Top
24
Friday, November 2017
About UsE-Paper

ബാങ്ക് ലയനം ആര്‍ക്കുവേണ്ടി

Monday Jul 17, 2017
ടി നരേന്ദ്രന്‍

ഇന്ത്യന്‍ ബാങ്കുകളുടെ സമൂലമായ പൊളിച്ചെഴുത്തിനാണ് ബാങ്ക് ലയന പദ്ധതിയിലൂടെ കേന്ദ്രസര്‍ക്കാര്‍ ശ്രമിക്കുന്നത്. പൊതുമേഖലാ ബാങ്കുകളുടെ ലയനത്തോടൊപ്പം അവയെ സ്വകാര്യവല്‍ക്കരിക്കാനും സ്വകാര്യ ബാങ്കുകളെ വിദേശവല്‍ക്കരിക്കാനുമാണ്  നീക്കം. ഈ ലക്ഷ്യത്തിലേക്കുള്ള ആദ്യപരീക്ഷണമായിരുന്നു സ്റ്റേറ്റ് ബാങ്ക് ഓഫ് ഇന്ത്യയില്‍ അഞ്ച് അസോസിയറ്റ് ബാങ്കുകളെ ലയിപ്പിച്ച നടപടി. അങ്ങനെയാണ് ലോകത്തിലെ 47-ാമത്തെ വലിയ ബാങ്കെന്ന സ്ഥാനം എസ്ബിഐ നേടിയത്. 2017 ഏപ്രില്‍ ഒന്നു മുതലും ജൂണ്‍ ഒന്നുമുതലും നടപ്പായ സര്‍വീസ് ചാര്‍ജ് പ്രഹരം സാധാരണ ബാങ്കിടപാടുകാര്‍ക്ക് കനത്തതായി. പഴയ അസോസിയറ്റ് ബാങ്ക്ശാഖകളില്‍, വായ്പാവിതരണം അടക്കമുള്ള പ്രവര്‍ത്തനരീതികളൊന്നും ഇപ്പോഴും സുഗമമായിട്ടില്ല. വലിയ ബാങ്കായപ്പോള്‍ ചെറുകിട ഇടത്തരം ഇടപാടുകാരോടുള്ള അവഗണന വര്‍ധിച്ചു. 10,000 രൂപ വരെയുള്ള സ്വര്‍ണപ്പണയ വായ്പ സ്റ്റേറ്റ് ബാങ്ക് ഓഫ് ഇന്ത്യ നിര്‍ത്തി. സമ്പന്നരായ ഇടപാടുകാര്‍ക്ക് വിശിഷ്ടസേവനം ലഭ്യമാക്കുന്ന തിരക്കുകള്‍ക്കിടയില്‍, സാധാരണ ഇടപാടുകാരെ പുറന്തള്ളുകയാണ്. സ്റ്റേറ്റ് ബാങ്ക് ലയന മാതൃകയില്‍, 20 പൊതുമേഖലാ ബാങ്കുകളെ കൂട്ടിച്ചേര്‍ത്ത് അഞ്ച് വലിയ ബാങ്കുകളാക്കാനാണ് അടുത്ത നീക്കം. പഞ്ചാബ് നാഷണല്‍ ബാങ്ക്, ബാങ്ക് ഓഫ് ബറോഡ, യൂണിയന്‍ ബാങ്ക് ഓഫ് ഇന്ത്യ, കനറാ ബാങ്ക്, ബാങ്ക് ഓഫ് ഇന്ത്യ എന്നിവയെ ലീഡര്‍ സ്ഥാനത്ത് പ്രതിഷ്ഠിച്ച് ഇതര ബാങ്കുകളെ ഇവയിലേതെങ്കിലുമൊന്നില്‍ ലയിപ്പിക്കാനാണ് പദ്ധതി. നിതി ആയോഗിന് അതിനനുസരണമായവിധം നിര്‍ദേശവും നല്‍കി.

