യുഎഇ ദേശീയദിനം: ആഘോഷത്തിന്‌ മാർഗരേഖ

ഷാർജ : യുഎഇയുടെ 54–ാ-ം ദേശീയദിനത്തിന്റെ ഭാഗമായുള്ള ആഘോഷങ്ങൾ സുരക്ഷിതമാക്കാൻ മാർഗനിർദേശങ്ങളുമായി ആഭ്യന്തരമന്ത്രാലയം. പൊതു ആഘോഷങ്ങൾ റോഡ് സുരക്ഷയ്ക്ക് ഭീഷണിയോ പൊതുക്രമത്തെ ബാധിക്കുകയോ ചെയ്യരുതെന്ന് അധികൃതർ വ്യക്തമാക്കി. അനധികൃതമായി സംഘം ചേരുക, ഗതാഗതം തടസ്സപ്പെടുത്തുക, റോഡുകൾ തടയുക, ഡ്രൈവിങ്‌ ജനലിലൂടെയോ, സൺ റൂഫിലൂടെയോ പുറത്തേക്ക്‌ ചാഞ്ഞുനിൽക്കുക, അനുവദനീയമായതിലും കൂടുതൽ ആളുകളെ കയറ്റുക എന്നിവയ്ക്കെല്ലാം കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്.

വാഹനങ്ങളുടെ നമ്പർ പ്ലേറ്റുകൾ, വിൻഡോകൾ എന്നിവ മറച്ചുവയ്ക്കുകയോ അമിത ശബ്‌ദമുണ്ടാക്കുകയോ ചെയ്യരുത്. ദേശീയ ദിനവുമായി ബന്ധപ്പെടാത്ത ഷാളുകൾ ധരിക്കുന്നതിനും നിരോധനമുണ്ട്. യുഎഇയുടേതല്ലാത്ത പതാകകൾ ഉയർത്തൽ, വാഹനങ്ങളിൽ സ്‌പ്രേ പെയിന്റ്‌ ഉപയോഗിക്കൽ, ദേശീയ ദിനവുമായി ബന്ധമില്ലാത്ത പാട്ടുകൾ ഉച്ചത്തിൽ വയ്ക്കൽ എന്നിവയും നിരോധിച്ചിട്ടുണ്ട്‌. നിയമം ലംഘിക്കുന്ന വാഹനങ്ങൾ പിടിച്ചെടുക്കുകയും പിഴചുമത്തുകയും ചെയ്യും. വാഹനങ്ങളിൽ ഔദ്യോഗിക ഈദ് ഇത്തിഹാദ് സ്റ്റിക്കറുകൾ ഉപയോഗിക്കാനും ദേശീയ ദിനം ആഘോഷിക്കാനായി യുഎഇ പതാക ഉയർത്തുന്നതിനും അധികാരികൾ താമസക്കാരോട് അഭ്യർഥിച്ചിട്ടുണ്ട്. പതാക പ്രദർശിപ്പിക്കേണ്ട 15 നിയമങ്ങളും പുറപ്പെടുവിച്ചു. എല്ലാ ആഘോഷ പരിപാടികളും പതാക ഉയർത്തുന്ന ചടങ്ങുകളും രാജ്യത്തോടുള്ള ബഹുമാനവും ആദരവും പ്രകടിപ്പിക്കുന്ന വിധത്തിൽ ആയിരിക്കണമെന്നും അധികൃതർ നിർദ്ദേശിച്ചു.