26 June Wednesday

മുറിവൈദ്യൻമാർ വിനയായി; പാകിസ്ഥാനിൽ 400ലധികം കുട്ടികൾക്ക‌് എച്ച‌്ഐവി

വെബ് ഡെസ്‌ക്‌Updated: Friday May 17, 2019

ഇസ്ലാമാബാദ‌്> ദക്ഷിണ പാകിസ്ഥാനിൽ നാനൂറിലധികം കുട്ടികൾക്ക‌് എച്ച‌്ഐവി സ്ഥിരീകരിച്ചു. അണുബാധിതമായ സിറിഞ്ച‌് ഉപയോഗിച്ച‌് കുട്ടികൾക്ക‌് കുത്തിവയ്പ്പ‌് നൽകിയതിനാലാണ‌് ഇത്രയധികം കുട്ടികൾക്ക‌് രോഗമുണ്ടായത‌്. സിന്ധ‌് പ്രവിശ്യയിലെ ലർക്കാനയിലെ വസായോ ജില്ലയിലാണ‌് സംഭവം. സ്ഥലത്തെ ശിശുരോഗ വിദഗ്ധന‌് സംഭവിച്ച ഗുരുതരമായ വീഴ‌്ചയാണ‌് സംഭവത്തിന‌് കാരണമായത‌്.

ഒരു തവണ ഉപയോഗിച്ച സിറിഞ്ച‌് വീണ്ടും ഉപയോഗിക്കുന്നതിനാലാണ‌് പ്രശ‌്നമുണ്ടായത‌്. ഇത്രയധികം കുട്ടികൾക്ക‌് എച്ച‌്ഐവി സ്ഥിരീകരിച്ചതോടുകൂടി തദ്ദേശവാസികൾ പരിഭ്രാന്തിയിലാണ‌്. ധാരാ‌ളമാള‌ുകളാണ‌് രക്തം പരിശോധിക്കാനായി ആശുപത്രിയിലെത്തുന്നത‌്. പാക‌് ഗ്രാമങ്ങളിലെ ആരോഗ്യ കേന്ദ്രങ്ങൾ  സാമാന്യനിലവാരമില്ലാത്തതാണ‌്. ഐക്യരാഷ‌്ട്രസഭയുടെ കണക്ക‌് പ്രകാരം പാകിസ്ഥാനിൽ 600,000 ലധികം മുറിവൈദ്യൻമാർ പ്രവർത്തിക്കുന്നുണ്ട‌്. ഇതിൽ സിന്ധ‌് പ്രവിശ്യയിൽ മാത്രമായി 270,000 പേരുണ്ട‌്. സിറിഞ്ചിന‌് നഷ‌്ടമാകുന്ന രൂപ ലാഭിക്കാനാണ‌് ഒരേ സിറിഞ്ച‌് നിരവധി ആളുകൾക്ക‌് ഉപയോഗിക്കുന്നത‌്. പ്രാഥമിക ചികിത്സ എന്ന രീതിയിൽ കുത്തിവയ്പ്പ‌് നൽകുന്നതിനാലാണ‌് രോഗം വർധിക്കുന്നത‌്.

എച്ച‌്ഐവി ബാധിതരുടെ എണ്ണം ഏറ്റവും കുറവുള്ള രാജ്യമാണ‌് പാകിസ്ഥാൻ. എന്നാൽ, അടുത്തിടെയായി അസുഖബാധിതരുടെ ‌എ‌ണ്ണം ക്രമാതീതമായി കൂടുന്നതായി കണ്ടെത്തിയിരുന്നു. പ്രത്യേകിച്ച‌് മയക്കുമരുന്ന‌് ഉപയോക്താക്കളുടെയും ലൈഗീക തൊഴിലാളികളുടെയും ഇടയിൽ. 2017 മാത്രം 20,000 പേർക്ക‌് പുതുതായി എച്ച‌്ഐവി ബാധിച്ചതായി കണ്ടെത്തിയിരുന്നു. ഐക്യരാഷ‌്ട്രസഭയുടെ പഠനമനുസരിച്ച‌് നിലവിൽ ഏഷ്യയിൽ ഏറ്റവും വേഗത്തിൽ എച്ച‌്ഐവി ബാധിതരുണ്ടാകുന്ന രാജ്യമാണ‌് പാകിസ്ഥാൻ.


പ്രധാന വാർത്തകൾ
 Top