‌ചയ്‌ക്കുള്ള അവസരം പോലും മുല്ലപ്പള്ളി രാമചന്ദ്രൻ നൽകിയില്ല. ഏറ്റവും ഒടുവിൽ 96 കെപിസിസി സെക്രട്ടറിമാരെ നിയമിച്ച വേളയിലും കെ മുരളീധരനെ ചെവിക്കൊണ്ടില്ല. ഐ ഗ്രൂപ്പ്‌ ആണെങ്കിലും രമേശ്‌ ചെന്നിത്തലയും പരിഗണന നൽകിയില്ല. ഉമ്മൻചാണ്ടി, ചെന്നിത്തല, മുല്ലപ്പള്ളി എന്നിവർ ചേർന്ന്‌ പദവികൾ വീതംവച്ചുവെന്നാണ്‌ കെ മുരളീധരന്റെ പരാതി.

ഉമ്മൻചാണ്ടിയുടെ വിശ്വസ്‌തനായതിന്റെ പേരിൽ കെപിസിസി പ്രസിഡന്റായിരുന്ന വി എം സുധീരൻ കരിമ്പട്ടികയിൽപ്പെടുത്തിയ ആളാണ്‌ ബെന്നി ബഹനാൻ. സോളാർ കേസിൽ ആരോപണ നിഴലിലായതിന്റെ പേരിൽ നിയമസഭാ സ്ഥാനാർഥി പട്ടികയിൽനിന്ന്‌ സുധീരൻ വെട്ടി. 

വി എം സുധീരന്‌ പകരം എം എം ഹസൻ കെപിസിസി അധ്യക്ഷസ്ഥാനത്ത്‌ വന്നു. മുല്ലപ്പള്ളിക്ക്‌ വേണ്ടി എം എം ഹസനെ ഒഴിവാക്കിയപ്പോൾ രൂപം നൽകിയ പാക്കേജ്‌ അനുസരിച്ചാണ്‌ ബെന്നി ബഹനാൻ യുഡിഎഫ്‌ കൺവീനർ പദവിയിലെത്തിയത്‌. ഈ പാക്കേജിന്റെ ഭാഗമായി വർക്കിങ്‌ പ്രസിഡന്റുമാരായ കെ സുധാകരൻ, കൊടിക്കുന്നിൽ സുരേഷ്‌ എന്നിവർക്ക്‌ ഒരു ഇളക്കവും തട്ടിയില്ല. തന്നെമാത്രം ബലിയാടാക്കുന്നതിലെ യുക്തി എന്തെന്ന്‌ ബെന്നി ചോദ്യമുയർത്തിയെങ്കിലും ആരും ചെവിക്കൊണ്ടില്ല.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

മറ്റു വാർത്തകൾ

----
പ്രധാന വാർത്തകൾ
-----
-----
 Top