20 August Tuesday

എല്ലാം മനോരമയ്ക്കറിയാം; പക്ഷെ മിണ്ടൂല്ല: യുഡിഎഫിനെ വെള്ള പൂശാന്‍ പാലാരിവട്ടം പേജുമായി മനോരമ

വെബ് ഡെസ്‌ക്‌Updated: Saturday Jul 13, 2019

കൊച്ചി> യുഡിഎഫ് ഭരണത്തിലെ  ഖജനാവ് കൊള്ളയുടെ സ്മാരകമായി മാറിയ പാലാരിവട്ടം മേൽപ്പാല നിർമാണത്തിൽ ഉമ്മൻചാണ്ടിയെയും ഇബ്രാഹിം കുഞ്ഞിനേയും രക്ഷിയ്ക്കാന്‍ സ്പെഷ്യല്‍ പേജുമായി മലയാള മനോരമ. പാലം പണിയിലെ അഴിമതി നാടാകെ ചര്‍ച്ചയാകുകയും എല്‍ഡിഎഫ് ശക്തമായ പ്രചാരണം നടത്തുകയും ചെയ്തതോടെയാണ് മനോരമയുടെ രക്ഷാ ദൗത്യം.

പാലത്തിന്റെ നിര്‍മാണത്തിന്റെ നാൾവഴികൾ ഉൾപ്പെടുത്തി ചിത്രങ്ങളും വരകളും രേഖാചിത്രങ്ങളും ഒക്കെയായാണ് ഫുൾ പേജ് വാർത്ത.. എന്നാൽ പാലം പണിതത് ആരുടെ കാലത്തെന്നോ അതുമായി ബന്ധപെട്ട് ഇടപെട്ടിട്ടുള്ള ഉമ്മൻ ചാണ്ടിയുടെയോ ഇബ്രാഹിം കുഞ്ഞിന്റെയോ പേരോ ഒരിടത്തുപോലും പരാമർശിക്കാതെയാണ്  മനോരമ വാർത്ത നൽകിയത്.  ആകെ നൽകിയിട്ടുള്ള  പേര് പാലം ഉദ്‌ഘാടനം ചെയ്ത മുഖ്യമന്ത്രി പിണറായി വിജയന്റേത്  മാത്രം. പാലം പണിതതിന്റെയും ക്രമക്കേട് നടന്നതിന്റെയും ഉത്തരവാദിത്വം എൽഡിഎഫ് സർക്കാരിന്റെയും മുഖ്യമന്ത്രിയുടെയും തലയിൽ കെട്ടിവെക്കാനുള്ള ഒളിയമ്പുമായാണ് മനോരമയുടെ ഈ ഫുള്‍ പേജെന്നു വ്യക്തം.



യുഡിഎഫ് സർക്കാർ കേരളം ഭരിക്കുന്ന കാലത്താണ് പാലം പണി തുടങ്ങിയതെന്നും അതിനു കരാർ കൊടുത്തത് ആന്ന് മുഖ്യമന്ത്രി ആയിരുന്ന ഉമ്മൻചാണ്ടിയും, പൊതുമരാമത്ത് മന്ത്രി ആയിരുന്ന ഇബ്രാഹിം കുഞ്ഞാണെന്നുമുള്ള വസ്തുത നാൾവഴികളിൽ മനോരമ മറച്ചുവെക്കുന്നുണ്ട്. ദേശീയ പാത അതോറിറ്റി പാലം നിർമാണം ഏറ്റെടുക്കില്ലെന്ന് പറയാത്ത സാഹചര്യത്തിൽ സംസ്ഥാന സർക്കാർ എന്തിനു പാലം പണി ഏറ്റെടുത്തവെന്നും അതിൽ നടന്നിട്ടുള്ള അഴിമതി ഉൾപ്പെടെയുള്ള കാര്യങ്ങളിൽ അന്വേഷണം നടക്കുന്ന കാര്യവും മനോരമ അറിഞ്ഞുവെങ്കിലും യുഡിഎഫ് നേതാക്കളുടെ പേരുകൾ അവിടെയും ഉൾപ്പെടുത്താതിരിക്കാൻ മനോരമ ശ്രദ്ധിച്ചു.

ഇ ശ്രീധരന്റെ റിപ്പോർട്ട് ആസ്പദമാക്കി ഒന്നാം പേജിൽ കൊടുത്ത "പാലാരിവട്ടം പാലം മൂന്നിലൊന്ന് പൊളിക്കണം' എന്ന തലകെട്ടിൽ ഒരു വാര്‍ത്ത ഇന്ന് കൊടുത്തിട്ടുണ്ട്. പാലം പരിശോധിച്ച ശേഷമുള്ള ശ്രീധരന്റെ റിപ്പോർട്ടും തുടർന്നുള്ള നടപടി ക്രമങ്ങളുമാണ് വാർത്തയുടെ ഉള്ളടക്കം. ഇതിന്റെ തുടർച്ചയായാണ് അകത്ത് യുഡിഎഫിനെ വെള്ളപൂശാനുള്ള ഫുള്‍ പേജ്.


പ്രധാന വാർത്തകൾ
 Top