25 August Sunday

പൗരത്വ പട്ടിക പുനഃപരിശോധന അംഗീകരിക്കില്ല: സിപിഐ എം

സ്വന്തം ലേഖകൻUpdated: Friday Jul 19, 2019

ന്യൂഡൽഹി > കരട‌് ദേശീയപൗരത്വ രജിസ‌്റ്ററിലെ പേരുകൾ പുനഃപരിശോധിക്കാനുള്ള കേന്ദ്രസർക്കാരിന്റെയും അസം സർക്കാരിന്റെയും  നീക്കം അംഗീകരിക്കാനാകില്ലെന്ന‌് സിപിഐ എം പൊളിറ്റ‌് ബ്യൂറോ. 2018 ജൂലൈ 30ന‌് പുറത്തിറക്കിയ കരട‌് രജിസ‌്റ്ററിലെ പേരുകൾ പുനഃപരിശോധിക്കണമെന്ന‌് ആവശ്യപ്പെട്ട‌് കേന്ദ്രസർക്കാരും അസം സർക്കാരും സുപ്രീംകോടതിക്ക‌് അപേക്ഷ നൽകിയിട്ടുണ്ട‌്. ഈ ആവശ്യത്തിനായി അന്തിമ പൗരത്വപ്പട്ടികയുടെ പ്രസിദ്ധീകരണത്തിനുള്ള കാലാവധി നീട്ടണമെന്നും അപേക്ഷകളിൽ ആവശ്യപ്പെട്ടിട്ടുണ്ട‌്.

ബംഗ്ലാദേശുമായി അതിർത്തി പങ്കിടുന്ന ജില്ലകളിലെ 20 ശതമാനവും മറ്റ‌് ജില്ലകളിലെ 10 ശതമാനവും പേരുകൾ എങ്കിലും പരിശോധിക്കണമെന്നാണ‌്  ആവശ്യം. പൗരത്വം ഉറപ്പിക്കാൻ രേഖകൾ ശരിയാക്കാനും ഓഫീസുകളിൽ ഹാജരാകാനും വലിയ സമയം ഇതിനോടകം ചെലവിട്ട ലക്ഷക്കണക്കിന‌് പൗരരെ വീണ്ടും ബുദ്ധിമുട്ടിക്കുന്ന നീക്കങ്ങൾക്ക‌് സിപിഐ എം എതിരാണ‌്.

 ജൂലൈ 31നാണ‌് പൗരത്വപ്പട്ടിക പ്രസിദ്ധീകരിക്കാനുള്ള അവസാനതിയതി. ഇപ്പോൾ പുനഃപരിശോധന ആവശ്യം ഉന്നയിച്ച‌് കാലാവധി നീട്ടാനുള്ള നീക്കം മതാടിസ്ഥാനത്തിൽ പൗരത്വം തിരിച്ചറിഞ്ഞ‌് നടപടികൾ കൈക്കൊള്ളാനുള്ള ബിജെപി അജണ്ടയുടെ ഭാഗമാണ‌്.
പൗരത്വ രജിസ‌്റ്ററിൽനിന്ന‌് തെറ്റായ രീതിയിൽ ഒഴിവാക്കിയ പൗരർക്ക‌് വേഗം നീതി ലഭിക്കാനുള്ള സാഹചര്യം ഒരുക്കണം.  രജിസ‌്റ്ററിൽ പേരില്ലാത്ത ലക്ഷങ്ങളുടെ അവസ്ഥ എന്താകുമെന്ന ചോദ്യത്തിനും ഉത്തരം കണ്ടെത്തണം.

ദേശീയ പൗരത്വ രജിസ‌്റ്റർ സംബന്ധിച്ച നടപടിക്ക‌് തുടക്കംകുറിച്ച സുപ്രീംകോടതി ഈ വിഷയങ്ങൾ പരിഹരിക്കാൻ  ഇടപെടണം. പൗരൻമാരുടെ അടിസ്ഥാന അവകാശങ്ങൾ സംരക്ഷിക്കാൻ കോടതി ഇടപെടൽ അനിവാര്യമാണെന്നും പൊളിറ്റ‌്ബ്യൂറോ പ്രസ‌്താവിച്ചു.


പ്രധാന വാർത്തകൾ
 Top