21 February Friday

അതിശയ ഫെഡറർ

വെബ് ഡെസ്‌ക്‌Updated: Saturday Jan 25, 2020


മെൽബൺ
സൂപ്പർ ടൈബ്രേക്കറിൽ 4–-8ന്‌ പിന്നിട്ടുനിന്നശേഷം റോജർ ഫെഡററുടെ അത്ഭുതകരമായ തിരിച്ചുവരവ്‌. 10–-8ന്‌ ടൈബ്രേക്കർ കടന്ന്‌, അഞ്ച്‌ സെറ്റ്‌ പോരാട്ടത്തിൽ ഫെഡറർ ഓസ്‌ട്രേലിയയുടെ ജോൺ മിൽമാനെ കീഴടക്കി (4–-6, 7–-6 (2), 6–-4, 4–-6, 7–-6 (10–-8). ഓസ്‌ട്രേലിയൻ ഓപ്പണിൽ ഈ സ്വിസ്‌ താരത്തിന്റെ 100–-ാം ജയംകൂടിയായിരുന്നു ഇത്‌. വിംബിൾഡണിലും ഫെഡറർക്ക്‌ 100 ജയമുണ്ട്‌.

മിൽമാന്റെ കരുത്തുറ്റ സെർവുകൾക്കും ഫോർഹാൻഡ്‌ ഷോട്ടുകൾക്കും മുന്നിലാണ്‌ ഈമുപ്പത്തിയെട്ടുകാരൻ തളർന്നത്‌. അഞ്ചാം സെറ്റ്‌ 6–-6ന്‌ അവസാനിച്ചതോടെ കളി സൂപ്പർ ടൈബ്രേക്കിലേക്ക്‌ നീങ്ങി. തകർപ്പൻ സെർവുകളുമായി കളംപിടിച്ച മിൽമാൻ ഫെഡററെ പ്രതിരോധത്തിലാക്കി. എന്നാൽ, ശാന്തമായിനിന്ന സ്വിസ്‌ താരം അവസാന ഘട്ടത്തിൽ അസാമാന്യ പ്രകടനം നടത്തി. സൂപ്പർ ടൈബ്രേക്കർ ഇല്ലായിരുന്നെങ്കിൽ ഞാൻ തോറ്റേനെ–- മത്സരശേഷം ഫെഡറർ പറഞ്ഞു. ഹംഗറിയുടെ മാർട്ടൺ ഫുക്‌സോവിക്‌സാണ്‌ പ്രീ ക്വാർട്ടർ എതിരാളി.രണ്ടാം സീഡ്‌ നൊവാക്‌ യൊകോവിച്ചും പ്രീ ക്വാർട്ടറിലെത്തി. വനിതകളിൽ ഒന്നാം റാങ്കുകാരി ആഷ്‌ലി ബാർടി, പെട്ര ക്വിറ്റോവ എന്നിവരും മുന്നേറി.


പ്രധാന വാർത്തകൾ
 Top