119 പേരെ ചികിത്സയ്ക്കായി മാറ്റിപ്പാർപ്പിച്ച് യുഎഇ

ദുബായ് : രോഗികളും പരിക്കേറ്റവരുമടക്കം 119 പേരെ ഗാസയിൽനിന്ന് ചികിത്സയ്ക്കായി മാറ്റിപ്പാർപ്പിച്ച് യുഎഇ. ലോകാരോഗ്യ സംഘടനയുമായി സഹകരിച്ചായിരുന്നു വിമാനമാർഗമുള്ള ഒഴിപ്പിക്കൽ. ഇസ്രയേലിലെ റമോൺ വിമാനത്താവളത്തിൽ നിന്നുള്ള വിമാനത്തിൽ ഇവരെ സുരക്ഷിതമായി മാറ്റി.

യുഎഇ പ്രസിഡൻ്റ് ഷെയ്‌ഖ് മുഹമ്മദ് ബിൻ സായിദ് അൽ നഹ്യാന്റെ നിർദേശപ്രകാരമുള്ള മനുഷ്യസ്നേഹമിഷൻ്റെ ഭാഗമാണ് ഏറ്റവും പുതിയ ഒഴിപ്പിക്കൽ. ഗാസയിൽ നിന്നുള്ള ആയിരം കുട്ടികളെയും ആയിരം അർബുദ രോഗികളെയും യുഎഇയിലെ ആശുപത്രികളിൽ ചികിത്സ നൽകുന്ന വലിയ പദ്ധതിയുടെ ഭാഗമാണിത്. ഇസ്രയേൽ ആക്രമണം ആരംഭിച്ചതിനുശേഷം ഇതുവ രെ 2904 രോഗികളെയും അവരുടെ ബന്ധുക്കളെയും യുഎഇ ചികിത്സയ്ക്കായി ഒഴിപ്പിച്ചതായി അധികൃതർ അറിയിച്ചു. വിദേശ മന്ത്രാലയത്തിലെ വികസന അന്തർദേശീയ സംഘടനകളു ടെ സഹമന്ത്രി സുൽത്താൻ അൽ ഷംസി പലസ്തീൻ ജനതയോടുള്ള യുഎഇയുടെ പ്രതിബദ്ധത ആവർത്തിച്ചു. ലോകാരോഗ്യ സംഘടനയുടെയും മറ്റ് പങ്കാളികളുടെയും സഹായത്തോടെ യുഎഇ ആശുപത്രികളിലും എമിറേറ്റ്സ് ഹ്യൂമാനിറ്റേറിയൻ സിറ്റിയിലുമുള്ള ചികിത്സ പിന്തുണ തുടരുകയാണെന്നും അദ്ദേഹം പറഞ്ഞു. അൽ അരിഷ് തീരത്ത് യുഎഇയുടെ ആശുപത്രി കപ്പൽ പ്രവർത്തിച്ചുകൊണ്ടിരിക്കുകയാണ്. തെക്കൻ ഗാസയിലെ ഫീൽഡ് ആശുപത്രിയും ചികിത്സാസേവനങ്ങൾ നൽകുന്നുണ്ട്.