22 September Sunday

ഇറാന്‍ സംഘര്‍ഷം: 30ന് മക്കയില്‍ ഗള്‍ഫ് -–-അറബ് ഉച്ചകോടി

അനസ് യാസിന്‍Updated: Monday May 20, 2019

മനാമ > ഗൾഫ് മേഖലയിലെ സുരക്ഷയും അത‌് ശക്തമാക്കാനുള്ള മാർഗങ്ങളും ചർച്ച ചെയ്യാനായി അടിയന്തര ഗൾഫ്–-അറബ് ഉച്ചകോടി 30ന‌് മക്കയിൽ ചേരും. ഈയിടെ നടന്ന ആക്രമണങ്ങളും അതിന്റെ പ്രത്യാഘാതവും ഉച്ചകോടി ചർച്ച ചെയ്യും. റമദാൻ അവസാനവാരം മക്കയിൽ ചേരുന്ന ഇസ്ലാമിക ഉച്ചകോടിക്ക് പുറമെയാണ് പ്രത്യേക ഉച്ചകോടി. യുഎഇ സമുദ്രാതിർത്തിയിൽ എണ്ണക്കപ്പലുകൾ അട്ടിമറിക്കാൻ നടത്തിയ ശ്രമവും സൗദിയിലെ രണ്ട് എണ്ണ പമ്പിങ‌് സ്റ്റേഷനുകൾ ഇറാൻ പിന്തുണയുള്ള ഹൂതികൾ ആക്രമിച്ചതുമാണ‌് അസാധാരണ ഉച്ചകോടി വിളിക്കാൻ കാരണം. മേഖലയിൽ യുദ്ധം ഒഴിവാക്കാൻ സൗദി ആവുംവിധം ശ്രമിക്കുന്നുണ്ടെന്നും എന്നാൽ, ഏതൊരു ഭീഷണിയും പരാജയപ്പെടുത്താൻ ഉറച്ച നിശ്ചയദാർഢ്യമുണ്ടെന്നും സൗദി വിദേശ മന്ത്രി ആദെൽ അൽ ജുബൈർ ഞായറാഴ്ച റിയാദിൽ വാർത്താ സമ്മേളനത്തിൽ വ്യക്തമാക്കി.

സൗദി യുദ്ധം ആഗ്രഹിക്കുന്നില്ല, അതിനായി കാത്തിരിക്കുന്നുമില്ല. യുദ്ധം തടയാനായി എല്ലാം ചെയ്യും-–-അദ്ദേഹം വ്യക്തമാക്കി. മേഖലയെ അസ്ഥിരപ്പെടുത്താൻ ശ്രമിക്കുന്നതുൾപ്പെടെ എണ്ണമറ്റ കുറ്റകൃത്യങ്ങളാണ് ഇറാൻ ചെയ്യുന്നതെന്ന് മന്ത്രി ആരോപിച്ചു. അടിയന്തര ജിസിസി -അറബ് ഉച്ചകോടിയെ യുഎഇ സ്വാഗതം ചെയ്തു. സമാധാനവും സുസ്ഥിരതയും സ്ഥാപിക്കാനും സംയുക്ത സുരക്ഷയും പരമാധികാരവും നേട്ടങ്ങളും ഉറപ്പുവരുത്താനുമുള്ള അവസരമാണ് ഉച്ചകോടി മുന്നോട്ട് വയ‌്ക്കുന്നതെന്നും യുഎഇ വിദേശ മന്ത്രാലയം പ്രസ്താവനയിൽ പറഞ്ഞു.
പേർഷ്യൻ ഗൾഫ് മേഖലയിൽ അമേരിക്കയുടെ ആകാശയാത്ര സുരക്ഷാ മുന്നറിയിപ്പ് നിലനിൽക്കെ, യുഎഇ എയർലൈൻസുകളായ എമിറേറ്റ്‌സ്, ഇത്തിഹാദ്, ഫ്‌ളൈ ദുബായ് എന്നിവ ഞായറാഴ്ചയും സർവീസ് നടത്തി. കാര്യങ്ങൾ സൂക്ഷ‌്‌മമായി നിരീക്ഷിച്ചുവരികയാണെന്നും എന്നാൽ, ഇതുവരെ സർവീസിൽ മാറ്റം വരുത്തിയിട്ടില്ലെന്നും എയർലൈൻസുകളെ ഉദ്ധരിച്ച് ഗൾഫ് ന്യൂസ് റിപ്പോർട്ട് ചെയ്തു. മേഖലയിൽ ഇറാൻ, -അമേരിക്ക സംഘർഷം രൂക്ഷമാകുകയും പടയൊരുക്കം ശക്തമാക്കുകയും ചെയ്ത സാഹചര്യത്തിലാണ് അമേരിക്കൻ മുന്നറിയിപ്പ്. ഇറാനിലേക്കും ഇറാഖിലേക്കും യാത്ര ചെയ്യരുതെന്ന് ബഹ്‌റൈൻ ജനങ്ങൾക്ക് മുന്നറിയിപ്പ് നൽകി.


പ്രധാന വാർത്തകൾ
 Top