20 October Tuesday

ന്യായവില നിഷേധം നീതികേട്‌ ; കർഷകനെ കുത്തകകളുടെ ആശ്രിതരാക്കും: എസ്‌ ആർ പി

വെബ് ഡെസ്‌ക്‌Updated: Friday Sep 25, 2020


തിരുവനന്തപുരം
കേന്ദ്ര സർക്കാർ പാസാക്കിയെന്ന്‌ അവകാശപ്പെടുന്ന മൂന്ന്‌ കാർഷികനിയമങ്ങൾ കർഷകരെ കുത്തകകളുടെ ആശ്രിതരാക്കി മാറ്റുമെന്ന്‌ അഖിലേന്ത്യാ കിസാൻസഭാ വൈസ്‌ പ്രസിഡന്റ്‌ എസ്‌ രാമചന്ദ്രൻപിള്ള. കൃഷിക്കാരൻ എന്ന പദം ഇല്ലാതാകും. അവർ ജോലിക്കാർ മാത്രമാകും. രാജ്യത്തെ ജനസംഖ്യയുടെ അറുപത്‌ ശതമാനത്തിലേറെ ജനങ്ങളെയാണ്‌ കൃഷിയിടങ്ങളിൽനിന്ന്‌ ഇറക്കിവിടുന്നത്‌. കർഷകനൊപ്പം കർഷകത്തൊഴിലാളികളും അനാഥരാകും. കർഷകദ്രോഹ ബില്ലുകൾക്കെതിരെ ദേശവ്യാപകമായി നടക്കുന്ന പ്രക്ഷോഭങ്ങളുടെ ഭാഗമായി രാജ്‌ഭവനുമുന്നിൽ സംയുക്ത കർഷകസമരസമിതിയുടെ സത്യഗ്രഹം ഉദ്‌ഘാടനം ചെയ്യുകയായിരുന്നു എസ്‌ ആർ പി. 

ഭരണഘടനാ വിരുദ്ധമായ നടപടികളിലൂടെയാണ്‌ കർഷകദ്രോഹ ബില്ലുകൾ പാസാക്കിയത്‌. കൃഷിയും കാർഷിക കമ്പോളവും സംസ്ഥാന വിഷയമാണ്‌. ഇവയിന്മേലുള്ള സംസ്ഥാനാവകാശം കവർന്നാണ്‌ കേന്ദ്ര നിയമനിർമാണം. ഇല്ലാത്ത അധികാരം ജനങ്ങൾക്കുമേൽ അടിച്ചേൽപ്പിക്കാൻ പാർലമെന്റിനെയും ദുരുപയോഗം ചെയ്‌തു. പാർലമെന്റിന്റെ ജനാധിപത്യ അധികാരങ്ങളെല്ലാം കവർന്നു. പാർലമെന്ററി നടപടിക്രമങ്ങളെ ധിക്കരിച്ചു. സംസ്ഥാനങ്ങൾക്ക് കർഷകരെ സഹായിക്കാൻ കഴിയുന്ന പരിമിതമായ സാധ്യതകളും ഇതിലൂടെ ഇല്ലാതാക്കി.

പുതിയ നിയമനിർമാണത്തിലൂടെ കർഷകന്റെ ന്യായവില ആവശ്യവും, ഉൽപ്പാദനച്ചെലവും അതിന്റെ അമ്പത്‌ ശതമാനവും ചേർന്ന സംഭരണവിലയെന്ന ആവശ്യവും നിഷേധിക്കപ്പെടും.  ഉൽപ്പാദനച്ചെലവിലെ വർധനയിലൂടെ നിലംപരിശായ കർഷകനെ മരണകിടക്കയിലേക്ക്‌ ആട്ടിത്തെളിക്കും. എന്നിട്ടും കള്ളം ആവർത്തിച്ച്‌ കബളിപ്പിക്കൽ തുടരുകയാണ്‌ പ്രധാനമന്ത്രി. ഇതിനെതിരായ കരുത്തുറ്റ സമരങ്ങളാണ്‌ രാജ്യമാകെ ഉയരുന്നത്‌. ഇതിൽ ഒരു വിഭാഗത്തിനും മാറിനിൽക്കാനാകില്ല. കണ്ണടയ്‌ക്കുന്നവർ കടുത്ത ജനവഞ്ചകരായി അറിയപ്പെടും. കർഷകർക്കൊപ്പം തൊഴിലാളികളും യുവാക്കളും വിദ്യാർഥികളും  ഇപ്പോൾ മഹിളകളുമൊക്കെ പ്രക്ഷോഭ രംഗത്തിറങ്ങിക്കഴിഞ്ഞുവെന്നും എസ്‌ ആർ പി പറഞ്ഞു.
 


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

മറ്റു വാർത്തകൾ

----
പ്രധാന വാർത്തകൾ
-----
-----
 Top