22 October Thursday

കാർഷികബില്ലുകൾ രാജ്യസഭ വീണ്ടും പരിഗണിക്കാൻ മടക്കി അയക്കണം: രാഷ്ട്രപതിയോട് സിപിഐ എം

വെബ് ഡെസ്‌ക്‌Updated: Monday Sep 21, 2020

ന്യൂഡൽഹി > അന്യായമായും നിയമവിരുദ്ധമായും പാസാക്കിയ കാർഷികബില്ലുകൾ  ഭരണഘടനയുടെ111-ാം വകുപ്പ് പ്രകാരം രാജ്യസഭ വീണ്ടും പരിഗണിക്കാൻ മടക്കിഅയക്കണമെന്ന്  രാഷ്ട്രപതിയോട് സിപിഐ എം പൊളിറ്റ്ബ്യൂറോ ആവശ്യപ്പെട്ടു. എല്ലാ പ്രതിപക്ഷകക്ഷികളും ഈ ബില്ലുകൾക്കെതിരായി അണിനിരന്ന സാഹചര്യത്തിൽ രാജ്യസഭയിൽ സർക്കാരിനു ഭൂരിപക്ഷം ഇല്ലായിരുന്നു. എന്നാൽ പാർലമെന്ററി നടപടിക്രമങ്ങളും വോട്ടെടുപ്പിനുള്ള എംപിമാരുടെ അവകാശങ്ങളും അട്ടിമറിച്ച് സർക്കാർ തിരക്കിട്ട് ബില്ലുകൾ  പാസാക്കിഎടുക്കുകയായിരുന്നു. ഇതുവഴി ജനാധിപത്യത്തെ കശാപ്പ് ചെയ്തിരിക്കുകയാണ്.

കോവിഡ് മഹാമാരിയുടെ സാഹചര്യത്തിലുള്ള ആശങ്കകൾ  ദുരുപയോഗപ്പെടുത്തി വെട്ടിച്ചുരുക്കിയ സമ്മേളനത്തിലും ലോക്ക്ഡൗൺ കാലത്ത് ഇറക്കിയ 11 ഓർഡിനൻസിനു പകരമുള്ള ബില്ലുകൾ പാസാക്കാനാണ് സർക്കാരിന്റെ  വ്യഗ്രത. പാർലമെന്റിന്റെ പരിഗണനയ്ക്ക് വരുന്ന ഏതു വിഷയത്തിലും വോട്ട് രേഖപ്പെടുത്താനുള്ള അനിഷേധ്യമായ അവകാശം എംപിമാർക്കുണ്ട്. ഈ അവകാശം സർക്കാർ അവജ്ഞാപൂർവം നിഷേധിച്ചു. വോട്ടെടുപ്പ് ആവശ്യപ്പെട്ട എട്ട് എംപിമാരെ സസ്പെൻഡ് ചെയ്തത് അങ്ങേയറ്റം അപലപനീയമാണ്.   

ഇന്ത്യൻ കാർഷികരംഗത്തെയും ഉൽപന്നങ്ങളെയും വിപണിയെയും ആഭ്യന്തര, വിദേശ കോർപറേറ്റുകൾക്ക് ഈ നിയമങ്ങൾ വഴി വിട്ടുകൊടുക്കുകയാണ്. കോർപറേറ്റുകൾക്ക് കൊള്ളലാഭം കൊയ്യാനും കർഷകരെയും സാധാരണക്കാരെയും ദുരിതത്തിലാഴ്ത്താനും വഴിയൊരുക്കുന്നതാണ് ഈ നിയമങ്ങൾ. മിനിമം താങ്ങുവില നിരോധിക്കുമെന്ന സ്ഥിതിയാണ്. പരിമിതമായ തോതിലാണ് നടപ്പാക്കുന്നതെങ്കിലും കർഷകർക്ക് വരുമാനം ഉറപ്പാക്കുന്നതിൽ താങ്ങുവില കുറെയൊക്കെ സഹായിച്ചിരുന്നു. അവശ്യവസ്തുനിയമം ഭേദഗതി ചെയ്യുന്നതോടെ വൻതോതിൽ പൂഴ്ത്തിവയ്പിനു സാഹചര്യം ഒരുങ്ങും; സാധനങ്ങൾക്ക് കൃത്രിമക്ഷാമം സൃഷ്ടിക്കപ്പെടാനും വിലക്കയറ്റത്തിനും ഇതു കാരണമാകും. കൃഷിയിടങ്ങൾ ഒന്നിച്ചുചേർക്കാനുള്ള നിർദേശവും  കരാർകൃഷി നിയമപരമാക്കുന്നതും കാർഷികബിസിനസ്സുകാരെ സഹായിക്കുന്നതും രാജ്യത്തിന്റെ ഭക്ഷ്യസുരക്ഷ അപകടത്തിലാക്കുന്നതുമാണ്.     

കൃഷി  സമവർത്തി  പട്ടികയിലുള്ള വിഷയമാണ്. സംസ്ഥാനസർക്കാരുകളെ മറികടന്ന് കാർഷികനിയമങ്ങൾ നടപ്പാക്കുന്നത് ഭരണഘടനയുടെ അടിസ്ഥാനതത്വമായ ഫെഡറലിസത്തെ അട്ടിമറിക്കുന്നതാണ്. രാജ്യത്തിന്റെയും കർഷകരുടെയും താൽപര്യങ്ങൾ മാനിച്ച് സർക്കാർ ഈ ബില്ലുകൾ പിൻവലിക്കണം. കർഷകസംഘടനകൾ 25നു നടത്തുന്ന അഖിലേന്ത്യ പ്രതിഷേധത്തിനു പാർടി പൂർണപിന്തുണ പ്രഖ്യാപിച്ചു.


 


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

മറ്റു വാർത്തകൾ

----
പ്രധാന വാർത്തകൾ
-----
-----
 Top