ബൊട്ടഫാഗോ ഷോക്ക്‌

കാലിഫോർണിയ

യൂറോപ്യൻ ചാമ്പ്യൻമാരായ പിഎസ്‌ജി ലാറ്റിനമേരിക്കയ്‌ക്കുമുന്നിൽ വിറച്ചു. ക്ലബ്‌ ലോകകപ്പിൽ ലാറ്റിനമേരിക്കൻ ചാമ്പ്യൻമാരായ ബൊട്ടഫാഗോ ഒറ്റ ഗോളിന്‌ പിഎസ്‌ജിയെ വീഴ്‌ത്തി. ബ്രസീലിന്റെ ഇരുപത്തിനാലുകാരൻ ഇഗോർ ജെസ്യൂസാണ്‌ വിജയഗോൾ നേടിയത്‌.

ചാമ്പ്യൻസ്‌ ലീഗ്‌ ജേതാക്കളായ പിഎസ്‌ജി ആദ്യ കളിയിൽ സ്‌പാനിഷ്‌ കരുത്തരായ അത്‌ലറ്റികോ മാഡ്രിഡിനെ തകർത്താണ്‌ തുടങ്ങിയത്‌. ആ ആത്മവിശ്വാസത്തിൽ ബ്രസീൽ ക്ലബ്ബിനെതിരെ ഇറങ്ങിയ ലൂയിസ്‌ എൻറിക്വെയുടെ സംഘത്തിന്‌ പിഴച്ചു. കടുത്ത പ്രതിരോധവും അതിനൊത്ത പ്രത്യാക്രമണവുമായി ബൊട്ടഫാഗോ കളംപിടിച്ചപ്പോൾ യൂറോപ്പിന്റെ കരുത്ത്‌ ചോർന്നുപോയി.

തുടർച്ചയായ രണ്ടാംജയത്തോടെ ബൊട്ടഫാഗോ പ്രീ ക്വാർട്ടർ ഏറെക്കുറെ ഉറപ്പിച്ചു. പിഎസ്‌ജി രണ്ടാമതും എംഎസ്‌എൽ ക്ലബ്‌ സീറ്റിൽ സൗണ്ടേഴ്‌സിനെ 3–-1ന്‌ തോൽപ്പിച്ച അത്‌ലറ്റികോ മാഡ്രിഡ്‌ മൂന്നാമതുമാണ്‌.

തുടർച്ചയായ ആറ്‌ ജയവുമായാണ്‌ പിഎസ്‌ജി എത്തിയത്‌. അതിൽ ചാമ്പ്യൻസ്‌ ഫൈനലിൽ ഇന്റർ മിലാനെതിരെ നേടിയ അഞ്ച്‌ ഗോൾ ജയവും ഉൾപ്പെടും. അവസാന രണ്ട്‌ കളിയിൽ അടിച്ചുകൂട്ടിയത്‌ ഒമ്പത്‌ ഗോൾ. ഒറ്റഗോളും വഴങ്ങിയില്ല. ആദ്യഘട്ടത്തിൽ പിടിച്ചുനിൽക്കാൻ ബ്രസീൽ ക്ലബ്‌ പാടുപെട്ടു. പന്തിൽ നിയന്ത്രണം കിട്ടിയപ്പോൾ കളി മാറി. ആദ്യപകുതി അവസാനിക്കുന്നതിനുതൊട്ടുമുമ്പായിരുന്നു വിജയംകുറിച്ച ഗോൾ.

മിന്നുന്ന പ്രത്യാക്രമണം. ജെഫേഴ്‌സൺ സാവറീനോയിൽനിന്ന്‌ പന്ത്‌ സ്വീകരിച്ച്‌ മുന്നേറിയ ഇഗോർ ജെസ്യൂസിനെ തടയാൻ പിഎസ്‌ജിയുടെ രണ്ട്‌ പ്രതിരോധക്കാർ രംഗത്തെത്തി. പക്ഷേ, ബ്രസീലുകാരൻ മനോഹരമായ നീക്കത്തിലൂടെ മുന്നേറി. ലക്ഷ്യത്തിലേക്ക്‌ അടിയുംതൊടുത്തു. ഇതിനിടെ പന്ത്‌ പ്രതിരോധക്കാരൻ വില്ലിയൻ പാച്ചോയുടെ കാലിൽ തട്ടി. പന്ത്‌ വലയിലേക്ക്‌ കയറുമ്പോൾ നോക്കിനിൽക്കാനേ ഗോൾ കീപ്പർ ജിയാൻല്യൂജി ദൊന്നരുമ്മയ്‌ക്ക്‌ കഴിഞ്ഞുള്ളൂ.

ഫ്രഞ്ചുകാർ തിരിച്ചടിക്കാൻ ആഞ്ഞുശ്രമിച്ചു. കവിച കവാറസ്‌ഹെലിയക്ക്‌ കിട്ടിയ സുവർണാവസരം പാഴായി. ഗൊൺസാലോ റാമോസും അവസരം പാഴാക്കി. കഴിഞ്ഞ വർഷത്തെ ലിബർട്ടഡറോസ്‌ കപ്പ്‌ ജേതാക്കളായ ബൊട്ടഫാഗോ ഈ വർഷം പ്രീ ക്വാർട്ടറിൽ കടന്നിട്ടുണ്ട്‌. ആഗസ്‌തിലാണ്‌ മത്സരം. യൂറോപ്യൻ ക്ലബ്ബുകളുടെ നോട്ടപ്പുള്ളിയായ ഇഗോർ ജെസ്യൂസ്‌ 37 കളിയിൽ ഒമ്പത്‌ ഗോൾ നേടി. ബ്രസീലിനായി നാല്‌ കളിയിൽ ഇറങ്ങിയിട്ടുണ്ട്‌.

അവസാന കളിയിൽ അത്‌ലറ്റികോയാണ്‌ ബൊട്ടഫാഗോയുടെ എതിരാളി. പിഎസ്‌ജി സീറ്റിലിനെ നേരിടും.