14 April Wednesday

വി ആകൃതി വളർച്ച ഒരു കൺകെട്ട് - ജോർജ് ജോസഫ് എഴുതുന്നു

ജോർജ് ജോസഫ്Updated: Tuesday Apr 6, 2021

തകർച്ചയിലാണ്ടുകിടക്കുന്ന ഇന്ത്യൻ സമ്പദ്‌വ്യവസ്ഥ അടുത്ത സാമ്പത്തികവർഷത്തിൽ 11 ശതമാനം വളർച്ച കൈവരിച്ച്, വി ആകൃതിയിലുള്ള ഒരു വമ്പൻ കുതിപ്പ് നടത്തുമെന്നാണ് കേന്ദ്രധനമന്ത്രി നിർമല സീതാരാമൻ പറയുന്നത്. എന്നാൽ, നാഷണൽ സ്റ്റാറ്റിസ്റ്റിക്കൽ ഓഫീസ് (എൻഎസ്ഒ) നടപ്പ് സാമ്പത്തികവർഷത്തെ മൂന്നാംപാദത്തിലെ ജിഡിപി വളർച്ചയുടെ കണക്ക് പ്രസിദ്ധീകരിച്ചിട്ടുണ്ട്. നാലാം പാദത്തെ സംബന്ധിച്ച ചില നിഗമനങ്ങളും നടത്തിയിട്ടുണ്ട്. ഈ കണക്കുകളൊന്നും നിർമല സീതാരാമന്റെയോ കേന്ദ്ര സർക്കാരിന്റെയോ അവകാശവാദങ്ങളുമായി പൊരുത്തപ്പെട്ടു പോകുന്നില്ല എന്നതാണ് വസ്തുത. 2020 ഒക്ടോബർമുതൽ ഡിസംബർവരെ നീളുന്ന മൂന്നാം പാദത്തിൽ ഇന്ത്യ നേടിയ വളർച്ച കേവലം 0.4 നാലു ശതമാനമാണ്.

നടപ്പ് സാമ്പത്തികവർഷത്തിന്റെ രണ്ടു പാദത്തിൽ ഉണ്ടായ യഥാക്രമം - 24.9, - 7.5 ശതമാനം എന്ന നിരാശാജനകമായ അവസ്ഥയിൽനിന്ന്‌ നെല്ലിടയ്ക്കുള്ള പോസിറ്റീവ് വളർച്ച മൂന്നാം പാദത്തിൽ പ്രകടമാക്കിയതായി കാണാമെങ്കിലും ശുഭോദർക്കമായ മറ്റൊരു മാറ്റവും ഇന്ത്യൻ സമ്പദ്ഘടനയിൽ ഉണ്ടായിട്ടില്ലെന്ന് എൻഎസ്ഒ പുറത്തുവിട്ടിരിക്കുന്ന ഏറ്റവും പുതിയ സ്ഥിതിവിവര കണക്കുകൾ വ്യക്തമാക്കുന്നു. രണ്ടാം പാദത്തിലും മൂന്നാം പാദത്തിലും സർക്കാർ ചെലവുകളിൽ ഉണ്ടായ ഇടിവാണ് വാസ്തവത്തിൽ ഇന്ത്യയുടെ സാമ്പത്തികരംഗത്തെ ഇത്ര പ്രതികൂലമായ സാഹചര്യത്തിലേക്ക് നയിച്ചത്. രണ്ടാം പാദത്തിൽ കേന്ദ്ര സർക്കാരിന്റെ കൺസ്യൂമർ മേഖലയിലെ ചെലവ് 24 ശതമാനം കണ്ട് കുറഞ്ഞു. മൂന്നാം പാദത്തിൽ 1.1 ശതമാനവും കുറഞ്ഞു. വാസ്തവത്തിൽ ഗവൺമെന്റ് ചെലവുകൾ ഗണ്യമായി ഉയർത്തേണ്ട ഈ പ്രതികൂല സാഹചര്യത്തിലും ചെലവുകൾ കുറയുന്ന പ്രവണതയാണ് പ്രകടമാക്കിയിരിക്കുന്നത്. ഇത് വളർച്ചയെ ഏറെ പ്രതികൂലമായി ബാധിച്ച ഒരു ഘടകമാണ്. നടപ്പ് സാമ്പത്തികവർഷത്തിന്റെ നാലാം പാദത്തിൽ (ജനുവരി–--മാർച്ച്) വീണ്ടും നെഗറ്റീവ് വളർച്ചയിലേക്ക് നീങ്ങുമെന്നാണ് എൻഎസ്ഒയുടെ നിഗമനം. ജനുവരി–-മാർച്ച് നാലാം പാദത്തിൽ ജിഡിപി വളർച്ച - 1. 1 ആകുമെന്നാണ് നിഗമനം. ഇത് സാധിതമാകുമോ എന്ന കാര്യത്തിലും സംശയമുണ്ട്. കാരണം, എൻഎസ്ഒ വ്യക്തമാക്കിയിരിക്കുന്നത് വളർച്ച 1. 1 ശതമാനം എന്ന തോതിൽ എത്തണമെങ്കിൽ സർക്കാർ ചെലവുകൾ 29. 2 ശതമാനം ഉയരണമെന്നാണ്. രണ്ടും മൂന്നും പാദങ്ങളിലെ അനുഭവങ്ങളുടെ അടിസ്ഥാനത്തിൽ നോക്കുമ്പോൾ ഇത് അസംഭവ്യമെന്ന് വിലയിരുത്താനേ കഴിയൂ.

