26 August Monday

ഇറാന്‍ സംഘര്‍ഷം: 30ന് മക്കയില്‍ ഗള്‍ഫ് - അറബ് ഉച്ചകോടി

അനസ് യാസിന്‍Updated: Monday May 20, 2019

മനാമ> ഗള്‍ഫ് മേഖലയിലെ സുരക്ഷയും അതു വര്‍ധിപ്പിക്കാനുളള മാര്‍ഗങ്ങളും ചര്‍ച്ച ചെയ്യാനായി അടിയന്തിര ഗള്‍ഫ്, അറബ് ഉച്ചകോടി വിളിച്ചു ചേര്‍ക്കാന്‍ സൗദി ഭരണാധികാരി സല്‍മാന്‍ രാജാവ് നിര്‍ദേശിച്ചു. മെയ് 30ന് മക്കയിലാണ് ഉച്ചകോടി ചേരുകയെന്ന് സൗദി വിദേശ മന്ത്രാലയം അറിയിച്ചു.

ഈയിടെ നടന്ന ആക്രമണങ്ങളും അതിന്റെ പ്രത്യാഘാതവും ഉച്ചകോടി ചര്‍ച്ച ചെയ്യുമെന്ന് സൗദി പ്രസ് ഏജന്‍സി അറിയിച്ചു. റമദാന്‍ അവസാനവാരം മക്കയില്‍ ചേരുന്ന ഇസ്ലാമിക ഉച്ചകോടിക്ക് പുറമെയാണ് സുരക്ഷാ കാര്യങ്ങള്‍ വിശകലനം ചെയ്യാനായി പ്രത്യേക ഉച്ചകോടി. ഗള്‍ഫ് ഭരണാധികാരികള്‍, അറബ് ലീഗ് അംഗ രാജ്യങ്ങളിലെ ഭരണാധികാരികള്‍ എന്നിവര്‍ ഉച്ചകോടിയില്‍ പങ്കെടുക്കും.

യുഎഇ സമുദ്രാതിര്‍ത്തിയില്‍ എണ്ണക്കപ്പലുകള്‍ അട്ടിമറിക്കാന്‍ നടത്തിയ ശ്രമവും സൗദിയിലെ രണ്ട് എണ്ണ പമ്പിംഗ് സ്റ്റേഷനുള്‍ക്കുനേരെ ഇറാന്‍ പിന്‍തുണയുള്ള ഹൂതികള്‍ നടത്തിയ ഡ്രോണ്‍ ആക്രമണവുമാണ് അസാധാരണ ഉച്ചകോടി വിളിക്കാന്‍ കാരണം. മേഖലയിലെ സുരക്ഷയുമായും സ്ഥിരതയുമായും ബന്ധപ്പെട്ട വിഷയങ്ങളില്‍ സഹോദര രാഷ്ട്രങ്ങളുമായി കൂടിയാലോചിക്കുക എന്നത് രാജവ് പിന്തുടരുന്ന നയമാണെന്നും ഇതിന്റെ ഭാഗമായാണ് അയിന്തര യോഗം വിളിച്ചതെന്നും വിദേശ മന്ത്രാലയ വൃത്തങ്ങള്‍ പറഞ്ഞു.

മേഖലയിലെ സംഘര്‍ഷങ്ങളുടെ പാശ്ചാത്തലത്തില്‍ സൗദി അടിയന്തിര ഉച്ചകോടി വിളിച്ചു ചേര്‍ക്കാന്‍ പദ്ധതിയിടുന്നതായി കഴിഞ്ഞ ദിവസം റിപ്പോര്‍ട്ടുണ്ടായിരുന്നു.
മേഖലയില്‍ യുദ്ധം ഒഴിവാക്കാന്‍ സൗദി ആവും വിധം ശ്രമിക്കുന്നുണ്ടെന്നും എന്നാല്‍, ഏതൊരു ഭീഷണിയേയും പരാജയപ്പെടുത്താന്‍ ഉറച്ച നിശ്ചയദാര്‍ഡ്യമുണ്ടെന്നും സൗദി വിദേശ മന്ത്രി ആദെല്‍ അല്‍ ജുബൈര്‍ വ്യക്തമാക്കി. ഞായറാഴ്ച റിയാദില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.

