സ്‌ത്രീസൗഹൃദ ടൂറിസം , അടിസ്ഥാന സൗകര്യത്തിലും ആ​ഗോള നിലവാരം ; എട്ടിടം ഇന്റർനാഷണൽ

തിരുവനന്തപുരം
സംസ്ഥാനത്തെ എട്ടു വിനോദസഞ്ചാര കേന്ദ്രങ്ങൾക്ക്‌ സ്‌ത്രീസൗഹൃദത്തിലും അടിസ്ഥാന സൗകര്യത്തിലും ആ​ഗോള നിലവാരം. കുമരകം (98.72 % മാർക്ക്), കണ്ണൂർ ഫോർട്ട് (93.95), പിണറായി (89.74), ആദികടലായി (88.46), പയ്യാമ്പലം ബീച്ച് (87.18 %), അഞ്ചരക്കണ്ടി (82.05%), മൂന്നാർ (79.49 %), കാന്തല്ലൂർ (73.08 %) എന്നിവയാണ് എട്ട് സ്ഥാനത്ത്‌. ലോകത്ത് ആദ്യമായി ടൂറിസം മേഖലയിൽ നടത്തിയ ലിംഗസമത്വ, സ്ത്രീസുരക്ഷാ ഓഡിറ്റിലാണ്‌ പഠനറിപ്പോർട്ട്‌ വന്നത്‌.

ഇരിങ്ങൽ കരകൗശല ഗ്രാമം (69.23 %), കൊല്ലം സാമ്പ്രാണിക്കൊടി (67.95 %), കോവളം ബീച്ച്, ലൈറ്റ് ഹൗസ് ( 66.67 %), ഫോർട്ട് കൊച്ചി ( 65.38 %), തേക്കടി (64.10 %), കോഴിക്കോട് നെല്യാടി (60.26 %), പുന്നമട ഫിഷിങ് പോയിന്റ് (58.97 %), കൊല്ലം തെൻമല (57.69 %) എന്നിവ തൊട്ടുപിന്നിലുണ്ട്. പഠനം നടത്തിയ 72 കേന്ദ്രത്തിൽ 25നും 50 ശതമാനത്തിനും മുകളിൽ മാർക്കുണ്ട്‌. മികച്ച താമസ സൗകര്യം, ​ഗതാ​ഗത സൗകര്യം,  തെരുവുവിളക്ക്‌, കുടിവെള്ളം, വിശ്രമമുറി, ശൗചാലയം തുടങ്ങിയവയായിരുന്നു മാനദണ്ഡം. അഞ്ചിടത്ത്‌ ലിംഗസമത്വ, സ്ത്രീസുരക്ഷാ ഓഡിറ്റും നടത്തി. കാന്തല്ലൂർ, കുമരകം, പെരുമ്പളം, കടലുണ്ടി, കനകക്കുന്ന് കൊട്ടാരം, മ്യൂസിയം എന്നിവിടങ്ങളിലായിരുന്നു ഓഡിറ്റ്‌.