22 October Thursday
ആറ്‌ മന്ത്രിമാർക്കെതിരെ ഗുരുതര ആക്ഷേപം; അന്വേഷണം

പാറ്റൂർ മുതൽ പാലാരിവട്ടം വരെ ; അറ്റമില്ലാതെ അഴിമതിക്കഥ ; യുഡിഎഫ്‌ കാലത്ത്‌ അഴിമതിയുടെ അയ്യരുകളി

പ്രത്യേക ലേഖകൻUpdated: Wednesday Sep 23, 2020


തിരുവനന്തപുരം
പാലാരിവട്ടം പാലം പൊളിച്ചുപണിയണമെന്ന സുപ്രീംകോടതി വിധിയോടെ തങ്ങളുടെ ഭരണകാലത്തെ മറ്റൊരു വൻ അഴിമതികൂടി യുഡിഎഫിനെ തുറിച്ചുനോക്കുകയാണ്‌. പൊളിച്ചുമാറ്റി പുതിയത്‌ നിർമിച്ചാലും യുഡിഎഫ്‌ അഴിമതിയുടെ നിത്യസ്‌മാരകമായി പാലാരിവട്ടം പാലം രാഷ്‌ട്രീയ കേരളത്തിന്റെ ഓർമയിൽ സജീവമായി നിലനിൽക്കും.

മുൻ സർക്കാരിലെ മുഖ്യമന്ത്രിയടക്കം ആറ്‌ മന്ത്രിമാർക്കെതിരായ ഗുരുതരമായ അഴിമതിക്കേസാണുള്ളത്‌. ഇവയെല്ലാം അന്വേഷണത്തിന്റെ വിവിധ ഘട്ടത്തിലാണിേപ്പോൾ‌‌. ഉമ്മൻചാണ്ടി പ്രതിയായ പാറ്റൂർ ഫ്‌ളാറ്റ്‌ കേസ്‌ മുതൽ പാലാരിവട്ടം അഴിമതിവരെ  ഇതിലുൾപ്പെടും. അനധികൃത സ്വത്ത്‌ സമ്പാദനത്തിൽ മൂന്ന്‌ മുൻ മന്ത്രിമാർക്കെതിരെയാണ്‌ കേസ്‌. സോളാർ അഴിമതി, പാറ്റൂർ ഫ്‌ളാറ്റ്‌ നിർമാണം, കടകംപള്ളി ഭൂമി തട്ടിപ്പ്‌ എന്നിവയിലാണ്‌ ഉമ്മൻചാണ്ടി ആരോപണ വിധേയനായത്‌. ഇതിന്‌ പുറമെ സംസ്ഥാന സർക്കാർ സിബിഐക്ക്‌ വിട്ട ടൈറ്റാനിയം അഴിമതിക്കേസിലും ഉമ്മൻചാണ്ടി പ്രതിപ്പട്ടികയിലുണ്ട്‌. പാലാരിവട്ടം അഴിമതിയിൽ മുഖ്യ പ്രതിയായ മുൻ പൊതുമരാമത്ത്‌ മന്ത്രി വി കെ ഇബ്രാഹിം കുഞ്ഞ്‌, വ്യവസായമന്ത്രിയായിരുന്ന കാലത്ത്‌ അരങ്ങേറിയ ടൈറ്റാനിയം അഴിമതി കേസിലും പ്രതിയാണ്‌.


 

പി കെ കുഞ്ഞാലിക്കുട്ടി, അടൂർ പ്രകാശ്‌, കെ ബാബു, വി എസ്‌ ശിവകുമാർ എന്നിവരും‌ വിവിധ അഴിമതിക്കേസുകളിൽ അന്വേഷണ പരിധിയിലുണ്ട്‌‌. സർക്കാർ ഭൂമി കൈയേറിയ പാറ്റൂർ ഫ്‌ളാറ്റ്‌ നിർമാണ കേസിൽ ഹൈക്കോടതി നിർദേശത്തെ തുടർന്നാണ്‌ തുടർനടപടി അവസാനിപ്പിച്ചത്‌. കെ ബാബുവിനെതിരെ ബാർ കോഴ അഴിമതിക്ക്‌ പുറമെ അവിഹിത സ്വത്ത്‌ സമ്പാദന കേസുമുണ്ട്‌. മൂവാറ്റുപുഴ വിജിലൻസ്‌ കോടതിയിൽ  ഈ കേസ്‌ വിചാരണയിലാണ്‌. പി കെ കുഞ്ഞാലിക്കുട്ടി, അടൂർ പ്രകാശ്‌ എന്നിവർ എറണാകുളം ഐടി പാർക്കിന്‌ നെൽവയൽ ഭൂമി അനുവദിച്ചതിലാണ്‌ അന്വേഷണം നേരിടുന്നത്‌. ഇതിന്റെ വസ്‌തുതാ അന്വേഷണ റിപ്പോർട്ട്‌ വിജിലൻസ്‌ എഡിജിപിയുടെ പരിഗണനയിലാണ്‌. റവന്യൂഭൂമി പതിച്ചുകൊടുത്തതു സംബന്ധിച്ചും അടൂർ പ്രകാശ്‌ അന്വേഷണം നേരിടുന്നുണ്ട്‌. വി എസ്‌ ശിവകുമാറിനെതിരായ അനധികൃത സ്വത്ത്‌ സമ്പാദന കേസിൽ അന്വേഷണം അന്തിമഘട്ടത്തിലാണ്‌.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

മറ്റു വാർത്തകൾ

----
പ്രധാന വാർത്തകൾ
-----
-----
 Top