സ്വകാര്യമേഖലയിലെ ബാങ്ക് ലയന ഒരുക്കങ്ങളും തകൃതിയാണ്്. ഇതിന് നിബന്ധനകളും ചിട്ടവട്ടങ്ങളും താരതമ്യേന കുറവാണ്. സ്വകാര്യ ബാങ്കുകളുടെ ഡയറക്ടര്‍ ബോര്‍ഡുകള്‍ പരസ്പരം ലയിക്കാന്‍ താല്‍പ്പര്യപ്പെട്ടാല്‍ അതിന് അനുമതി നല്‍കുന്ന ചടങ്ങ് മാത്രമേ റിസര്‍വ് ബാങ്കിനും കേന്ദ്രസര്‍ക്കാരിനും നിര്‍വഹിക്കാനുള്ളൂ. ഇന്ത്യയിലെ സ്വകാര്യ ബാങ്കുകളില്‍, മുന്തിയ സ്ഥാനമുള്ള എച്ച്ഡിഎഫ്സി, ഐസിഐസിഐ, കൊടക് മഹീന്ദ്ര ബാങ്ക് എന്നിവയോടൊപ്പം ഇതര സ്വകാര്യ ബാങ്കുകളെ കൂട്ടിച്ചേര്‍ക്കാനാണ് നീക്കം. സ്റ്റേറ്റ് ബാങ്ക് ഓഫ് ഇന്ത്യ പൊതുമേഖലയിലെ വലിയ ബാങ്കായതിനുബദലായി സ്വകാര്യമേഖലയിലും കൂറ്റന്‍ ബാങ്കുണ്ടാക്കുക എന്നതാണ് ലക്ഷ്യം. പ്രവര്‍ത്തനമികവിലും ലാഭ തോതിലും ഇന്ത്യയില്‍ത്തന്നെ മികച്ച നിലയിലുള്ള സ്ഥാപനമാണ് ഫെഡറല്‍ ബാങ്ക്. പക്ഷേ, ഒരു നവസ്വകാര്യ ബാങ്കിന്റെ ഉള്ളടക്കത്തിലേക്ക് ഈ ബാങ്ക് അതിവേഗം നീങ്ങിക്കഴിഞ്ഞു. ആയിരത്തോളം വരുന്ന ഉയര്‍ന്ന ഉദ്യോഗസ്ഥരുടെ ശമ്പളം ഏകപക്ഷീയമായി വര്‍ധിപ്പിച്ചു. ഓരോരുത്തര്‍ക്കും ശരാശരി 50 ശതമാനം പ്രതിമാസ വര്‍ധനയാണ് നല്‍കിയിട്ടുള്ളത്. ബാങ്കിങ് സംവിധാനത്തില്‍ നിലനില്‍ക്കുന്ന വിവിധ തട്ടുകളിലുള്ള മാനേജര്‍ എന്ന തസ്തികയെ പുനര്‍നാമകരണം ചെയ്ത്, നവസ്വകാര്യ ബാങ്കിലേതുപോലെ വൈസ് പ്രസിഡന്റ് എന്നാക്കി. ഇങ്ങനെ മുകള്‍ത്തട്ടിലുള്ളവര്‍ക്ക് ലഭിക്കുന്ന ഉയര്‍ന്ന വേതനത്തെ ചൂണ്ടിക്കാട്ടി, കീഴ്ജീവനക്കാരോടും പുതിയ വേതനസമ്പ്രദായത്തിലേക്ക് വരാന്‍ ആവശ്യപ്പെട്ടിരിക്കുകയാണ്. പണംകൊടുത്ത് ജീവനക്കാരെ മയക്കുകയും വളയ്ക്കുകയുംചെയ്യുന്ന രീതിയാണിത്.

കാത്തലിക് സിറിയന്‍ ബാങ്കിന്റെ 51ശതമാനം ഓഹരികള്‍ കനേഡിയന്‍ കമ്പനിക്ക് നല്‍കാനുള്ള അനുമതിയും നടപടിക്രമങ്ങളും പുരോഗമിക്കുന്നു. ആ ബാങ്കിലെ ജീവനക്കാര്‍ ഇനി മേലാല്‍ ബാങ്കിനെക്കുറിച്ചോ ഉന്നത ഉദ്യോഗസ്ഥരെക്കുറിച്ചോ ഉള്ള ഒരു വിവരവും ഫെയ്സ്ബുക്ക്, വാട്സാപ്, ട്വിറ്റര്‍ എന്നിവിടങ്ങളില്‍ മിണ്ടിപ്പോകരുതെന്നും ഉത്തരവുണ്ട്. സൌത്ത് ഇന്ത്യന്‍ ബാങ്കിലാകട്ടെ, ഇന്റര്‍നാഷണല്‍ ഫിനാന്‍സ് കോര്‍പറേഷന്‍ (ഐഎഫ്സി) മുഖാന്തരം ബാങ്ക് വായ്പകളും ബിസിനസും പുറംകരാര്‍ വ്യവസ്ഥയിലൂടെ നിര്‍വഹിക്കപ്പെടുന്നു. കെടുകാര്യസ്ഥതയും നിക്ഷിപ്ത താല്‍പ്പര്യവുംമൂലം തകര്‍ന്നടിഞ്ഞുകിടക്കുകയാണ് ധനലക്ഷ്മി ബാങ്ക്. ഈ ബാങ്കുകളെല്ലാം അനുയോജ്യമായ ഒരു അവസരത്തില്‍ ഏതെങ്കിലും നവസ്വകാര്യ ബാങ്കില്‍ കടന്നുകൂടാനുള്ള തയ്യാറെടുപ്പിലാണ്. നാടിന്റെ സമ്പദ്വ്യവസ്ഥയിലും ദൈനംദിനജീവിതത്തിലും വന്‍ പ്രത്യാഘാതങ്ങള്‍ ഉണ്ടാക്കുന്ന നടപടിയാണിത്.

