‘മെക്‌സിക്കൻ പെഡ്രി’; ലോക ഫുട്‌ബോളിലേക്ക്‌ ഒരു സൂപ്പർതാരം പിറക്കുന്നു

ന്യൂയോർക്ക്‌: മെക്‌സിക്കോയിൽനിന്ന്‌ ലോക ഫുട്‌ബോളിലേക്ക്‌ ഒരു സൂപ്പർതാരം പിറക്കുന്നു. പതിനാറുകാരൻ ഗിൽബർട്ടോ മോറ. കോൺകാകാഫ്‌ ഗോൾഡ്‌ കപ്പിൽ മെക്‌സിക്കൻ ജയത്തിന്‌ ചുക്കാൻ പിടിച്ച മധ്യനിരക്കാരൻ. 16 വർഷവും 265 ദിവസവുമാണ്‌ പ്രായം.

ക്വാർട്ടറിൽ സൗദി അറേബ്യക്കെതിരെയാണ്‌ ദേശീയ കുപ്പായത്തിൽ അരങ്ങേറിയത്‌. സൗദിക്കെതിരെ തിളങ്ങിയ കുഞ്ഞു മോറയെ മെക്‌സിക്കോ പരിശീലകൻ ഹാവിയർ അഗ്വേറെ നിലനിർത്തി. സെമിയിൽ ഹോണ്ടുറാസിനെതിരെ ഒരു ഗോളിന്‌ അവസരമൊരുക്കി. ഫൈനലിൽ അമേരിക്കയ്‌ക്കെതിരെയും മിന്നി. കിരീടം നേടിയതോടെ രാജ്യാന്തര വേദിയിൽ ചാമ്പ്യനാകുന്ന പ്രായം കുറഞ്ഞ താരമായി. സ്‌പെയ്‌നിന്റെ ലമീൻ യമാലിന്റെ (17 വർഷം, 2 ദിവസം) റെക്കോഡ്‌ മറികടന്നു.

‘മെക്‌സിക്കൻ പെഡ്രി’ എന്നാണ്‌ താരം അറിയപ്പെടുന്നത്‌. സ്‌പാനിഷ്‌ താരമായ പെഡ്രി കളിക്കുന്ന അതേ സ്ഥാനത്താണ്‌ മോറയും കളിക്കുന്നത്‌. ഫുട്‌ബോൾ രക്തത്തിലുണ്ട്‌. അച്ഛൻ ഗിൽബർട്ടോ മോറ ഒലായോ പ്രൊഫഷണൽ താരമാണ്‌. മെക്‌സിക്കൻ ലീഗിൽ കളിച്ച ഒലായോ ഇപ്പോൾ പരിശീലകനുമാണ്‌. 2008ൽ ജനിച്ച മോറയുടെ കുട്ടിക്കാലം പന്തിനൊപ്പമായിരുന്നു. ടിയുവാന അക്കാദമിയായിരുന്നു കളരി. കഴിഞ്ഞ വർഷം, 15 വർഷവും 10 ദിവസവും പ്രായമായപ്പോൾ ടിയുവാന സീനിയർ നിരയ്‌ക്കായി മെക്‌സിക്കൻ ലീഗിൽ അരങ്ങേറി. ഇത്‌ റെക്കോഡാണ്‌. വൈകാതെ ഗോളടിക്കുകയും ചെയ്‌തു. ഇതുവരെ 30 കളിയിൽ രണ്ട്‌ ഗോളടിച്ചു . 2022 മുതൽ മെക്‌സിക്കൻ ജൂനിയർ ടീമുകൾക്കായും കളി തുടങ്ങിയിരുന്നു. കഴിഞ്ഞ വർഷംവരെ അണ്ടർ 17 ടീമംഗമായിരുന്നു.

ദേശീയ ലീഗിലെ പ്രകടനം കണ്ടാണ്‌ മോറയെ ഗോൾഡ്‌ കപ്പിനുള്ള ടീമിൽ ഉൾപ്പെടുത്തിയത്‌. ആദ്യ കളികളിൽ അവസരം നൽകിയിരുന്നില്ല. നിർണായകമായ ക്വാർട്ടറിൽ വിളിയെത്തി. നിരാശപ്പെടുത്തിയില്ല. പ്രായത്തിൽ കവിഞ്ഞ പക്വതയോടെ മെക്‌സിക്കൻ മധ്യനിര നിയന്ത്രിച്ചു. മുന്നേറ്റക്കാർക്ക്‌ ഇടവേളകളില്ലാതെ പന്തെത്തിച്ചു. വിങ്ങിലും കളിക്കും. ഫൈനലിൽ 75 മിനിറ്റ്‌ കളത്തിലുണ്ടായിരുന്നു. 36 പാസുകളിൽ 34ലും പൂർത്തിയാക്കി. മൂന്ന്‌ ഷോട്ടുകളുതിർത്തു. എതിരാളിയിൽനിന്ന്‌ നാലുതവണ പന്ത്‌ റാഞ്ചി. മെക്‌സിക്കോയിലെ അത്ഭുത ബാലനായി യൂറോപ്യൻ ക്ലബ്ബുകൾ വലവിരിച്ചു കഴിഞ്ഞു. ബാഴ്‌സലോണ, അയാക്‌സ്‌, പിഎസ്‌ജി, മാഞ്ചസ്റ്റർ സിറ്റി തുടങ്ങിയ ടീമുകൾ മോറയ്‌ക്കായി രംഗത്തുണ്ട്‌.

രാജ്യാന്തര കിരീടം നേടുന്ന 
പ്രായം കുറഞ്ഞ താരങ്ങൾ

ഗിൽബർട്ടോ മോറ

(മെക്‌സിക്കോ) 16 വർഷം, 265 ദിവസം

ലമീൻ യമാൽ

(സ്‌പെയ്‌ൻ) 17 വർഷം, 2 ദിവസം

പെലെ

(ബ്രസീൽ) 17 വർഷം, 249 ദിവസം