ജോലിയുടെ ട്രാക്ക്‌ വിട്ട് ഷൈനി വിൽസൺ

മലപ്പുറം

ഇന്ത്യയുടെ എക്കാലത്തെയും മികച്ച മധ്യദൂര അത്‌ലീറ്റായ ഒളിമ്പ്യൻ ഷൈനി വിൽസൺ ജോലിയിൽനിന്ന്‌ വിരമിക്കുന്നു. നാല്‌ പതിറ്റാണ്ടിനുശേഷം ഫുഡ്‌ കോർപറേഷൻ ഓഫ്‌ ഇന്ത്യ (എഫ്‌സിഐ) ചെന്നൈ ഓഫീസിൽനിന്ന്‌ ജനറൽ മാനേജരായാണ്‌ പടിയിറങ്ങുന്നത്‌. നാല്‌ ഒളിമ്പിക്‌സുകളിൽ (1984 ലൊസ്‌ ആഞ്ചലസ്‌, 1988 സോൾ, 1992 ബാഴ്‌സലോണ, 1996 അറ്റ്‌ലാന്റാ) തുടർച്ചയായി പങ്കെടുത്ത അത്‌ലീറ്റാണ്‌. ഒളിമ്പിക്‌സിൽ ദേശീയപതാകയേന്തിയ ആദ്യ ഇന്ത്യൻ വനിതയെന്ന ബഹുമതിയും സ്വന്തം. 1992ൽ ബാഴ്‌സലോണയിലാണ്‌ ഈ നേട്ടം. ഒളിമ്പിക്‌സ്‌ സെമി ഫൈനലിൽ എത്തിയ ആദ്യ ഇന്ത്യൻ വനിതാ അത്‌ലീറ്റാണ്‌. 1984ൽ വനിതകളുടെ 800 മീറ്റർ ഓട്ടത്തിലാണ്‌ സെമിയിലെത്തിയത്‌. ഇന്ത്യൻ അത്‌ലറ്റ്‌സിലെ നിരവധി റെക്കോഡുകളുടെ ഉടമയാണ്‌.

1965 മെയ്‌ എട്ടിന്‌ ഇടുക്കി ജില്ലയിലെ തൊടുപുഴ വഴിത്തല കുരിശിങ്കൽ എബ്രാഹിമിന്റെയും മറിയാമ്മയുടെയും മകളായി ജനനം. പാലാ അൽഫോൻസ കോളേജിൽ പ്രീഡിഗ്രിക്ക്‌ പഠിക്കുന്ന സമയത്ത്‌ തിരുവനന്തപുരത്ത്‌ നടന്ന അഖിലേന്ത്യാ അന്തർ സർവകലാശാലാ അത്‌ലറ്റിക്‌ മീറ്റിൽ വ്യക്തിഗത ചാമ്പ്യനായിരിക്കെയാണ്‌ ജോലി കിട്ടുന്നത്‌. പത്തൊമ്പതാം വയസ്സിൽ ക്ലർക്കായി നിയമനം ലഭിച്ചെങ്കിലും നേരെപ്പോയത്‌ 1984ലെ ഒളിമ്പിക്‌സിനുള്ള ഇന്ത്യൻ ക്യാമ്പിലേക്കായിരുന്നു

ലൊസ്‌ ആഞ്ചലസ്‌ ഒളിമ്പിക്‌സ്‌ കഴിഞ്ഞ്‌ മിന്നുംതാരമായാണ്‌ ആദ്യമായി ഓഫീസിൽ പോകുന്നത്‌. അപ്പോഴേക്കും തിരുവനന്തപുരം പാളയത്തെ റീജണൽ ഓഫീസിൽ മാനേജറായി പ്രൊമോഷൻ ലഭിച്ചു. 1988ൽ രാജ്യാന്തര നീന്തൽ താരം വിൽസൺ ചെറിയാൻ വിവാഹം കഴിച്ചതോടെ ഷൈനി എബ്രഹാം ഷൈനി വിൽസണായി. ഇന്ത്യൻ റെയിൽവേസിൽ ഉദ്യോഗസ്ഥനായിരുന്ന വിൽസണ്‌ 1992ൽ ചെന്നൈയിലേക്ക്‌ മാറ്റംലഭിച്ചതോടെ ഷൈനിയും അങ്ങോട്ടുമാറി. ഇന്ത്യയിലും വിദേശത്തുമായി നടന്ന 75 രാജ്യാന്തര മീറ്റുകളിൽ മത്സരിച്ചിട്ടുള്ള ഷൈനി എൺപതിലേറെ രാജ്യാന്തര മെഡലുകൾ നേടിയിട്ടുണ്ട്‌. ഇന്ത്യൻ വനിതാ റിലേ ടീമിന്റെ സുവർണ നിരയിലെ താരമായിരുന്നു. പി ടി ഉഷ, എം ഡി വൽസമ്മ, വന്ദന റാവു, ഷൈനി ടീം 1984 ഒളിമ്പിക്‌സിൽ 4x400 മീറ്റർ റിലേയിൽ ഫൈനലിൽ കടന്നു. രാജ്യം അർജുന അവാർഡും പത്മശ്രീയും നൽകി ആദരിച്ചിട്ടുണ്ട്‌. 400 മീറ്ററിലും രാജ്യാന്തര മെഡൽ നേടിയിട്ടുണ്ടെങ്കിലും 800 മീറ്ററായിരുന്നു ഇഷ്ട ഇനം.