കിട്ടാക്കടത്തിന്റെ പേരുപറഞ്ഞാണ് ബാങ്ക് പരിഷ്കരണങ്ങള്‍ക്കുള്ള ന്യായവാദം നിരത്തുന്നത്. കിട്ടാക്കടങ്ങള്‍ ഉണ്ടാകുന്നത്, വായ്പാവിതരണത്തിലെ സമ്പന്ന പക്ഷപാതിത്വം മൂലമാണ്. ചെറുകിട, ഇടത്തരം വായ്പകള്‍ ഇല്ലാതാക്കി വായ്പകള്‍ വമ്പന്‍ കോര്‍പറേറ്റുകളില്‍ കേന്ദ്രീകരിക്കുന്നതാണ് നവലിബറല്‍ കാലത്തെ നയം. ആ വിധത്തില്‍ വായ്പ ലഭിച്ച വിജയ്മല്യയെപ്പോലുള്ളവര്‍ പ്രസ്തുത വായ്പകള്‍ മനഃപൂര്‍വം കുടിശ്ശികയാക്കുകയും അത് ബാങ്കുകളുടെ ലാഭത്തില്‍നിന്ന് എഴുതിത്തള്ളുകയുംചെയ്യുമ്പോഴാണ് ബാങ്കുകള്‍ക്ക് നഷ്ടമുണ്ടാകുന്നത്. 2016-17 സാമ്പത്തികവര്‍ഷത്തില്‍ 20 പൊതുമേഖലാ ബാങ്കുകളുടെ പ്രവര്‍ത്തനലാഭം 98,828 കോടി രൂപയാണ്. അഥവാ ഇന്ത്യയിലെ ബാങ്കുകളെല്ലാം  നല്ല തോതിലുള്ള ബിസിനസ് ലാഭം കൈവരിക്കുന്നുവെന്നര്‍ഥം. എന്നാല്‍, ഈ ലാഭത്തുകയില്‍നിന്ന് കിട്ടാക്കടം എഴുതിത്തള്ളുന്ന സമ്പ്രദായം വന്നപ്പോള്‍ മാത്രമാണ് ബാങ്കുകള്‍ക്കാകെ 8955 കോടി രൂപയുടെ നഷ്ടമുണ്ടായത്. സ്റ്റേറ്റ് ബാങ്ക് ഓഫ് ഇന്ത്യയുള്‍പ്പെടെ ഇന്ത്യയിലെ എല്ലാ ബാങ്കുകളും ചേര്‍ന്നുള്ള 2016-17ലെ പ്രവര്‍ത്തനലാഭം 1,54,000 കോടി രൂപയാണ്. എന്നാല്‍, കിട്ടാക്കടത്തിനായുള്ള തുക കുറവുചെയ്തപ്പോള്‍ അറ്റലാഭം കേവലം 500 കോടിയായി ഇടിഞ്ഞു. ഈ വര്‍ഷം ഏറ്റവും വലിയ നഷ്ടം രേഖപ്പെടുത്തിയ ഐഡിബിഐ ബാങ്ക്പോലും 4710 കോടി രൂപയുടെ പ്രവര്‍ത്തനലാഭം നേടുകയുണ്ടായി. കിട്ടാക്കടതുക മാറ്റിവച്ചപ്പോഴാണ് ആ ബാങ്കിന്റെ നഷ്ടം 5016 കോടി രൂപയായത്. ഇങ്ങനെ ബാങ്കുകളുടെ നഷ്ടകഥകളുടെ പിന്നാമ്പുറം മനസ്സിലാകുമ്പോഴാണ് വഴിപിഴച്ച വായ്പാനയത്തിന്റെ പൊള്ളത്തരം തിരിച്ചറിയുക. റിസര്‍വ് ബാങ്ക് തന്നെ കഴിഞ്ഞദിവസം ഞെട്ടിക്കുന്ന ഒരു കണക്ക് പുറത്തുവിട്ടിട്ടുണ്ട്. 5000 കോടി രൂപയില്‍ കൂടുതല്‍ വായ്പയെടുത്ത് കുടിശ്ശിക വരുത്തിയ 12 കുത്തകകളുടെ കിട്ടാക്കട തുക 1,75,000 കോടി രൂപ വരുമത്രേ! ബാങ്കിങ് വ്യവസായത്തിലെ ആകെ കിട്ടാക്കടത്തിന്റെ നാലിലൊന്ന് വരും ഈ തുക.

