26 October Monday

മലരേ മൗനമാ ... ഇനിയില്ല മണ്ണിൽ ഇന്ത കാതൽ

വെബ് ഡെസ്‌ക്‌Updated: Saturday Sep 26, 2020

ചെന്നൈ>
നാദത്തിന്റെ മാന്ത്രിക താക്കോൽ കൊണ്ട്‌ ഹൃദയത്തിന്റെ ആരും തുറക്കാത്ത അറകൾ നിരന്തരം തുറന്നിട്ട  ഗായകാ വിട! പോയ്‌ മറഞ്ഞാലും നിങ്ങൾ പാടി തീരുന്നില്ലല്ലോ പ്രിയ എസ്‌പിബി; പാടി തോരുന്നുമില്ല. ആസ്വാദക മനസ്സുകളിൽ എണ്ണിയാലൊടുങ്ങാത്ത പാട്ടുകൾ ബാക്കിയാക്കി എസ്‌ പി ബാലസുബ്രഹ്മണ്യം വിടവാങ്ങി. ചെന്നൈ എംജിഎം ഹെൽത്ത്‌ കെയറിൽ  വെള്ളിയാഴ്‌ച പകൽ 1.04ന്‌ ഹൃദയാഘാതത്തെ തുടർന്നാണ്‌‌ അന്ത്യം‌. 74 വയസ്സായിരുന്നു. മൃതദേഹം വെള്ളിയാഴ്‌ച വൈകിട്ട്‌ നുങ്കംപാക്കം കാംപ്‌ത നഗറിലെ വീട്ടിൽ പൊതുദർശനത്തിനുവച്ചു. പിന്നീട്‌ താമരപ്പാക്കത്തെ ഫാം ഹൗസിലേക്ക്‌ കൊണ്ടുപോയി. സംസ്കാരം ശനിയാഴ്‌ച.

കോവിഡ്‌ ബാധിച്ച്‌ ആഗസ്‌ത്‌ അഞ്ചിനാണ് ആശുപത്രിയിൽ പ്രവേശിപ്പിച്ചത്.  കോവിഡ്‌ ഭേദമായെങ്കിലും ശ്വസനസംബന്ധമായ അസുഖത്തെ തുടർന്ന്‌ വെന്റിലേറ്ററിന്റെ സഹായത്തോടെയാണ്‌ ജീവൻ നിലനിർത്തിയിരുന്നത്‌.  ആഗസ്ത്‌ 14നാണ്‌‌ വെന്റിലേറ്ററിലേക്ക്‌ മാറ്റിയത്‌. ആരോഗ്യം മെച്ചപ്പെട്ടുവെന്ന്‌ 19ന്‌ മകൻ അറിയിച്ചു. ഇതിനിടയിൽ കഴിഞ്ഞ അഞ്ചിന്‌ വിവാഹവാർഷികം ആശുപത്രിയിൽ ആഘോഷിച്ചു. വ്യാഴാഴ്‌ച വൈകിട്ടാണ്‌‌ സ്ഥിതി വഷളായത്‌. രാത്രിയിൽ കമൽഹാസനും  വെള്ളിയാഴ്‌ച രാവിലെ അടുത്ത ബന്ധുക്കളും ആശുപത്രിയിലെത്തി.


 

16 ഭാഷ; 40,000 പാട്ട്‌
പതിനാറ്‌ ഭാഷകളിലായി 40,000ത്തിലധികം ഗാനങ്ങൾ പാടി. ഇത്രയധികം ചലച്ചിത്രഗാനങ്ങൾ പാടിയ മറ്റൊരാൾ ലോകത്തുണ്ടായിട്ടില്ല. ആന്ധ്രയിലെ നെല്ലൂരിൽ ഹരികഥാ കലാകാരനായ എസ് പി സാംബമൂർത്തിയുടെയും ശകുന്തളമ്മയുടെയും മകനായി 1946 ജൂൺ നാലിന്‌‌‌ ജനനം. മുഴുവൻ പേര്‌ ശ്രീപതി പണ്ഡിതാരാധ്യുല ബാലസുബ്രഹ്‌മണ്യം. എൻജിനിയറാകാൻ ആഗ്രഹിച്ച ബാലസുബ്രഹ്‌മണ്യം യാദൃച്ഛികമായാണ് സംഗീതലോകത്തെത്തിയത്. എൻജിനിയറിങ്‌ പഠനകാലത്ത്‌ പാട്ടു മത്സരത്തിൽ എസ്‌ ജാനകിയുടെ ശ്രദ്ധയിൽപ്പെട്ടത്‌‌ സിനിമയിലേക്ക്‌ വഴിതുറന്നു‌.

