‘വെള്ളിമലയാളം’ ; വെള്ളി നേടിയ ഇന്ത്യൻ ടീമിൽ നാല്‌ മലയാളികൾ

മലപ്പുറം

വോളിബോളിൽ ഇന്ത്യൻ പുരുഷടീമിന്റെ ശക്തമായ തിരിച്ചുവരവാണ്‌ സെൻട്രൽ ഏഷ്യൻ വോളിബോൾ അസോസിയേഷൻ(കാവ) നേഷൻസ്‌ ലീഗിൽ കണ്ടത്‌.

ആറുവർഷത്തിനുശേഷമാണ്‌ ഇന്ത്യ പ്രധാനപ്പെട്ട ഒരു ടൂർണമെന്റിന്റെ ഫൈനലിൽ എത്തുന്നത്‌. ടീം വെള്ളി മെഡൽ നേടിയപ്പോൾ കരുത്തായത്‌ നാല്‌ മലയാളി താരങ്ങളാണ്‌. കെ ആനന്ദ്‌, ജോൺ ജോസഫ്‌, ഷോൺ ടി ജോൺ, എം സി മുജീബ്‌ എന്നീ കെഎസ്‌ഇബി താരങ്ങൾക്കൊപ്പം പത്തുവർഷത്തിലധികമായി കേരള ടീമിന്റെ ജേഴ്‌സി അണിയുന്ന തമിഴ്‌നാട്ടുകാരൻ ജെറൊം വിനീതും ചേർന്നപ്പോൾ ടീം സുശക്തമായി. ഈ റണ്ണറപ്പ്‌ വിജയം ഇന്ത്യയുടെ ലോക റാങ്ക്‌ 51 ആയി ഉയർത്തി.

ഫൈനലിൽ പതിനഞ്ചാം റാങ്കുള്ള കരുത്തരായ ഇറാനോട്‌ നേരിട്ടുള്ള സെറ്റുകൾ പരാജയപ്പെട്ടെങ്കിലും(25–-17, 25–-20, 25–-19) ടൂർണമെന്റിൽ മികച്ച പ്രകടനം നടത്താൻ ടീമിനായി. ഉസ്‌ബെകിസ്ഥാൻ, തുർകിമെനിസ്ഥാൻ, പാകിസ്ഥാൻ, കസാഖ്‌സ്ഥാൻ ടീമുകളെ തോൽപ്പിച്ചാണ്‌ ഫൈനലിൽ കടന്നത്‌. ലിബറോ കെ ആനന്ദും മിഡിൽ ബ്ലോക്കർ ജോൺ ജോസഫും മുഴുവൻ സമയവും രാജ്യത്തിനായി കളത്തിലിറങ്ങി. കണ്ണൂർ മാതമംഗലം പേരൂൽ സ്വദേശി ആനന്ദും വയനാട്‌ പുൽപ്പള്ളി സ്വദേശി ഇ ജെ ജോൺ ജോസഫും കോഴിക്കോട്‌ സായി സെന്ററിലൂടെ വളർന്നുവന്ന താരങ്ങളാണ്‌. ജോൺ ടൂർണമെന്റിലെ മികച്ച ബ്ലോക്കറായും തെരഞ്ഞെടുക്കപ്പെട്ടു. ബ്ലോക്കറായ എം സി മുജീബും അറ്റാക്കറായ ഷോൺ ടി ജോൺ മുമ്പും ഇന്ത്യൻ ജേഴ്‌സി അണിഞ്ഞവരാണ്‌.

കോഴിക്കോട്‌ വടകര സ്വദേശിയാണ്‌ മുജീബ്‌. പത്തനംതിട്ട സ്വദേശിയാണ്‌ ഷോൺ. മുഴുവൻ സമയവും കളിച്ചില്ലെങ്കിലും രണ്ടുപേരും മിക്ക മത്സരങ്ങളിലും കളത്തിലിറങ്ങി. പത്ത്‌ വർഷത്തിലധികമായി ഇന്ത്യൻ ടീമിലെ സ്ഥിരസാന്നിധ്യമായ ജെറൊം വിനീത്‌ കൊച്ചി ബിപിസിഎല്ലിന്റെ താരവും മുൻ ഇന്ത്യൻ നായകനുമാണ്‌.