ശാഖകള്‍ അടച്ചുപൂട്ടിയും ബാങ്കുകളെ ലയിപ്പിച്ചും ആശയക്കുഴപ്പം ഉണ്ടാക്കി യഥാര്‍ഥ പ്രശ്നനിവാരണത്തില്‍നിന്ന് ഒളിച്ചോടുകയാണ് ഭരണാധികാരികള്‍. ഭിന്നസംസ്കാരങ്ങളും വ്യത്യസ്ത സമ്പ്രദായങ്ങളും നിലനില്‍ക്കുന്ന ബാങ്കുകള്‍തമ്മില്‍ നിര്‍ബന്ധിത ലയനങ്ങള്‍ക്ക് സാഹചര്യം സൃഷ്ടിക്കുന്നതോടെ ബാങ്കുകളുടെ പ്രവര്‍ത്തനം ഇപ്പോഴത്തേതിനേക്കാള്‍ അവതാളത്തിലാകും. ഇപ്പോഴാകട്ടെ, കോടിക്കണക്കിന് ഇടപാടുകാരുടെ അക്കൌണ്ടുകളില്‍ നിര്‍ബന്ധമായും ആധാര്‍ കാര്‍ഡ് ലിങ്ക് ചെയ്യുന്ന പ്രക്രിയ നടപ്പാക്കുകയാണ്. ഡിസംബര്‍ 31നുമുമ്പായി അത് പൂര്‍ത്തീകരിക്കണമെന്നാണ് നിര്‍ദേശം.

ജനങ്ങളുടെ നിത്യജീവിതത്തിന്റെ അഭേദ്യഭാഗമായി ബാങ്കുകളെ മാറ്റിത്തീര്‍ത്തതിനുശേഷം, പൊതുമേഖലാ ബാങ്കുകളെ സ്വകാര്യവല്‍ക്കരിക്കുകയും സ്വകാര്യ ബാങ്കുകളെ വിദേശവല്‍ക്കരിക്കുകയും ചെയ്യുന്ന ഭരണകൂടപ്രവൃത്തി, സാധാരണ ജനങ്ങളെ വേട്ടക്കാര്‍ക്ക് എറിഞ്ഞുകൊടുക്കുന്നതിന് സമാനമാണ്. അതിനാല്‍ ജനകീയ ബാങ്കിങ്ങിന്റെ വര്‍ത്തമാനകാലപ്രാധാന്യം മനസ്സിലാക്കി ബാങ്കുകളിലെ ജനവിരുദ്ധനയങ്ങളെ മുഖ്യ അജന്‍ഡയാക്കി പ്രവര്‍ത്തന പരിപാടികള്‍ തയ്യാറാക്കാന്‍ ഇന്ത്യയിലെ രാഷ്ട്രീയകക്ഷികള്‍ സന്നദ്ധമാകണം. കേവലം ഒരു സാമ്പത്തിക ഇടപാടിലൊതുങ്ങുന്നതല്ല, ബാങ്കുകള്‍ക്കുണ്ടാകുന്ന രൂപ പരിണാമത്തിന്റെ പ്രത്യാഘാതം. രാഷ്ട്രഖജനാവിന്റെ സ്ഥാനമാണ് ബാങ്കുകള്‍ക്കുള്ളത്. സാധാരണക്കാരുടേതായി 110 ലക്ഷം കോടി രൂപയുടെ അപൂര്‍വ ധനസഞ്ചയമാണ് ഇന്ത്യയിലെ ബാങ്കുകളില്‍ നിക്ഷേപമായുള്ളത്. ഈ വന്‍തുകയുടെ സുരക്ഷിതത്വംപോലും അപകടപ്പെടുംവിധമുള്ള, വായ്പ എഴുതിത്തള്ളലും, സ്വകാര്യവല്‍ക്കരണ - വിദേശ വല്‍ക്കരണ നടപടികളുമാണ് രാജ്യത്തെ ബാങ്കുകളില്‍ സംജാതമായിട്ടുള്ളത്. പൊതുസമൂഹത്തിന്റെ ശ്രദ്ധേയമായ ജാഗ്രതയും മേല്‍നോട്ടവും യാഥാര്‍ഥ്യമായാലേ ആസന്നമായ കെടുതികളില്‍ നിന്ന് മോചനം സാധ്യമാകൂ.*

Related News

കൂടുതൽ വാർത്തകൾ »