ലക്ഷ്യം ഡബിൾ സെഞ്ചുറി; മനസ് തുറന്നു വൈഭവ് സൂര്യവംശി

ഓവൽ: യൂത്ത്‌ ക്രിക്കറ്റിൽ ഏറ്റവും വേഗമേറിയ സെഞ്ചുറി സ്വന്തം പേരിലാക്കിയതിന് പിന്നാലെ വമ്പൻ പ്രഖ്യാപനവുമായി വൈഭവ് സൂര്യവംശി. അടുത്ത മത്സരത്തിൽ 200 റൺസ് അടിക്കാൻ ശ്രമിക്കുമെന്നും 50 ഓവറും ബാറ്റ് ചെയ്യാൻ ശ്രമിക്കിമെന്നുമാണ് പതിനാലുകാരൻ പറഞ്ഞത്. ബിസിസിഐ എക്‌സിൽ പങ്കുവെച്ച വീഡിയോയിലാണ് വൈഭവ് ഇക്കാര്യം പറഞ്ഞത്.

'മത്സരത്തിൽ സെഞ്ചുറി നേടിയതോടെ റെക്കോർഡിട്ടുവെന്ന് താൻ അറിഞ്ഞിരുന്നില്ല. സെഞ്ചുറി നേടിയശേഷം ടീം മാനേജർ അങ്കിത് ആണ് റെക്കോർഡിൻറെ കാര്യം പറഞ്ഞത്. ഞാൻ റണ്ണെടുക്കുമ്പോൾ അതിന്റെ നേട്ടം ടീമിന് ലഭിക്കുന്നു. മുഴുവൻ ഓവറും ബാറ്റ് ചെയ്യാൻ ശ്രമിക്കും. ടീമിന് വേണ്ടി മികച്ച പ്രകടനം നടത്താനായതിൽ സന്തോഷമുണ്ട്'- വൈഭവ് സൂര്യവംശി പറഞ്ഞു.

ഇംഗ്ലണ്ട്‌ അണ്ടർ 19 ടീമിനെതിരായ നാലാം ഏകദിനത്തിൽ ഇന്ത്യൻ അണ്ടർ 19നായി 52 പന്തിലാണ്‌ ഇടംകൈയൻ മൂന്നക്കം കണ്ടത്‌. പാകിസ്ഥാന്റെ കമ്രാം ഗുലാമിന്റെ 53 പന്തിലുള്ള റെക്കോഡ്‌ തിരുത്തി. കളിയിലാകെ 78 പന്തിൽ പത്ത്‌ സിക്‌സറും 13 ഫോറും ഉൾപ്പെടെ 143 റണ്ണാണ്‌ വൈഭവ്‌ അടിച്ചെടുത്തത്‌.

ഐപിഎല്ലിൽ രാജസ്ഥാൻ റോയൽസിനായി 35 പന്തിൽ സെഞ്ചുറി നേടി അമ്പരപ്പിച്ചിരുന്നു ബിഹാറുകാരൻ. ഇംഗ്ലണ്ടിനെതിരായ ആദ്യം ബാറ്റ്‌ ചെയ്‌ത ഇന്ത്യ ഒമ്പത്‌ വിക്കറ്റ്‌ നഷ്ടത്തിൽ 363 റണ്ണടിച്ചു. വിഹാൻ മൽഹോത്രയും (129) സെഞ്ചുറി കണ്ടെത്തി. അഞ്ച്‌ മത്സര പരമ്പരയിൽ ഇന്ത്യ 2– 1ന്‌ മുന്നിലാണ്‌. ടൂർണമെന്റിൽ നാല്‌ കളിയിൽ 322 റണ്ണാണ്‌ വൈഭവ്‌ നേടിയത്‌.