20 September Thursday

ആരോഗ്യ ഇന്‍ഷുറന്‍സ് പരിരക്ഷ ടോപ്-അപ് ചെയ്യാം

കെ അരവിന്ദ്Updated: Sunday Aug 30, 2015

വാര്‍ഷികാടിസ്ഥാനത്തില്‍ 8-9 ശതമാനമാണ് പണപ്പെരുപ്പമെങ്കിലും ചികിത്സാച്ചെലവുകളിലെ പെരുക്കം അതിന്റെ രണ്ടിരട്ടിയിലേറെയാണ്. വാര്‍ഷികാടിസ്ഥാനത്തില്‍ ചികിത്സാചെലവുകളിലുണ്ടാകുന്ന വര്‍ധന 15-20 ശതമാനമാണ്. വര്‍ധിക്കുന്ന ചികിത്സാച്ചെലവ് വരുമാനത്തെ കാര്‍ന്നുതിന്നാതിരിക്കാന്‍ ആരോഗ്യ ഇന്‍ഷുറന്‍സ് കൂടിയേ തീരൂവെന്നു മാത്രമല്ല, ചെലവ് കൂടുന്നതിനുസരിച്ച് മതിയായ പരിരക്ഷ ഉറപ്പുവരുത്തുകയും ചെയ്യേണ്ടതുണ്ട്.

അഞ്ചുവര്‍ഷം മുമ്പത്തെ ചികിത്സാച്ചെലവ് ഇപ്പോള്‍ ഇരട്ടിയിലേറെയായിട്ടുണ്ടാകുംസാധാരണനിലയില്‍ കവറേജ് തുക വര്‍ധിപ്പിക്കാനായി മറ്റൊരു ആരോഗ്യ ഇന്‍ഷുറന്‍സ് പോളിസികൂടി എടുക്കുകയാണ് മാര്‍ഗം. അല്ലെങ്കില്‍ നിലവിലുള്ള പോളിസിയുടെ കവറേജ്തുക വര്‍ധിപ്പിക്കാം. രണ്ടായാലും അതിനുസൃതമായി നിങ്ങളുടെ വാര്‍ഷിക പ്രീമിയവും വര്‍ധിക്കും. താരതമ്യേന കുറഞ്ഞ അധിക പ്രീമിയം നല്‍കി കവറേജ് കൂട്ടുന്നതിനുള്ള മറ്റൊരു മാര്‍ഗം ടോപ്-അപ് പോളിസികളാണ്. മറ്റൊരു ആരോഗ്യ ഇന്‍ഷുറന്‍സ് പോളിസി എടുക്കുകയോ കവറേജ്തുക വര്‍ധിപ്പിക്കുകയോ ചെയ്യുന്നതിന് നല്‍കേണ്ട പ്രീമിയം തുകയുടെ ഏകദേശം മൂന്നിലൊന്നു മതിയാകും ടോപ്-അപ് പോളിസികളുടെ പ്രീമിയം.

നിലവിലുള്ള ആരോഗ്യ ഇന്‍ഷുറന്‍സ് പോളിസിയുടെ കവറേജ് അപര്യാപ്തമായിവരുന്ന ഘട്ടങ്ങളിലാണ് ടോപ്-അപ് പോളിസികളുടെ പ്രയോജനം ലഭിക്കുന്നത്. ഉദാഹരണത്തിന് ഒരുലക്ഷം രൂപയുടെ ആരോഗ്യ ഇന്‍ഷുറന്‍സ് കവറേജുള്ള ആളാണ് നിങ്ങളെന്നു കരുതുക. നിങ്ങള്‍ക്ക് 1.25 ലക്ഷം രൂപ ആശുപത്രി ചെലവ് വരികയാണെങ്കില്‍ ഒരുലക്ഷം രൂപ മാത്രമേ ക്ലെയിം ചെയ്യാനാകൂ, ബാക്കി 25,000 രൂപ കൈയില്‍നിന്നു നല്‍കേണ്ടിവരും. അതേസമയം, ടോപ്-അപ് പോളിസിയുണ്ടെങ്കില്‍ അധികംവന്ന 25,000 രൂപയുടെ ക്ലെയിമിനായി ടോപ്-അപ് പോളിസി ഉപയോഗിക്കാം. സാധാരണനിലയില്‍ ഒന്നില്‍ക്കൂടുതല്‍ പോളിസികളുണ്ടെങ്കില്‍ തുക എത്രയായാലും ക്ലെയിം രണ്ടു പോളിസികളിലേക്കുമായിപ്പോകും. അതേസമയം, അടിസ്ഥാന പോളിസിയുടെ കവറേജ് തുകയ്ക്ക് മുകളില്‍ ക്ലെയിംതുക വരികയാണെങ്കില്‍ മാത്രമേ ടോപ്-അപ് പോളിസിവഴി ക്ലെയിം നല്‍കാനാവൂ. ഇതുതന്നെയാണ് സാധാരണ പോളിസിയേക്കാള്‍ ടോപ്-അപ് പോളിസിയുടെ പ്രീമിയംതുക കുറയുന്നതിനുള്ള കാരണം.

