19 October Saturday

സോറി... ഇനിയില്ല ; വിക്രം ലാൻഡർ വിസ്‌മൃതിയിലേക്ക്‌

ദിലീപ്‌ മലയാലപ്പുഴUpdated: Sunday Sep 22, 2019



തിരുവനന്തപുരം
ചന്ദ്രനിൽ രാത്രിയായതോടെ വിക്രം ലാൻഡർ വിസ്‌മൃതിയിലേക്ക്‌.  അതിശൈത്യവും തുടങ്ങിയതിനാൽ ലാൻഡറിലെ ഉപകരണങ്ങളെ ഉണർത്താനുള്ള ശ്രമം ഐഎസ്‌ആർഒ ഉപേക്ഷിച്ചു. ചാന്ദ്രയാൻ–-2 ദൗത്യത്തിലെ  വിക്രം ലാൻഡറിന്റെ ഇറക്കം പാളിയെങ്കിലും ഓർബിറ്റർ കറക്കം തുടരുകയാണ്‌.

കഴിഞ്ഞ ഏഴിന്‌ പുലർച്ചെയാണ്‌ സോഫ്‌റ്റ്‌ലാൻഡിങ്ങിനിടെ നിയന്ത്രണംവിട്ട്‌ വിക്രം ലാൻഡർ ചന്ദ്രന്റെ ദക്ഷിണ ധ്രുവത്തിൽ ഇടിച്ചിറങ്ങിയത്‌.  മണിക്കൂറിൽ 300 കിലോമീറ്ററോളം വേഗത്തിൽ താഴേക്ക്‌ പതിച്ച ലാൻഡറുമായി ആശയവിനിമയം പുനഃസ്ഥാപിക്കാനുള്ള സാധ്യത അഞ്ചു ശതമാനം മാത്രമായിരുന്നു.

ഇതിനായുള്ള തീവ്രശ്രമം കഴിഞ്ഞ രണ്ടാഴ്‌ചയായി ഐഎസ്‌ആർഒ നടത്തി. ബംഗളൂരുവിലെ മിഷൻ കൺട്രോൾ സെന്ററിൽനിന്ന്‌ ചന്ദ്രനെ ചുറ്റുന്ന ഓർബിറ്ററിൽനിന്ന്‌ തുടർച്ചയായി സന്ദേശങ്ങൾ നൽകിയെങ്കിലും വിക്രം പ്രതികരിച്ചില്ല.

വീഴ്‌ചയുടെ ആഘാതത്തിൽ ഉപകരണങ്ങളെല്ലാം നശിച്ചതായാണ്‌  നിഗമനം.  ഇറങ്ങാൻ നിശ്ചയിച്ച സ്ഥലത്തിന്‌ മീറ്ററുകൾക്കപ്പുറം ലാന്റർ വീണുകിടക്കുന്ന ചിത്രം ഓർബിറ്റർ പകർത്തിയെങ്കിലും വ്യക്തതയില്ലായിരുന്നു. വ്യക്തമായ ചിത്രം ലഭ്യമാക്കാനുള്ള നാസയുടെ ശ്രമവും വിജയിച്ചില്ല.


പ്രധാന വാർത്തകൾ
 Top