മെസിയില്ലാതെ ഇറക്കം, റെഡ് കാർഡ്: അർജന്റീനയെ വീഴ്ത്തി ഇക്വഡോർ

ക്വിറ്റോ : സൂപ്പർ താരം ലയണൽ മെസിയില്ലാതെ പോരിനിറങ്ങിയ അർജന്റീനയ്ക്ക് കാലിടറി. ലോകകപ്പ് യോ​ഗ്യത റൗണ്ടിലെ അവസാന മത്സരത്തിൽ ഇക്വഡോറാണ് ചാമ്പ്യൻമാരെ വീഴ്ത്തിയത്. ഏകപക്ഷീയമായ ഒരു ​ഗോളിനായിരുന്നു ഇക്വഡോറിന്റെ വിജയം. നാടകീയത നിറഞ്ഞ മത്സരത്തിൽ സൂപ്പർ താരം ഇല്ലാഞ്ഞതും പ്രതിരോധ നിരക്കാരൻ നിക്കോളാസ് ഓട്ടാമെൻഡിക്ക് ചുവപ്പുകാർഡ് ലഭിച്ചതും അർജന്റീനയുടെ തോൽവിക്ക് കാരണമായി.

13 മിനിറ്റു വരെ നീണ്ട ആദ്യപകുതിയിലെ ഇഞ്ചുറി ടൈമിലായിരുന്നു ഇക്വഡോറിന്റെ വിജയ ​ഗോൾ. ഇക്വഡോർ നായകൻ എന്നർ വലൻസിയയാണ് ഇഞ്ചുറി ടൈമിന്റെ 13ാം മിനിറ്റിൽ വിജയ ​ഗോൾ നേടിയത്. പെനാൽറ്റി ബോക്സിനുള്ളിൽ ടഗ്ലിയാഫികോയുടെ ​ഫൗളിനെ തുടർന്ന് ലഭിച്ച പെനാൽറ്റി വലൻസിയ വലയിലാക്കി.

കളിയിടെ ആദ്യപകുതിയിലുടനീളം ആധിപത്യം പുലർത്തിയത് ഇക്വഡോറായിരുന്നു. ബോൾ പൊസഷനും പാസുകളും കൂടുതലായിരുന്നിട്ടും വിജയത്തിലേക്ക് ഷോട്ട് തൊടുക്കാൻ അർജന്റീനയ്ക്കായില്ല. എമിലിയാനോ മാർടിനസിന്റെ സേവുകളാണ് അർജന്റീനയെ കൂടൂതൽ ആഘാതത്തിൽ നിന്ന് രക്ഷിച്ചത്. കളിയുടെ 31ാം മിനിറ്റിൽ തന്നെ നിക്കോളാസ് ഓട്ടാമെൻഡി ചുവപ്പുകാർഡ് കണ്ട് പുറത്തായി. ഇതോടെ ലോകകപ്പിലെ ആദ്യ മത്സരവും ഓട്ടോമെൻഡിക്ക് നഷ്ടമായി.

യോ​ഗ്യത മത്സരത്തിലെ അർജന്റീനയുടെ നാലാം തോൽവിയാണിത്. തോറ്റെങ്കിലും പോയന്റ് പട്ടികയിൽ ഒന്നാമതാണ് അർജന്റീന. മറ്റൊരു മത്സരത്തിൽ ബ്രസീലിനെ ബൊളീവിയ അട്ടിമറിച്ചു. ആദ്യ പകുതിയുടെ ഇഞ്ചുറി സമയത്ത് മിഗ്വെൽ ടെർസെറോസ് നേടിയ പെനാൽറ്റി ഗോളാണ് ബൊളീവിയക്ക് ജയമൊരുക്കിയത്. കൊളംബിയ മൂന്നിനെതിരെ ആറ് ഗോളിന് വെനസ്വേലയെയും തോൽപ്പിച്ചു.