ഗാസയ്ക്കായി 1 കോടി ഭക്ഷണപ്പൊതി; സഹായ പദ്ധതിയുമായി യുഎഇ

ദുബായ് : ഗാസയിൽ അഭയാർഥികളായ കുടുംബങ്ങൾക്ക് അടിയന്തര സഹായം നൽകാനായി പദ്ധതിയുമായി യുഎഇ. മുഹമ്മദ് ബിൻ റാഷിദ് അൽ മക്തൂം ആഗോള സംരംഭമാണ്‌ ( എംബിആർജിഐ) ഗാസയിലേക്ക്‌ ഒരു കോടി ഭക്ഷണപ്പൊതി എത്തിക്കുന്ന പദ്ധതി നടപ്പാക്കുന്നത്‌. പലസ്‌തീൻ ജനതയെ സഹായിക്കാനുള്ള യുഎഇയുടെ ഓപ്പറേഷൻ ചിവാൽറസ് നൈറ്റ് മൂന്നിന്റെ സഹകരണത്തോടെയുള്ള സഹായം മുഹമ്മദ് ബിൻ റാഷിദ് ഹ്യൂമാനിറ്റേറിയൻ ഷിപ്പ് വഴി ഗാസയിലെത്തിക്കും. ഭക്ഷണപ്പൊതി തയ്യാറാക്കാൻ സ്വമേധയ പ്രവർത്തിക്കാൻ ആഗ്രഹിക്കുന്നവർക്കായി ഡിസംബർ ഏഴി-ന് എക്‌സ്‌പോ സിറ്റിയിലെ ദുബായ് എക്സിബിഷൻ സെന്ററിൽ പ്രത്യേക പരിപാടി സംഘടിപ്പിക്കും. MBRship.ae വഴിയാണ്‌ രജിസ്‌ട്രേഷൻ.

ഗാസയിലെ മനുഷ്യരുടെ ദുരിതം ലഘൂകരിക്കാനുള്ള യുഎഇയുടെ പ്രതിബദ്ധത വീണ്ടും തെളിയിക്കുന്നതാണ്‌ പദ്ധതിയെന്ന്‌ യുഎഇ മന്ത്രിയും എംബിആർജിഐ സെക്രട്ടറി ജനറലുമായ മുഹമ്മദ് അൽ ഗർഗാവി പറഞ്ഞു. ഗാസയിലെ ഒരു ലക്ഷം പേർക്ക് ഭക്ഷ്യസഹായം നൽകാനുള്ള 4.30 കോടി ദിർഹം മൂല്യമുള്ള ക്യാന്പയിന്റെ തുടർച്ചയാണിത്‌. 2023ൽ ഉപപ്രധാനമന്ത്രി ഷെയ്ഖ് മുഹമ്മദ് ബിൻ റാഷിദ് അൽ മക്തൂം പലസ്‌തീൻ ജനതയ്‌ക്ക് അഞ്ചു കോടി ദിർഹം മൂല്യമുള്ള അടിയന്തര സഹായം നൽകാൻ നിർദേശിച്ചിരുന്നു. 2024 സെപ്തംബറിൽ ദുബായ് ഹ്യൂമാനിറ്റേറിയൻ ഈജിപ്തിലെ എൽ -അരിഷ് തുറമുഖം വഴി ഗാസയ്ക്ക് 71.6 ടൺ അടിയന്തര മെഡിക്കൽ സാധനങ്ങളും അയച്ചിരുന്നു.