17 June Monday

പലസ‌്തീന്റെ മനം കവർന്ന‌് ക്രിസ്റ്റ്യാനോ; ഇഫ്താറിന് ഭക്ഷണം എത്തിക്കുന്നതിനായി നൽകിയത‌് 1.5 ദശലക്ഷം ഡോളർ

വെബ് ഡെസ്‌ക്‌Updated: Saturday May 18, 2019

പാരീസ‌്> കായികലോകത്ത‌് ഏറ്റവും പ്രതിഫലം നേടുന്ന താരമായ ക്രിസ്റ്റ്യാനോ റൊണാൾഡോ കാരുണ്യപ്രവർത്തനങ്ങളിലും മുൻപന്തിയിലാണ‌്. ഇസ്രയേൽ ഉപരോധംമൂലം ദുരിതമനുഭവിക്കുന്ന പലസ്തീനിലെ ജനങ്ങൾക്ക് ഇഫ്താറിന് ഭക്ഷണം എത്തിക്കുന്നതിനായി 1.5 ദശലക്ഷം ഡോളർ (പത്തു കോടിയിലേറെ ഇന്ത്യൻ രൂപ) സാമ്പത്തിക സഹായം നൽകിയിരിക്കുന്നതിലൂടെയാണ‌് ഇത്തവണ റൊണാൾഡോ മാധ്യമശ്രദ്ധ പിടിച്ചുപറ്റിയത‌്. 9 സ്‌പോർട്‌സ് പ്രോ എന്ന വെബ്‌സൈറ്റാണ് ഇക്കാര്യം റിപ്പോർട്ട് ചെയ്തത‌്.

ഉപരോധത്തിൽ പലസ്തീൻ ജനത കൊടിയ പട്ടിണിയിലേക്കും ദാരിദ്ര്യത്തിലേക്കും കടന്ന സാഹചര്യത്തിലാണ‌് സഹായവാഗ‌്ദാനവുമായി പോർച്ചുഗൽ താരമെത്തിയത‌്. പലസ്തീൻ ജനതയ്ക്ക‌് ഐക്യദാർഢ്യവുമായി നേരത്തേയും നിരവധി തവണ ക്രിസ്റ്റ്യാനോ രംഗത്തെത്തിയിരിയുന്നു. ഇസ്രയേൽ നടത്തുന്ന ക്രൂരമായ മനുഷ്യാവകാശ ലംഘനങ്ങൾക്കെതിരെയും അദ്ദേഹം പരസ്യമായി പ്രതികരിച്ചിട്ടുണ്ട‌്.

2012ൽ മികച്ച താരമായി തെരഞ്ഞെടുക്കപ്പെട്ടപ്പോൾ ലഭിച്ച ഗോൾഡൻ ബൂട്ട‌് ക്രിസ്റ്റ്യാനോ ലേലംചെയ്തിരുന്നു. ഈ തുക ഇസ്രയേൽ ആക്രമണത്തിനിരയായ ഗാസയ്ക്ക‌് നൽകിയാണ‌് റൊണാൾഡോ ആരാധക പ്രശംസ പിടിച്ചുപറ്റിയത‌്. 2013ലെ ഇസ്രയേൽ പോർച്ചുഗൽ ലോകകപ്പ‌് യോഗ്യതാമത്സരത്തിൽ ഇസ്രയേൽ താരവുമായി ജേഴ്‌സി കൈമാറാൻ തയ്യാറാകാതിരുന്നതും ചർച്ചയായിരുന്നു. ഇസ്രയേൽ പതാകയുള്ള ടീഷർട്ട‌് ധരിക്കാൻ ബുദ്ധുമുട്ടാണെന്നായിരുന്നു റൊണാൾഡോയുടെ മറുപടി.

ഇതുകൂടാതെ 2016ലെ ഇസ്രയേൽ ആക്രമണത്തിൽ അനാഥനായ ബാലനെ  റിയൽ മാഡ്രിഡ‌് പരിശീലനകേന്ദ്രത്തിലെത്തിക്കുകയും തന്റെ ഒപ്പുവച്ച ജഴ‌്സി കൈമാറുകയും ചെയ്തിരുന്നു. ഏറ്റവും കൂടുതൽ ജീവകാരുണ്യ പ്രവർത്തനങ്ങൾ ചെയ്യുന്ന താരമായി റൊണാൾഡോ നിരവധി തവണ തെരഞ്ഞെടുക്കപ്പെട്ടിട്ടുണ്ട‌്.


പ്രധാന വാർത്തകൾ
 Top