18 October Friday

റെയിൽവേ ബോണസ്‌ പ്രഖ്യാപനം തട്ടിപ്പെന്ന്‌ ജീവനക്കാർ; 78 ദിവസ ശമ്പളം= 17,951 രൂപ

പി വിജയൻUpdated: Saturday Sep 21, 2019

മലപ്പുറം >  റെയിൽവേയിൽ 78 ദിവസത്തെ ശമ്പളം ബോണസ്‌ നൽകുമെന്ന കേന്ദ്ര സർക്കാർ പ്രഖ്യാപനം തട്ടിപ്പെന്ന്‌ ജീവനക്കാർ. യാത്രക്കാരുടെ  എണ്ണവും ചരക്കുവരുമാനവും വർധിച്ചിട്ടും അതിനനുസരിച്ച്‌ ബോണസ്‌ ലഭിക്കുന്നില്ല. 78 ദിവസത്തെ ശമ്പളമെന്ന പേരിൽ നൽകുന്നത്‌  17,951 രൂപമാത്രം.
  

 റെയിൽവേയിലെ ഏറ്റവും താഴ്‌ന്ന ശമ്പളമായ 18,000 രൂപയാണ്‌ ബോണസ്‌ കണക്കാക്കാൻ എടുക്കുന്നത്‌. ആ തുകയ്‌ക്ക്‌  7000 രൂപ സീലിങ്ങും ഏർപ്പെടുത്തി. 12 മാസത്തേക്ക്‌ 84,000 രൂപ. ഒരുദിവസത്തെ ശമ്പളം 230.13 രൂപ.  78 ദിവസത്തേക്ക്‌ ജീവനക്കാരന്‌ കിട്ടുന്നത്‌ 17,951 രൂപ.
 നാലുവർഷമായി റെയിൽവേയിൽ ജീവനക്കാർക്ക്‌ ലഭിക്കുന്ന ബോണസാണിത്‌. ഒരുപൈസ പോലും കൂട്ടിയില്ല. 7000 രൂപ സീലിങ്ങും മാറ്റിയില്ല. നേരത്തെ 3500 രൂപയായിരുന്നു സീലിങ്. അന്ന്‌ 80 ദിവസത്തെ ശമ്പളമായിരുന്നു ബോണസ്‌. സീലിങ് വർധിപ്പിച്ചപ്പോൾ ദിവസം 78 ആക്കി കുറച്ചു.
 

  ജീവനക്കാർക്ക്‌ ജോലിയെടുക്കാൻ ഉത്സാഹത്തിനാണ്‌ ഇത്രയും ദിവസത്തെ ബോണസ്‌ നൽകുന്നതെന്നാണ്‌ റെയിൽവേ മന്ത്രി പറഞ്ഞത്‌. ആറുവർഷമായി ബോണസിൽ ഒരുവർധനയും വരുത്താതെയാണ്‌ മന്ത്രിയുടെ വീമ്പുപറച്ചിൽ.
നാലുവർഷമായി ചരക്കുനീക്കത്തിലും യാത്രക്കാരുടെ എണ്ണത്തിലും ഗണ്യമായ വർധനയുണ്ടായപ്പോഴാണ്‌ ബോണസിൽ കുറവ്‌.  2018–- ’19ൽ ട്രെയിനുകളിലൂടെയുള്ള ചരക്കുകടത്ത്‌ 1221 ദശലക്ഷം ടണ്ണാണ്‌. യാത്രക്കാരുടെ എണ്ണം 8438 ദശലക്ഷവും. 2017–- ’18ൽ ഇത്‌ യഥാക്രമം 1159 ദശലക്ഷവും 8287 ദശലക്ഷവുമാണ്‌. തൊട്ടുമുമ്പുള്ള വർഷം ഇതിലും കുറവാണ്‌. ജീവനക്കാരുടെ ഉൽപ്പാദനക്ഷമതയിലും വർധനയുണ്ടായി.  6,11,386 ആണ്‌ കഴിഞ്ഞവർഷത്തെ ഉൽപ്പാദനക്ഷമത. 2017ൽ ഇത്‌ 5,36,839 ആയിരുന്നു.

‘അച്ഛന്‌ ഒന്നേമുക്കാൽ ലക്ഷം ബോണസ്‌!’

 റെയിൽവേയിൽ 78 ദിവസ വേതനം ബോണസായി നൽകുമെന്ന വാർത്ത വന്നതോടെ സാമൂഹ്യമാധ്യമങ്ങളിൽ ട്രോളുകൾ നിറയുകയാണ്‌. ‘നാലുവർഷമായി ദീപാവലിക്ക്‌ കിട്ടുന്ന ബോണസ്‌ തുകയാണ്‌ ഇത്തവണയും റെയിൽവേ നൽകുന്നത്‌. ഇതറിയാതെ മാധ്യമങ്ങളും ആഘോഷിക്കുകയാണ്‌’–- ട്രോളിൽ പറയുന്നു.
  

 ‘എന്റെ നോട്ടത്തിൽ അച്ഛന്‌ ഒരു ഒന്നേമുക്കാൽ ലക്ഷമെങ്കിലും ബോണസ്‌ കിട്ടും’–- മകന്റെ സംശയത്തിന്‌ കണക്കുകൾ നിരത്തിയുള്ള അച്ഛന്റെ മറുപടിയുമുണ്ട്‌. ‘പത്രവാർത്ത കാരണം എന്റെ മനഃസമാധാനവും പോയി. കുടുംബത്തിന്‌ എന്നിലുള്ള വിശ്വാസവും പോയി. കലഹത്തിനൊരു കാരണവുമായി’–- ഇങ്ങനെ പറഞ്ഞാണ്‌ ട്രോൾ അവസാനിക്കുന്നത്‌.
റെയിൽവേയുടെ നേട്ടക്കണക്ക്‌:

വർഷം, ചരക്ക്‌ (മില്ല്യൺടൺ), യാത്രക്കാരുടെ എണ്ണം (ദശലക്ഷം) ക്രമത്തിൽ:
2018–- 19     1221     8438
2017–-18      1159     8287
2016–-17      1106     8116
2015–-16      1101     8107
 


പ്രധാന വാർത്തകൾ
 Top