17 January Sunday

തൊഴിലുടമയുടെ അനുമതിയില്ലാതെ തൊഴിൽ മാറാം, രാജ്യം വിടാം; സുപ്രധാന തൊഴില്‍ പരിഷ്‌കരണവുമായി സൗദി

അനസ് യാസിന്‍Updated: Thursday Nov 5, 2020

മനാമ > തൊഴിലുടമയടെ അനുമതിയില്ലാതെ പ്രവാസി തൊഴിലാളികള്‍ക്ക് ജോലി മാറ്റം അനുവദിക്കുകയും എക്‌സിറ്റ്, റീ-എന്‍ട്രി വിസ നടപടികള്‍ തൊഴിലാളിക്ക് സ്വയം ചെയ്യാനും കഴിയുന്ന സുപ്രധാന തൊഴില്‍ പരിഷ്‌കാരങ്ങള്‍ സൗദി അറേബ്യ ബുധനാഴ്ച പ്രഖ്യാപിച്ചു.

നിലവിലുള്ള സ്‌പോണ്‍സര്‍ഷിപ്പ് (കഫാല) സംവിധാനത്തില്‍ സമൂലമായ മാറ്റവരുത്തുന്ന നടപടിയാണിത്. രാജ്യത്തുള്ള മുഴുവന്‍ വിദേശ തൊഴിലാളികള്‍ക്കും ഈ നിയമപരിഷ്‌കരണത്തിന്റെ പ്രയോജനം ലഭിക്കും. 2021 മാര്‍ച്ച് 14 മുതല്‍ പുതിയ നിയമം പ്രാബല്യത്തില്‍ വരും.

പുതിയ തൊഴില്‍ നിയമപ്രകാരം കരാര്‍ അവസാനിച്ചാല്‍ തൊഴിലുടമയുടെ അനുമതിയില്ലാതെ മറ്റൊരു ജോലിയിലേക്ക് വിദേശ തൊഴിലാളിക്ക് മാറാന്‍ കഴിയും. നോട്ട്‌സ് കാലാവധി ഉള്‍പ്പെടെ തൊഴിലാളി തൊഴില്‍ കരാറില്‍ പറഞ്ഞ വ്യവസ്ഥകള്‍ പാലിച്ചായിരിക്കണം ഇത് ചെയ്യേണ്ടത്. റീ-എന്‍ട്രി, എക്‌സിറ്റ് പരിഷ്‌കാരം വഴി സ്‌പോണ്‍സറുടെ അനുമതിയില്ലാതെ തൊഴിലാളിക്ക് സൗദിക്ക് പുറത്ത് പോകാം. കരാര്‍ കാലാവധി അവസാനിച്ചാല്‍ തൊഴിലുടമയുടെ അനുമതി തേടാതെ ഫൈനല്‍ എക്‌സിറ്റ് വിസ നേടി നാട്ടിലേക്ക് മടങ്ങാനും സാധിക്കും.

ഈ നടപടികളെല്ലാം തൊഴിലാളിക്ക് അബ്ഷിര്‍ ആപ്പ് വഴിയും മന്ത്രാലയത്തിന്റെ ഖിവ ഓണ്‍ലൈന്‍ പോര്‍ട്ടലിലൂടെയും പൂര്‍ത്തിയാക്കാം. തൊഴിലാളി രാജ്യം വിടുന്നത് തൊഴിലുടമയെ ഓണ്‍ലൈന്‍ വഴി മന്ത്രാലയം അറിയിക്കും. ഇത്തരം സാഹചര്യങ്ങളില്‍ തൊഴില്‍ കരാര്‍ റദ്ദാക്കുന്നതിന്റെ സാമ്പത്തിക ബാധ്യതകള്‍ അടക്കം തൊഴിലാളി വഹിക്കണം.
തൊഴില്‍ അന്തരീക്ഷം കാര്യക്ഷമമാക്കാനും മെച്ചപ്പെടുത്തുന്നതിനും നടത്തിവരുന്ന പ്രവര്‍ത്തനങ്ങളുടെ തുടര്‍ച്ചയാണ് ഈ പരിഷ്‌കരണ പദ്ധതിയെയെന്ന് മാനവവിഭവ ശേഷി മന്ത്രാലയം വ്യക്തമാക്കി.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..


----
പ്രധാന വാർത്തകൾ
-----
-----
 Top