26 October Monday

പൊരുതുന്ന കര്‍ഷകര്‍ക്ക് അഭിവാദ്യം ; ഉത്തരേന്ത്യൻ കർഷകരെ നേരിൽക്കണ്ട് പിന്തുണ അറിയിച്ച്‌ സിപിഐ എം എംപിമാർ

എം പ്രശാന്ത‌്Updated: Friday Sep 25, 2020

ഹരിയാനയിലെ ഉച്ചാനയിൽ കിസാൻസഭ ജോയിന്റ്‌‌ സെക്രട്ടറി വിജൂ കൃഷ്‌ണൻ കർഷകരോട്‌ സംസാരിക്കുന്നു. എംപിമാരായ എളമരം കരീം, ബികാസ്‌ രഞ്ജൻ ഭട്ടാചാര്യ , കെ കെ രാഗേഷ്‌ എന്നിവർ സമീപം


ഹിസാർ (ഹരിയാന)
മോഡി സർക്കാരിന്റെ കർഷകദ്രോഹ ബില്ലുകൾക്കെതിരായി തെരുവുകളിൽ പ്രതിഷേധസമരം തുടരുന്ന ഉത്തരേന്ത്യൻ കർഷകരെ നേരിൽക്കണ്ട് പിന്തുണ അറിയിച്ച്‌ സിപിഐ എം എംപിമാർ. രാജ്യസഭാ നേതാവ് എളമരം കരീം, രാജ്യസഭാംഗങ്ങളായ കെ കെ രാഗേഷ്, ബികാസ് രഞ്ജൻ ഭട്ടാചാര്യ എന്നിവരും കിസാൻ സഭ ജോയിന്റ്‌‌ സെക്രട്ടറിവിജൂ കൃഷ്ണനും വ്യാഴാഴ്ച ഹരിയാനയിലെ വിവിധ സമരകേന്ദ്രങ്ങൾ  സന്ദർശിച്ചു.

ഹരിയാനയിലെ പരുത്തി കൃഷി കേന്ദ്രങ്ങളായ ഉച്ചാന, ആദംപ്പുർ, നർനോദ്, ബർവാല എന്നിവിടങ്ങളിൽ സമരത്തിലുള്ള കർഷകരെയാണ് സന്ദർശിച്ചത്. രാജ്യസഭയിൽ ബില്ലുകൾക്കെതിരെ ശക്തമായ നിലപാട് എടുത്തതിന്റെ പേരില്‍ സഭയില്‍ സസ്പെൻഡ് ചെയ്യപ്പെട്ട എംപിമാരെ സമര കേന്ദ്രങ്ങളിൽ കർഷകർ ആവേശത്തോടെ സ്വീകരിച്ചു. ബില്ലുകൾ പിൻവലിക്കുംവരെ സമരം തുടരുമെന്ന് കർഷകർ ഒറ്റക്കെട്ടായി പ്രഖ്യാപിച്ചു.

കാർഷികമേഖലകൂടി കോർപറേറ്റുകൾക്ക് തീറെഴുതാനാണ് മോഡി സർക്കാർ തിടുക്കത്തിൽ ബില്ലുകല്‍ പാസാക്കിയതെന്ന് എളമരം കരീമും കെ കെ രാഗേഷും പറഞ്ഞു.  മാപ്പുപറഞ്ഞാൽ സസ്പെൻഷൻ പിൻവലിക്കാമെന്നാണ് സർക്കാർ പറയുന്നത്. അധികാരികൾക്ക് മുന്നിൽ മാപ്പുപറച്ചിൽ സംഘപരിവാരത്തിന്റെ ശീലമാണ്. എന്തെല്ലാം നടപടി നേരിടേണ്ടിവന്നാലും  കർഷകർക്കുവേണ്ടി നിലകൊള്ളുമെന്നും - എംപിമാർ പറഞ്ഞു.

പഞ്ചാബ്, ഹരിയാന, പശ്ചിമ യുപി എന്നിവിടങ്ങളിൽ വെള്ളിയാഴ്ചത്തെ പ്രതിരോധ ദിനാചരണം സമ്പൂർണ ബന്ദായി മാറുമെന്ന് കിസാൻസഭ ഹരിയാന പ്രസിഡന്റ് ഫൂൽ സിങ് ദേശാഭിമാനിയോട് പറഞ്ഞു.  കർഷകത്തൊഴിലാളികളും  ചെറുകിട വ്യാപാരികളും പ്രതിഷേധത്തിൽ അണിനിരക്കും.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..


----
പ്രധാന വാർത്തകൾ
-----
-----
 Top