ദാഹജലത്തിന്‌ പദ്ധതിയുമായി യുഎഇ

ദുബായ് : ഇസ്രയേൽ ആക്രമണത്തിൽ ദുരിതമനുഭവിക്കുന്ന പലസ്‌തീൻ ജനതയ്ക്കുള്ള പിന്തുണയുടെ ഭാഗമായി ഗാസയിലെ കുടിവെള്ള പ്രതിസന്ധി ലഘൂകരിക്കാൻ യുഎഇ. ഓപ്പറേഷൻ ചിവലറസ് നൈറ്റ് 3 പദ്ധതിയുടെ ഭാഗമായി 21 ടാങ്കർ ഗാസയിലെ തീരദേശ മുനിസിപ്പാലിറ്റി ജല അതോറിറ്റിക്ക് കൈമാറി. ഏകദേശം രണ്ടു ലക്ഷം പേർക്ക് ഗുണം ചെയ്യുന്നവിധം ഈ ടാങ്കറുകൾ ഉപയോഗിക്കും. ഓരോ യാത്രയിലും ഏകദേശം 1.5 ലക്ഷം ലിറ്റർ വെള്ളം എത്തിക്കാനാകും. ഓരോ ടാങ്കറും 10 ക്യൂബിക് മീറ്റർ ശേഷിയുള്ളതാണ്.

ഇതിലൂടെ ഗാസയിലെ ദുരിതബാധിത പ്രദേശങ്ങളിലാകെ ഉപ്പുവെള്ള ശുദ്ധീകരണ പ്ലാന്റുകളിൽനിന്ന് ലഭിക്കുന്ന കുടിവെള്ളം വിതരണം ഉറപ്പാക്കും. കഴിഞ്ഞ മാസം ആരംഭിച്ച പുതിയ പൈപ്പ്‌ലൈൻ പദ്ധതിയ്ക്കുശേഷമാണ് ഈ സഹായ പ്രവർത്തനം. അൽ അരിഷിലെ എമിറാത്തി പ്ലാന്റിൽനിന്ന് ഖാൻ യൂനിസിലെ മാവാസി മേഖലയിലേക്ക് പ്രതിദിനം 20 ലക്ഷം ഗാലൺ ശുദ്ധജലമെത്തിക്കുന്ന പൈപ്പ്‌ലൈൻ ആയിരക്കണക്കിന് ഗാസ നിവാസികൾക്ക് ആശ്വാസമായിട്ടുണ്ട്.

യുഎഇയിൽ ‘യൂറനസ് സ്റ്റാർ’ ബ്രാൻഡിന് അനുമതിയില്ലെന്ന് മന്ത്രാലയം

ദുബായ്: ‘യൂറനസ് സ്റ്റാർ’ എന്ന പേരിലുള്ള വെള്ള ബ്രാൻഡിനോ അതേ കമ്പനിയുടെ മറ്റ് ഉൽപ്പന്നങ്ങൾക്കോ യുഎഇയിൽ ഇറക്കുമതിയ്ക്ക് അല്ലെങ്കിൽ വിൽപ്പനയ്ക്ക് ഔദ്യോഗിക അനുമതി നൽകിയിട്ടില്ലെന്ന് യുഎഇ കാലാവസ്ഥാ, പരിസ്ഥിതി മന്ത്രാലയം സ്ഥിരീകരിച്ചു. രാജ്യത്തെ പ്രധാന റീട്ടെയിൽ വിപണികളിൽ ഈ ബ്രാൻഡിന്റെ ഉൽപ്പന്നങ്ങൾ കണ്ടെത്തിയിട്ടില്ലെന്നും മന്ത്രാലയം അറിയിച്ചു.

ഒമാനിൽ ഈ ബ്രാൻഡുമായി ബന്ധപ്പെട്ട മലിനീകരണ റിപ്പോർട്ടുകൾ പുറത്തുവന്നതിനെ തുടർന്ന്, മന്ത്രാലയം ഉടൻ തന്നെ പരിശോധനയും നടപടികളും ആരംഭിക്കുകയും ഈ ഉൽപ്പന്നം യുഎഇ വിപണിയിൽ വിൽക്കാതിരിക്കാൻ കർശന നിയന്ത്രണങ്ങൾ ഏർപ്പെടുത്തുകയും ചെയ്തു.

മറ്റു മാർഗങ്ങളിലൂടെ കമ്പനിയുടെ വെള്ളം ലഭിച്ചിട്ടുള്ളവർ അതിനെ ഉടൻ തന്നെ ഉപേക്ഷിക്കണമെന്നും ഉപയോഗിക്കുന്നത് ആരോഗ്യത്തിന് അപകടമാണെന്നും അധികാരികൾ മുന്നറിയിപ്പ് നൽകി.