കുറഞ്ഞ പ്രീമിയം നല്‍കി അധിക കവറേജ് ഉറപ്പുവരുത്തുന്നതിന് ടോപ്-അപ് പോളിസി സഹായകമാകുന്നു. റൈഡറുകളില്‍നിന്ന് വ്യത്യസ്തമാണ് ടോപ്-അപ് പോളിസികള്‍. സാധാരണ ആരോഗ്യ ഇന്‍ഷുറന്‍സ് പോളിസികള്‍ നല്‍കുന്നതിനു സമാനമായ പരിരക്ഷയാണ് ടോപ്-അപ് പോളിസികള്‍ നല്‍കുന്നത്. പ്രധാന പോളിസിയുടെ കവറേജ് തുകയ്ക്കു മുകളില്‍ ആശുപത്രിച്ചെലവ് വരികയാണെങ്കില്‍ മാത്രമേ ടോപ്-അപ് പോളിസിവഴി ക്ലെയിം നല്‍കാനാകൂ എന്നത് മാത്രമാണ് വ്യത്യാസം. കമ്പനികളുടെ ഗ്രൂപ്പ് ഇന്‍ഷുറന്‍സ് പോളിസികള്‍ക്കു കീഴിലായി ഇന്‍ഷുറന്‍സ് കവറേജുള്ളവര്‍ക്ക് ടോപ്-അപ് പോളിസികള്‍ ഏറെ ഉപയോഗപ്രദമാണ്. ഒരു കമ്പനിയില്‍നിന്നു മറ്റൊരു കമ്പനിയിലേക്ക് മാറുകയും പുതിയ കമ്പനിയില്‍ ഗ്രൂപ്പ് ഇന്‍ഷുറന്‍സ് ലഭിക്കുകയും ചെയ്യുകയാണെങ്കില്‍ നിലവിലുള്ള ടോപ്-അപ് പോളിസി അപ്പോഴും ബേസ് പോളിസിയുടെ ടോപ്-അപ് ആയി ഉപയോഗിക്കാം. പുതിയ കമ്പനി ഗ്രൂപ്പ് ഇന്‍ഷുറന്‍സ് നല്‍കുന്നില്ലെങ്കില്‍ ടോപ്-അപ് പോളിസി സാധാരണ ബേസ് പോളിസിയായി മാറ്റാനുമാകും. ചില ഇന്‍ഷുറന്‍സ് കമ്പനികളുടെ ടോപ്-അപ് പോളിസികള്‍ പോളിസി കാലയളവിലെ വാര്‍ഷികചെലവ് പരിഗണിക്കുന്നതിനു പകരം ഓരോതവണയും വരുന്ന ചികിത്സാചെലവ് പരിഗണിച്ചാണ് ക്ലെയിം അനുവദിക്കുക.

ഉദാഹരണത്തിന് അടിസ്ഥാനപോളിസിയില്‍ ഒരുലക്ഷം രൂപയുടെ കവറേജാണുള്ളതെങ്കില്‍ ഒരു തവണത്തെ ചികിത്സാച്ചെലവ് ഒരുലക്ഷം രൂപയ്ക്കുമുകളില്‍ വരികയാണെങ്കില്‍ മാത്രമേ ടോപ്-അപ് പോളിസിയില്‍ ക്ലെയിം അനുവദിക്കൂ. ഒരുവര്‍ഷം രണ്ടുതവണയായി 50,000 രൂപയുടെയും 75,000 രൂപയുടെയും ചികിത്സാചെലവുകള്‍ വരികയാണെങ്കില്‍ അത്തരം പോളിസികള്‍ ക്ലെയിം അനുവദിക്കില്ല. അതിനാല്‍ വാര്‍ഷികാടിസ്ഥാനത്തിലുള്ള ചികിത്സാച്ചെലവ് പരിഗണിച്ച് ക്ലെയിം അനുവദിക്കുന്ന ടോപ്-അപ് പോളിസികള്‍ തെരഞ്ഞെടുക്കുന്നതാകും ഉചിതം.

ഹെഡ്ജ് ഓഹരി മാസികയുടെ എഡിറ്ററാണ് ലേഖകന്‍.

പ്രധാന വാർത്തകൾ
Top