23 August Friday

ഗള്‍ഫ് രാജ്യങ്ങളില്‍ അമേരിക്കന്‍ സൈന്യത്തെ വിന്യസിക്കുന്നു

അനസ് യാസിന്‍Updated: Saturday May 18, 2019

മനാമ
പശ്ചിമേഷ്യൻ സംഘർഷ പശ്ചാത്തലത്തിൽ ഗൾഫ് രാജ്യങ്ങളിലും അറേബ്യൻ ഗൾഫ് കടൽ മേഖലകളിലും അമേരിക്കൻ സൈന്യത്തെ വിന്യസിക്കുന്നു. ഇറാനിൽനിന്ന‌് ഉണ്ടായേക്കാവുന്ന ആക്രമണം തടയാനായി സൈന്യത്തെ വിന്യസിക്കാൻ അനുവദിക്കണമെന്ന അമേരിക്കൻ അഭ്യർഥന സൗദിയടക്കമുള്ള ഗൾഫ് രാജ്യങ്ങൾ അംഗീകരിച്ചതായി അറബ് നയതന്ത്ര വൃത്തങ്ങളെ ഉദ്ധരിച്ച് റിപ്പോർട്ടുണ്ട‌്.  ഉഭയകക്ഷി ഉടമ്പടികളുടെ അടിസ്ഥാനത്തിലാണ് അനുമതിയെന്നും റിപ്പോർട്ടിലുണ്ട്.

ഇറാനിൽനിന്ന‌് അയൽ രാജ്യങ്ങൾക്കോ മേഖലയിലെ അമേരിക്കൻ താൽപ്പര്യങ്ങൾക്കോ എതിരെ ആക്രമണമോ സൈനിക ഭീഷണിയോ ഉണ്ടാകുന്നതു തടയാൻ സംയുക്തമായി പ്രവർത്തിക്കുകയാണ് പ്രധാന ലക്ഷ്യം. അമേരിക്കൻ–--ഗൾഫ് സൈന്യങ്ങളുടെ സഹകരണത്തിലൂടെ എണ്ണ വിതരണം സുരക്ഷിതമാക്കാനും സമുദ്ര ഗതാഗതം തടസ്സപ്പെടുത്തുന്നതിൽനിന്ന് ഇറാനെ തടയാനുമാകും.

ഇറാനുമായി യുദ്ധം ആരംഭിക്കാൻ സൗദിയോ മറ്റു ഗൾഫ് രാജ്യങ്ങളോ ആഗ്രഹിക്കുന്നില്ലെന്നും എന്നാൽ, നിരന്തരം പ്രകോപിപ്പിച്ച് പരിധി ലംഘിക്കരുതെന്ന സന്ദേശം ഇറാന് നൽകേണ്ടതുണ്ടെന്നും മാധ്യമങ്ങൾ റിപ്പോർട്ട് ചെയ്തു. ഇറാന്റെ ആക്രമണോത്സുക പെരുമാറ്റത്തിന്റെ പാശ്ചാത്തലത്തിൽ മേഖലയിലെ സംഭവവികാസങ്ങൾ നിരീക്ഷിച്ചുവരുന്നതായി സൗദി അറിയിച്ചു. ഇറാനുമായി സൗദി യുദ്ധം ആഗ്രഹിക്കുന്നില്ലെന്നും എന്നാൽ, ഏത് ആക്രമണത്തിൽനിന്നും രാജ്യത്തെ സംരക്ഷിക്കാൻ സൗദിക്ക് കഴിയുമെന്നും ശർഖുൽ ഔസ്ത‌് പത്രം റിപ്പോർട്ട് ചെയ്തു.

റമദാൻ അവസാനം മക്കയിൽ ചേരുന്ന ഇസ്ലാമിക് ഉച്ചകോടിക്കിടെ, പ്രത്യേക യോഗം ചേർന്ന് അറബ് രാജ്യങ്ങൾ സ്ഥിതിഗതികൾ വിലയിരുത്തുമെന്നും ബന്ധപ്പെട്ട വൃത്തങ്ങൾ വെളിപ്പെടുത്തി.യുഎഇ തീരത്ത് എണ്ണക്കപ്പലുകളും സൗദി അറേബ്യയിൽ എണ്ണ പൈപ്പ് ലൈനുകളും ആക്രമിക്കപ്പെട്ടതിനെ തുടർന്ന് മേഖലയിൽ സംഘർഷം കനക്കുകയാണ്. നിലവിൽ പല ഗൾഫ് രാജ്യങ്ങളിലും അമേരിക്കൻ സൈനിക സാന്നിധ്യമുണ്ട്. പുതിയ മേഖലകളിലാകും സൈന്യത്തെ വിന്യസിപ്പിക്കുകയെന്നാണ‌് വിവരം. 12 മധ്യപൂർവേഷ്യൻ രാജ്യങ്ങളിലായി അമേരിക്കക്ക് 54,000 സൈനികർ ഉണ്ട്.

മറ്റു വാർത്തകൾ

പ്രധാന വാർത്തകൾ
 Top