ഏറ്റവും പുതിയ ഈ കണക്കുകളുടെ അടിസ്ഥാനത്തിൽ 2020–-21 സാമ്പത്തികവർഷത്തെ ജിഡിപി വളർച്ച - എട്ട്‌ ശതമാനത്തിലേക്ക് കൂപ്പുകുത്തുമെന്ന് എൻഎസ്ഒ വ്യക്തമാക്കുന്നു. നേരത്തേ അനുമാനിച്ചിരുന്നത് - 7. 7 ശതമാനമായിരുന്നെങ്കിൽ കാര്യങ്ങൾ അതിനേക്കാൾ മോശമാകുന്നുവെന്നാണ് പുതിയ കണക്കുകളിൽനിന്ന് വ്യക്തമാകുന്നത്.

ഇത്തരമൊരു സാമ്പത്തികപരിതസ്ഥിതിയിൽ 2021-- –-22 സാമ്പത്തികവർഷത്തിൽ 11 ശതമാനം പോസിറ്റീവ് വളർച്ച ഉണ്ടാകുമെന്നും വി ആകൃതിയിലുള്ള വലിയ കുതിപ്പ് ഇന്ത്യൻ സമ്പദ്ഘടന കൈവരിക്കുമെന്നും പറയുന്നത് യുക്തിഭദ്രമായ ഒന്നല്ല. വി ആകൃതിയിലുള്ള വളർച്ച, 11 ശതമാനം ജിഡിപി വളർച്ച എന്നൊക്കെ പത്രത്തലക്കെട്ടുകൾക്കുവേണ്ടി വായ്ത്താരി നടത്താമെന്നല്ലാതെ ഇതിൽ പ്രായോഗിക സാമ്പത്തികയുക്തി മരുന്നിനുപോലുമില്ല എന്നതാണ് വാസ്തവം.

ലോക ബാങ്കിന്റെ അവലോകനപ്രകാരം 2020ൽ ആഗോള സാമ്പത്തികരംഗം 4. 3 ശതമാനം ഇടിവ് രേഖപ്പെടുത്തിയതായി കാണാം. 2018 മുതൽ തുടരുന്ന ചാക്രിക സാമ്പത്തികമാന്ദ്യവും അശനിപാതംപോലെ വന്ന കോവിഡ് മഹാമാരിയുമാണ് ഇതിന് കാരണം