സൗദി യുദ്ധം ആഗ്രഹിക്കുന്നില്ല, അതിനായി കാത്തിരിക്കുന്നുമില്ല. യുദ്ധം തടയാനായി എല്ലാം ചെയ്യും-അദ്ദേഹം വെളിപ്പെടുത്തി.മേഖലയെ അസ്ഥിരപ്പെടുത്താന്‍ ശ്രമിക്കുന്നതുള്‍പ്പെടെ എണ്ണമറ്റ കുറ്റകൃത്യങ്ങളാണ് ഇറാന്‍ ചെയ്യുന്നതെന്ന് മന്ത്രി ആരോപിച്ചു. കുറ്റകൃത്യങ്ങള്‍ ചെയ്യുന്നതില്‍ നിന്ന് ഇറാനെ തടയാനുള്ള ഉത്തരവാദിത്വം അന്താരാഷ്ട്ര സമൂഹം സ്വീകരിക്കണം.
അടിയന്തര ജിസിസി - അറബ് ഉച്ചകോടിയെ യുഎഇ സ്വാഗതം ചെയ്തു. സമാധാനവും സുസ്ഥിരതയും സ്ഥാപിക്കാനും സംയുക്ത സുരക്ഷയും പരമാധികാരവും നേട്ടങ്ങളും ഉറപ്പുവരുത്താനുള്ള അവസരമാണ് ഉച്ചകോടി മുന്നോട്ട് വെക്കുന്നതെന്നും യുഎഇ വിദേശ മന്ത്രാലയം പ്രസ്താവനയില്‍ പറഞ്ഞു.

അതിനിടെ, പേര്‍ഷ്യന്‍ ഗള്‍ഫ് മേഖലയില്‍ അമേരിക്കയുടെ ആകാശ യാത്ര സുരക്ഷാ മുന്നറിയിപ്പ് നിലനില്‍ക്കെ, യുഎഇ എയര്‍ലൈന്‍സുകളായ എമിറേറ്റ്‌സ്, ഇത്തിഹാദ്, ഫ്‌ളൈ ദുബായ് എന്നിവ ഞായറാഴ്ചയും സാധാരണപോലെ സര്‍വീസ് നടത്തി. കാര്യങ്ങള്‍ സൂക്ഷമായി നിരീക്ഷിച്ചുവരികയാണെന്നും എന്നാല്‍ ഇതുവരെ സര്‍വീസില്‍ മാറ്റം വരുത്തിയിട്ടില്ലെന്നും എയര്‍ലൈന്‍സുകളെ ഉദ്ധരിച്ച് ഗള്‍ഫ് ന്യൂസ് റിപ്പോര്‍ട്ട് ചെയ്തു. മേഖലയില്‍ ഇറാന്‍ - അമേരിക്ക സംഘര്‍ഷം രൂക്ഷമാകുകയും പടയൊരുക്കം ശക്തമാക്കുകയും ചെയ്ത സാഹചര്യത്തിലാണ് അമേരിക്കന്‍ മുന്നറിയിപ്പ്.

ഇറാനിലേക്കും ഇറാഖിലേക്കും യാത്ര ചെയ്യരുതെന്ന് ബഹ്‌റൈന്‍ ജനങ്ങള്‍ക്ക് മുന്നറിയിപ്പ് നല്‍കി. രണ്ടു രാജ്യങ്ങളിലുമുള്ള ബഹ്‌റൈനികളോട് തിരിച്ചുവരാനും ആവശ്യപ്പെട്ടു.


പ്രധാന വാർത്തകൾ
 Top