05 August Wednesday

ഇന്ന്‌ അഖിലേന്ത്യാ പ്രതിഷേധം

വെബ് ഡെസ്‌ക്‌Updated: Friday Jul 3, 2020


ന്യൂഡൽഹി
സർവമേഖലയുടെയും സ്വകാര്യവൽക്കരണത്തിനെതിരെ രാജ്യത്തെ തൊഴിലാളികൾ  വെള്ളിയാഴ്‌ച അഖിലേന്ത്യാ പ്രതിഷേധദിനം ആചരിക്കും. കൽക്കരിഖനനം, റെയിൽവേ, ഓർഡനൻസ്‌ ഫാക്ടറികൾ എന്നിവയ്‌ക്കു പിന്നാലെ ബാങ്കിങ്‌, ഇൻഷുറൻസ്‌ മേഖലകളും കോർപറേറ്റുകൾക്ക്‌ തീറെഴുതുന്ന സാഹചര്യത്തിലാണിത്‌. ഖനനസ്വകാര്യവൽക്കരണത്തിൽ പ്രതിഷേധിച്ച്‌ രാജ്യത്തെ 5.3 ലക്ഷം കൽക്കരിത്തൊഴിലാളികൾ മൂന്നുദിവസത്തെ പണിമുടക്കിലാണ്‌.

കോൾ ഇന്ത്യാ ലിമിറ്റഡിന്റെ  അനുബന്ധ സ്ഥാപനങ്ങളായ ഈസ്‌റ്റേൺ കോൾഫീൽഡ്‌സ്‌‌, ഭാരത്‌ കുക്കിങ്‌ കോൾ, സെൻട്രൽ കോൾഫീൽഡ്‌സ്‌, വെസ്‌റ്റേൺ കോൾ ഫീൽഡ്‌സ്‌, സൗത്ത്‌ ഈസ്‌റ്റേൺ കോൾഫീൽഡ്‌സ്‌, നോർത്തേൺ കോൾഫീൽഡ്‌സ്‌, മഹാനദി കോൾഫീൽഡ്‌സ്‌, നോർത്ത്‌ ഈസ്‌റ്റേൺ കോൾഫീൽഡ്‌സ്‌, സിഎംപിഡിഐഎൽ എന്നിവയിൽ പണിമുടക്ക്‌ പൂർണമാണ്‌. ഈസ്‌റ്റേൺ മേഖലയിൽ തൃണമൂൽ അനുകൂലികൾ പണിമുടക്ക്‌ പൊളിക്കാൻ ശ്രമിച്ചത്‌ ഒഴിച്ചാൽ അനിഷ്ട സംഭവങ്ങൾ ഉണ്ടായിട്ടില്ല. നേരത്തേ മാറിനിന്ന ബിഎംഎസ്‌ യൂണിയനും പണിമുടക്കിൽ പങ്കുചേർന്നു. പണിമുടക്ക്‌ ശനിയാഴ്‌ചവരെ തുടരും.

തൊഴിലാളികളെ കേന്ദ്ര ട്രേഡ്‌ യൂണിയനുകൾ അഭിവാദ്യംചെയ്‌തു. സ്വകാര്യവൽക്കരണത്തിനെതിരെ പണിമുടക്കിലേക്ക്‌ നീങ്ങാൻ ഓർഡനൻസ്‌ ഫാക്ടറി ജീവനക്കാരുടെ ഹിതപരിശോധനയിൽ തീരുമാനമായി. റെയിൽവേ സ്വകാര്യവൽക്കരണത്തിനെതിരെയും പ്രതിഷേധം ഉയർന്നു‌.പന്ത്രണ്ടിന അവകാശപത്രിക ഉയർത്തിയും സ്വകാര്യവൽക്കരണത്തിൽ പ്രതിഷേധിച്ചുമാണ്‌ ട്രേഡ്‌ യൂണിയനുകൾ പ്രതിഷേധദിനം ആചരിക്കുന്നത്. സിഐടിയു, എഐടിയുസി, എച്ച്‌എംഎസ്‌, ഐഎൻടിയുസി, എഐയുടിയുസി, ടിയുസിസി, യുടിയുസി, സേവ, എൽപിഎഫ്‌, എഐസിസിടിയു എന്നീ കേന്ദ്ര ട്രേഡ്‌ യൂണിയനുകളുടെ ആഹ്വാനപ്രകാരമാണ്‌ ദിനാചരണം.


ദേശാഭിമാനി ഇപ്പോള്‍ ടെലഗ്രാമിലും ലഭ്യമാണ്‌. കൂടുതല്‍ വാര്‍ത്തകള്‍ക്കും അപ്ഡേറ്റുകള്‍ക്കുമായി ടെലഗ്രാം ചാനല്‍ സബ്സ്ക്രൈബ് ചെയ്യാം.


പ്രധാന വാർത്തകൾ
 Top