ക്ലബ് ലോകകപ്പ്: യൂറോപ്പിനെ പിടിച്ച് കുലുക്കി ബ്രസീൽ

ഫിലഡൽഫിയ: ക്ലബ് ഫുട്ബോൾ ലോകകപ്പ് പുരോ​ഗമിക്കുമ്പോൾ യൂറോപ്യൻ ചാമ്പ്യൻമാരെ വിറപ്പിച്ച് ബ്രസീലിയൻ ക്ലബ്ബുകൾ. ലോകത്തെ 32 ടീമുകൾ മാറ്റുരയ്ക്കുന്ന ടൂർണമെന്റിൽ ആദ്യ രണ്ടു മത്സരങ്ങൾ പൂർത്തിയാക്കിയ നാല് ​ഗ്രൂപ്പുകളിൽ മൂന്നിലും ബ്രസീൽ ടീമുകളാണ് ഒന്നാമത്. ​തുടർച്ചയായി രണ്ട് ജയങ്ങളോടെ ആറു പോയന്റ് നേടി ​ഗ്രൂപ്പ് ബിയിൽ നിന്ന് ബോട്ടാഫെഗോയും ​ഗ്രൂപ്പ് ഡിയിൽ നിന്ന് ഫ്‌ളമെംഗോയും പ്രീ ക്വാർട്ടർ ഏറെക്കുറെ ഉറപ്പിച്ചു. ഒരു ജയവും സമനിലയുമായി ഗ്രൂപ്പ് എയിൽ നാലു പോയന്റുമായി പൽമിറാസും ഒന്നാമതാണ്.

ശനിയാഴ്ച പുലര്‍ച്ചെ നടന്ന കളയിൽ യൂറോപിലെ കരുത്തരായ ചെൽസിയെ ഒന്നിനെതിരെ മൂന്ന് ഗോളിന് തരിപ്പണമാക്കിയാണ് ഫ്‌ളമെംഗോയുടെ മുന്നേറ്റം. ആദ്യ പകുതിയിൽ ​ഗോൾ വഴങ്ങിയ ശേഷമാണ് മൂന്നു​ഗോളുകൾ ടീം തിരിച്ചടിച്ചത്. 13-ാം മിനുട്ടിൽ ചെൽസി പെഡ്രോ നെറ്റോയിലൂടെ ലീഡ് നേടി. ഒരു ​ഗോളിന് പിന്നിൽ നിന്ന ശേഷം രണ്ടാം പകുതിൽ ബ്രസീലിയൻ മുന്നേറ്റമാണ് കണ്ടത്. 62-ാം മിനിറ്റിലും 65-ാം മിനിറ്റിലും ​ഗോൾ നേടി ഫ്‌ളമെംഗോ കളിയിലേക്ക് തിരിച്ചുവന്നു. ബ്രൂണോ ഹെന്റിയും ഡാനിലോയുമാണ് ടീമിനായി ​ഗോൾ നേടിയത്. മറുപടി ​ഗോളിനായി ശ്രമിക്കുന്നതിനിടെ 68-ാം മിനിറ്റിൽ നിക്കോളാസ് ജാക്‌സണ് ചുവപ്പ് കാർഡ് ലഭിച്ചതോടെ ചെൽസി പത്ത് പേരായി ചുരുങ്ങി. തുടർന്ന് 83-ാം മിനുട്ടിൽ വാലസി യാൻ ഫ്‌ളമെംഗോയുടെ പട്ടിക പൂർത്തിയാക്കി. നോകൗട്ടിലേക്ക് കടക്കാൻ ടുണീഷ്യൻ ​ക്ലബ്ബ് ഇഎസ്‌ ടുണീസുമായുള്ള അടുത്ത മത്സരം ചെൽസിക്ക് നിർണായകമാകും.

വെള്ളിയാഴ്ച നടന്ന മത്സരത്തിൽ യൂറോപ്യൻ ചാമ്പ്യൻമാരായ പിഎസ്‌ജിയെയാണ് ലാറ്റിനമേരിക്കൻ ചാമ്പ്യൻമാരായ ബൊട്ടഫാഗോ ഒറ്റ ഗോളിന്‌ വീഴ്‌ത്തിയത്. ബ്രസീലിന്റെ ഇരുപത്തിനാലുകാരൻ ഇഗോർ ജെസ്യൂസാണ്‌ വിജയഗോൾ നേടിയത്‌. കടുത്ത പ്രതിരോധവും അതിനൊത്ത പ്രത്യാക്രമണവുമായി ബൊട്ടഫാഗോ കളംപിടിച്ചപ്പോൾ യൂറോപ്പിന്റെ കരുത്ത്‌ ചോർന്നുപോയി. ബൊട്ടഫാഗോ തുടർച്ചയായ രണ്ടാംജയം നേടയപ്പോൾ പിഎസ്‌ജി രണ്ടാമതും എംഎസ്‌എൽ ക്ലബ്‌ സീറ്റിൽ സൗണ്ടേഴ്‌സിനെ 3–1ന്‌ തോൽപ്പിച്ച അത്‌ലറ്റികോ മാഡ്രിഡ്‌ മൂന്നാമതുമാണ്‌.

കഴിഞ്ഞ ദിവസം നടന്ന കളിയിൽ അൽ അഹ്‌ലിയെ രണ്ട്‌ ഗോളിന്‌ തോൽപ്പിച്ചാണ് ​ഗ്രൂപ്പ് എയിൽ ബ്രസീൽ ക്ലബ്‌ പൽമിറാസ് ഒന്നാമതെത്തിയത്. നാലു പോയിന്റോടെ ലയണൽ മെസിയുടെ ഇന്റർ മയാമി രണ്ടാമതാണ്. 24ന്‌ പപൽമിറാസുമായാണ്‌ മയാമിയുടെ അവസാന കളി. സമനില പിടിച്ചാൽ ഇരു ടീമുകൾക്കും പ്രീ ക്വാർട്ടറിലേക്ക്‌ മുന്നേറാം. പോർടോയ്‌ക്കും അൽ അഹ്‌ലിക്കും ഓരോ പോയിന്റാണ്‌.

ലാറ്റിനമേരിക്കൻ മുന്നേറ്റം കണ്ട ടൂർണമെന്റിൽ അർജന്റീനൻ ക്ലബ് ബൊക്ക ജൂനിയേഴ്‌സ് ബയേൺ മ്യൂണിക്കിനോട് 2-1ന് പരാജയപ്പെട്ടു. ​ഗ്രൂപ്പ് ബിയിൽ തുടർച്ചയായ രണ്ട് ജയത്തോടെ ആറു പോയന്റുമായി ജർമൻ ക്ലബ്ബ് ഒന്നാമതാണ്. നാലു പോയന്റുമായി പോർച്ചുഗലിലെ ബെൻഫിക്കയാണ് രണ്ടാമത്. ഒരു മത്സരം മാത്രം പൂർത്തിയായ ​ഗ്രൂപ്പ് ഇയിൽ അർജന്റീനൻ ക്ലബായ റിവർ പ്ലേറ്റാണ് ഒന്നാമത്. ജപ്പാൻ ക്ലബ്ബ് ഉർവ റെഡ്‌ ഡയമണ്ട്‌സിനെ ഒന്നിനെതിരെ മൂന്ന് ഗോളുകൾക്കാണ് ടീം വീഴ്ത്തിയത്.