ഷാർജയിൽ മാധ്യമ പദ്ധതി പാക്കേജിന് അംഗീകാരം

ഷാർജ : ഷാർജ മീഡിയ സിറ്റിയിലെ പ്രധാന മാധ്യമ പദ്ധതികളുടെ പാക്കേജിന് സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി അംഗീകാരം നൽകി. എമിറേറ്റിലെ അടിസ്ഥാന മാധ്യമ സൗകര്യങ്ങൾ വികസിപ്പിക്കാനും സർക്കാർ ഏജൻസികളുടെ സംയോജനത്തിനും ഏകീകൃത മീഡിയ ഹബ് വഴിയൊരുക്കും. നൂതനാശയങ്ങൾ, അന്താരാഷ്ട്ര പങ്കാളിത്തം, ആധുനിക സാങ്കേതികവിദ്യകൾ എന്നിവയിൽ അധിഷ്ഠിതമായ നൂതന മാധ്യമ മേഖല കെട്ടിപ്പടുക്കുകയെന്ന എമിറേറ്റിന്റെ ദർശനം പദ്ധതി നിറവേറ്റും.

സ്റ്റുഡിയോ ആരംഭിക്കുന്നത് പ്രമുഖ നിർമാണ കമ്പനികളെയും ഉള്ളടക്ക സ്രഷ്ടാക്കളെയും ആകർഷിക്കാനുള്ള കഴിവ് വർധിപ്പിക്കും. ദേശീയ പ്രതിഭകൾക്ക് അവരുടെ കഴിവ്‌ വികസിപ്പിക്കാനുള്ള പ്രൊഫഷണൽ പ്ലാറ്റ്ഫോമും ഇതുവഴി സജ്ജമാകും. ഷാർജ മീഡിയ കൗൺസിൽ, ഷാർജ സർക്കാർ മീഡിയ ബ്യൂറോ, ഷാർജ ബ്രോഡ്കാസ്റ്റിങ്‌ ടെലിവിഷൻ അതോറിറ്റി എന്നിവയെ ഒരു കുടക്കീഴിൽ കൊണ്ടുവരുന്നതാണ്‌ പദ്ധതി. യുഎഇയിലെയും മറ്റു മേഖലകളിലെയും ഏറ്റവും വലിയ ഏകീകൃത സർക്കാർ ക്ലസ്റ്ററാണ് ഇതോടെ യാഥാർഥ്യമാകുന്നത്.

1500 ചതുരശ്ര മീറ്റർമുതൽ 3400 ചതുരശ്ര മീറ്റർവരെ വലിപ്പമുള്ള അഞ്ച്‌ പ്രധാന സ്റ്റുഡിയോകൾ ഉൾപ്പെടുന്നതാണ്‌ സമുച്ചയം. ഷാർജ ബ്രോഡ്കാസ്റ്റിങ്‌ ആൻഡ് ടെലിവിഷൻ അതോറിറ്റിക്കായി ആധുനിക സാങ്കേതിക അടിസ്ഥാന സൗകര്യങ്ങളോടുകൂടിയ പുതിയ കെട്ടിടത്തിന്റെ നിർമാണവും 700 പേർക്ക് ഇരിക്കാൻ കഴിയുന്ന തിയറ്റർ ഉൾപ്പെടുന്ന ഷംസ് ഒയാസിസ് ഫോർ ക്രിയേറ്റിവിറ്റിയും പദ്ധതിയിലുണ്ട്.