41 വർഷത്തെയും മൂന്നുമാസത്തെയും ജോലിക്കുശേഷമാണ്‌ വിരമിക്കുന്നത്‌. ഈമാസം 31നാണ്‌ സേവനം അവസാനിക്കുക. ചെന്നൈയിൽ റെയിൽവേ സ്‌പോർട്‌സ്‌ ഓഫീസറായിരുന്ന വിൽസൺ കഴിഞ്ഞവർഷം വിരമിച്ചു. മക്കൾ: ശിൽപ്പ വിൽസൺ, സാന്ദ്ര വിൽസൺ, ഷെയ്‌ൻ വിൽസൺ.

ട്രാക്ക്‌ മാറിയത്‌ ഇന്നും വേദന

സ്‌പോർട്‌സ്‌ ഒരുപാട്‌ സന്തോഷങ്ങളും നേട്ടങ്ങളും തന്നിട്ടുണ്ടെങ്കിലും 1986ലെ സോൾ ഏഷ്യൻ ഗെയിംസ്‌ മറക്കാനാവില്ലെന്ന്‌ ഷൈനി പറഞ്ഞു. 800 മീറ്ററിൽ സ്വർണം നേടിയെങ്കിലും ട്രാക്ക്‌ മാറിയതിന്റെ പേരിൽ അയോഗ്യയാക്കപ്പെട്ടു. ഇന്നും വേദനയോടെ മാത്രമേ ആ നിമിഷങ്ങൾ ഓർക്കാനാവൂ. കണ്ണീരണിഞ്ഞ ആ രാത്രി ഉറങ്ങിയിട്ടില്ല. പിറ്റേന്ന്‌ 400 മീറ്ററിൽ വെള്ളി നേടി. പി ടി ഉഷയ്‌ക്കായിരുന്നു സ്വർണം. അടുത്തദിവസം 4 x 400 റിലേയിൽ ഉഷ, എം ഡി വത്സമ്മ, വന്ദന റാവു ടീമിനൊപ്പം സ്വർണം നേടി.

ഇനി നാട്ടിൽ താമസം

ജോലിയിൽനിന്ന്‌ വിരമിക്കുന്നതോടെ കേരളത്തിലേക്ക്‌ മടങ്ങിവരാനാണ്‌ ആലോചിക്കുന്നതെന്ന്‌ ഷൈനി വിൽസൺ പറഞ്ഞു. മൂന്ന്‌ പതിറ്റാണ്ടിലധികം ചെന്നൈയിലായിരുന്നു. ബന്ധുക്കളെല്ലാം പാലായിലും ഇടുക്കിയിലുമൊക്കെയാണ്‌. എറണാകുളം കാക്കനാടുള്ള സ്ഥലത്ത്‌ വീടുവയ്‌ക്കാനാണ്‌ ആലോചന. തമിഴ്‌നാട്‌ അത്‌ലറ്റിക്‌ അസോസിയേഷൻ വൈസ്‌ പ്രസിഡന്റ്‌, ഇന്ത്യൻ അത്‌ലറ്റിക്‌സ്‌ ടീം സെലക്ഷൻ കമ്മിറ്റിയംഗം, സായി ഗവേണിങ്‌ ബോഡിയംഗം, ഏഷ്യൻ അത്‌ലറ്റിക്‌സ്‌ കമീഷൻ അംഗം തുടങ്ങിയ ഒരുപാട്‌ ചുമതല ഇപ്പോഴുണ്ട്‌. അതുകൊണ്ട്‌ സ്‌പോർട്‌സ്‌ അക്കാദമി അടക്കമുള്ള കാര്യങ്ങളെക്കുറിച്ചൊന്നും ഇപ്പോൾ തീരുമാനിച്ചിട്ടില്ല.