ആഗോളതലത്തിലെ സ്ഥിതിവിവരക്കണക്കുകളുടെ അടിസ്ഥാനത്തിൽക്കൂടി ഇത് പരിശോധിക്കുമ്പോൾ ഈ കൺകെട്ട് വിദ്യ കൂടുതൽ ബോധ്യമാകും. ലോക ബാങ്കിന്റെ അവലോകനപ്രകാരം 2020ൽ ആഗോള സാമ്പത്തികരംഗം 4. 3 ശതമാനം ഇടിവ് രേഖപ്പെടുത്തിയതായി കാണാം. 2018 മുതൽ തുടരുന്ന ചാക്രിക സാമ്പത്തികമാന്ദ്യവും അശനിപാതംപോലെ വന്ന കോവിഡ് മഹാമാരിയുമാണ് ഇതിന് കാരണം. എന്നാൽ, 2021ൽ ആഗോള സാമ്പത്തികരംഗം നാല് ശതമാനം വളരുമെന്നാണ് പ്രതീക്ഷിക്കപ്പെടുന്നത്. 2020ൽ ലോകത്തെ മിക്കവാറും രാജ്യങ്ങൾ നെഗറ്റീവ് വളർച്ചയാണ് രേഖപ്പെടുത്തിയതെന്ന് കാണാം. എന്നാൽ, 2021ൽ ചൈന അഞ്ചു ശതമാനവും അമേരിക്ക 3. 5 ശതമാനവും ജപ്പാൻ 2. 5 ശതമാനവും യൂറോപ് 3. 6 ശതമാനവും വളർച്ച കൈവരിക്കുമെന്നാണ് ലോകബാങ്ക് കണക്കാക്കുന്നത്. ഈ രാജ്യങ്ങളിൽ കോവിഡ് പാക്കേജിന്റെ ഭാഗമായി സർക്കാർ ചെലവുകൾ കുത്തനെ ഉയർത്തിയതാണ് ഇതിന് ഒരു പ്രധാന കാരണം. എന്നാൽ, സർക്കാർ ചെലവുകൾ കടുത്ത പ്രതിസന്ധിയുടെ പശ്ചാത്തലത്തിലും കുറയ്ക്കുന്ന ഇന്ത്യ, 11 ശതമാനം വളർച്ച കൈവരിക്കുമെന്ന് ആവർത്തിച്ച് പറഞ്ഞുറപ്പിക്കാൻ അസാമാന്യമായ തൊലിക്കട്ടി ഏറ്റവും അവശ്യം വേണ്ടതാണ്.

ഇന്ത്യയിൽ ഉപഭോക്‌തൃ ചെലവുകളിൽ ഉണ്ടായ ഭീമമായ ഇടിവ് സാമ്പത്തികമേഖലയിലെ തകർച്ചയുടെ ആഘാതം വർധിപ്പിച്ചിട്ടുണ്ട്. ഒന്നാം പാദത്തിൽ 26. 3 ശതമാനവും രണ്ടാം പാദത്തിൽ 11. 3 ശതമാനവും മൂന്നാം പാദത്തിൽ 2. 4 ശതമാനവും വീതം ഉപഭോക്തൃ ചെലവുകൾ കുറഞ്ഞതായി എൻഎസ്ഒ വ്യക്തമാക്കുന്നു. സർക്കാരിന്റെതന്നെ ഈ കണക്കുകൾ നൽകുന്ന ചിത്രം ഇന്ത്യൻ സമ്പദ്ഘടനയിൽ ആശാവഹമായ മാറ്റം ഉണ്ടാകണമെങ്കിൽ സാമ്പത്തികരംഗത്ത് ക്രിയാത്മകമായ സർക്കാർ ഇടപെടൽ ഉണ്ടാകണമെന്നാണ്. എന്നാൽ, ഇക്കാര്യത്തിൽ ഒട്ടും ആത്മാർഥത കാണിക്കാതെ, വൻകിട മാധ്യമങ്ങളുടെ സഹായത്തോടെ ചില ചെപ്പടിവിദ്യകൾ കാണിച്ച് ജനങ്ങളെ കബളിപ്പിക്കാനാണ് നിർമല സീതാരാമൻ ശ്രമിക്കുന്നത്. ഓഫ് ബജറ്റ് ധനസമാഹരണത്തിനായി ബജറ്റിൽ പ്രത്യേക ഡെവലപ്മെന്റ് ഫിനാൻഷ്യൽ ഇൻസ്റ്റിറ്റ്യൂഷൻ രൂപീകരിക്കുമെന്ന് പ്രഖ്യാപിച്ചശേഷം അവർ കിഫ്ബിയെ പഴിപറയുന്നത് അതിന്റെ ഭാഗമായി കണ്ടാൽ മതി.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



മറ്റു വാർത്തകൾ

----
പ്രധാന വാർത്തകൾ
-----
-----
 Top