1966 ഡിസംബർ 15ന്‌‌ പിന്നണി ഗായകനായി അരങ്ങേറ്റം. എസ് പി കോദണ്ഡപാണിയുടെ ‘ശ്രീ ശ്രീ മര്യാദ രാമണ്ണ' തെലുഗു സിനിമയിൽ ‘ഹരിഹരനാരായണോ’, ‘ഏമിയേ വിന്ത മോഹം’ എന്നീ ഗാനങ്ങൾ പാടി. ‘കടൽപ്പാലം’ എന്ന സിനിമയിൽ വയലാർ എഴുതി ദേവരാജൻ സംഗീതം നൽകിയ ‘ഈ കടലും മറുകടലും' എന്ന പാട്ടിലൂടെ മലയാളത്തിൽ അരങ്ങേറി.
1979ൽ പുറത്തിറങ്ങിയ കെ വിശ്വനാഥിന്റെ തെലുങ്കുചിത്രം ശങ്കരാഭരണത്തിലെ ഗാനങ്ങൾക്ക്‌ ആദ്യ ദേശീയ പുരസ്കാരം. നാലുഭാഷകളിലായി ആറു തവണ ദേശീയ പുരസ്‌കാരം. മികച്ച നടനായും ഡബ്ബിങ്‌ ആർടിസ്റ്റായും തിളങ്ങി. 72 സിനിമയിൽ വേഷമിട്ടു. മികച്ച സഹനടനുള്ള കർണാടക സർക്കാർ അവാർഡും നേടി. 46 സിനിമയ്‌ക്ക് സംഗീതം നിർവഹിച്ചു.  
ഭാര്യ: സാവിത്രി. മക്കൾ: പല്ലവി, എസ്‌ പി ബി ചരൺ(ഗായകൻ).

കണ്ണീരിലാഴ്‌ത്തി മടക്കം
ഒന്നരമാസം പിന്നിട്ട ആശുപത്രിവാസത്തിൽനിന്ന്‌ പ്രിയ ഗായകന്റെ തിരിച്ചുവരവിനായി കാത്തിരുന്നവരെ കണ്ണീരിലാഴ്‌ത്തി എസ്‌ പി ബിയുടെ മടക്കം‌. എസ്‌ പി ബിയിൽനിന്ന്‌ പിറക്കുന്ന ഗാനങ്ങൾ ഇനിയും ആസ്വദിക്കാമെന്ന ആഗ്രഹങ്ങൾക്ക്‌ ഇടംനൽകാതെ  മരണമെത്തി. പ്രിയ ഗായകനെ അവസാനമായി ഒന്ന്‌ കാണാൻ ആരാധകരും സഹപ്രവർത്തകരും ചെന്നൈ നുങ്കമ്പാക്കം കാംപ്ത നഗറിലെ എസ്‌ പി ബിയുടെ വീട്ടിലേക്ക്‌ ഒഴുകിയെത്തി.

ആഗസ്ത്‌ അഞ്ചിന്‌ കോവിഡ്‌ ബാധിച്ച ഗായകന്‌ വീട്ടിൽത്തന്നെ കഴിഞ്ഞാൽ മതിയെന്നായിരുന്നു ഡോക്ടർമാർ നൽകിയ നിർദേശം. എന്നാൽ, വീട്ടിലുള്ളവർക്ക്‌ രോഗം പടരേണ്ട എന്ന്‌ കരുതിയാണ്‌ ആശുപത്രിയിലേക്ക്‌ പോയത്‌. വേഗം രോഗമോചിതനായി തിരിച്ചെത്താം എന്നായിരുന്നു പ്രതീക്ഷ. പേടിക്കേണ്ടതില്ലെന്നും എല്ലാം നിയന്ത്രണവിധേയമാണെന്നും അറിയിച്ച്  എസ്‌ പി ബി ആശുപത്രിയിൽനിന്നുള്ള വീഡിയോ സന്ദേശത്തിലൂടെ പങ്കുവച്ചിരുന്നു. കോവിഡ്‌ മോചിതനായെങ്കിലും ന്യുമോണിയ ബാധിച്ചതാണ്‌ സ്ഥിതി ഗുരുതരമാക്കിയത്‌.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

മറ്റു വാർത്തകൾ

----
പ്രധാന വാർത്തകൾ
-----
-----
 Top