16 July Tuesday

പേർഷ്യൻ കടലിൽ പടയൊരുക്കം; ഇറാന‌് മുകളിൽ യുഎസ‌് ബോംബറുകൾ

വെബ് ഡെസ്‌ക്‌Updated: Wednesday May 15, 2019

വാഷിങ‌്ടൺ> ഇറാന‌് ഭീഷണിയുമായി പേർഷ്യൻ ഉൾക്കടലിൽ അമേരിക്കൻ സൈനിക നീക്കം ശക്തമാക്കി. പേർഷ്യ ഉൾക്കടലിനുമുകളിൽ അമേരിക്ക ബി52 ബോംബർ വിമാനങ്ങൾ  പറത്തി. മധ്യ പൂർവ ദേശത്ത‌് ഇറാന്റെ ‘ഭീഷണി’ തടയുന്നതിന‌് നിരീക്ഷണ പറക്കൽ നടത്തിയതായി അമേരിക്കൻ വ്യോമസേനയുടെ സെൻട്രൽ കമാൻഡ‌് വെളിപ്പെടുത്തി. യുഎഇയിലെ ഫുജൈറ തീരത്ത‌് രണ്ട‌് സൗദി എണ്ണക്കപ്പൽ ആക്രമിച്ചുവെന്ന വാർത്തക്കുപിന്നാലെയാണ‌് അമേരിക്കയുടെ സൈനിക നീക്കം.

ഇറാനുമായുള്ള സൈനിക നയം പുനപരിശോധിക്കാൻ അമേരിക്ക തീരുമാനിച്ചതായി ന്യൂയോർക്ക‌് ടൈംസ‌് റിപ്പോർട്ട‌് ചെയ‌്തു. യുഎസ‌് പ്രതിരോധവിഭാഗം പുതിയ സൈനികപദ്ധതി പ്രസിഡന്റ‌് ഡോണൾഡ‌് ട്രംപിന‌് സമർപ്പിച്ചു. ഇറാൻ ആക്രമിക്കാനായി 1,20,000  സൈനികരെ നിയോഗിക്കണമെന്നാണ‌് പ്രതിരോധ സെക്രട്ടറി പാട്രിക‌് ഷാനഹാൻ   സമർപ്പിച്ച റിപ്പോർട്ടിൽ പറയുന്നത‌്.ആയുധനിയന്ത്രണത്തിന‌് ഇറാനുമേൽ സമ്മർദ്ദമുയർത്തുകയാണ‌് അമേരിക്കയുടെ ലക്ഷ്യം. എന്നാൽ, വിഷയത്തിൽ പെന്റഗണും വൈറ്റ‌് ഹൗസും പ്രതികരിച്ചില്ല.

അമേരിക്കൻ വ്യോമ സേനയുടെ ബി 52 ദീർഘദൂര ബോംബർ വിമാനങ്ങൾ ഉൾപ്പെടെ കഴിഞ്ഞദിവസം നടന്ന സൈനിക നീക്കത്തിൽ പങ്കാളിയായി. യുഎസ‌്എസ‌് എബ്രഹാം ലിങ്കൺ ഉൾപ്പെടെ രണ്ട‌് യുദ്ധക്കപ്പലുകളും നാല‌് നശീകരണ കപ്പലുകളും ജോയിന്റ‌് സ‌്ട്രൈക്ക‌് പോർവിമാനങ്ങളും മേഖലയിൽ സജ്ജമാണെന്ന‌് അമേരിക്കൻ സൈനിക വൃത്തങ്ങൾ വെളിപ്പെടുത്തി. നിലവിൽ ഖത്തർ, കുവൈത്ത‌്, ജോർദാൻ എന്നീ രാജ്യങ്ങളിൽ അമേരിക്കൻ സൈനിക താവളങ്ങളുണ്ട‌്‌. കൂടാതെ, അടിയന്തിര ഘട്ടത്തിൽ സിറിയ, അഫ‌്ഗാനിസ്ഥാൻ എന്നിവിടങ്ങളിൽനിന്നും സൈന്യത്തെ പേർഷ്യൻ മേഖലയിലേക്ക‌് കൊണ്ടുവരാനാകും എന്നും അമേരിക്ക കണക്കുകുട്ടുന്നു.
 
ഇറാനുമായുള്ള 2015ലെ ആണവ കരാറിൽനിന്ന‌് കഴിഞ്ഞവർഷം ഡോണൾഡ‌് ട്രംപ‌് പിന്മാറിയതോടെ ഇരുരാജ്യങ്ങളും തമ്മിൽ സംഘർഷം നിലനിൽക്കുകയാണ‌്. ഇതേത്തുടർന്ന‌് അമേരിക്ക‌ ഇറാനുമേൽ വൻ ഉപരോധങ്ങൾ ഏർപ്പെടുത്തി. അമേരിക്ക നടത്തുന്നത‌് മനഃശാസ‌്ത്രപരമായ യുദ്ധതന്ത്രമാണെന്ന‌് ഇറാൻ പ്രതികരിച്ചു. യുഎസ‌ിന്റെ സൈനിക സാന്നിധ്യം ഭീഷണിയെക്കാൾ ഒരു ലക്ഷ്യമിടലാണ‌്. തങ്ങളുടെ എണ്ണക്കയറ്റുമതി നിർത്തലാക്കാൻ അനുവദിക്കില്ലെന്നും ഇറാൻ പറഞ്ഞു.


പ്രധാന വാർത്തകൾ
 Top